Ôi lơ 25/9, ta ntŭk kan Quốc hôị lĕ geh ƀư rơh rƀŭn nchră ngăn ngên Đại hội Đaị biêủ Đảng bộ Quốc hôị tal 1, năm kan 2025-2030. Đại hôị geh bôk nău “Rdâk njêng Đảng bộ kloh ueh, nâp dăng lĕ rngôch, leo kan Quốc hôị rgâl mhe têh dăng, n’hao nău dơi, săk rnglăy pah kan, joat nâp lăp ta rơh rach năm hun hao mhe têh ndrŏng, ueh mhe, hơm răm đăp mpăn bâh mpôl rnoi”. Tĭng nău mbơh tơih chính trị, tâm năm kan 2020-2025, Quốc hội lĕ ƀư lôch ueh ăp bôk nău kan, nău nchrăp kan ngluh mbơh, nkre lah leo kan, njrăng rmal ngăch, geh săk rnglăy âk nău kan tơm geh ntoh luh an tâm di đah nău ŭch rgâl mhe bâh neh dak đah nău leo kan bâh Đảng. Êng tâm trong kan rdâk njêng, ƀư lôch nău kơl kan, pháp luật geh âk nău rgâl mhe. Tâm nĕ ntoh lư ngăn lah mbơh tơih Nghị quyết rgâl mhe, ntop du đê̆ nkô̆ bâh Hiến pháp năm 2013, ăp luật mpeh leo kan n’gâng kan, ăp nghị quyết mpeh pă dăp ntŭk kan hành chính gưl n’gor, pă dăp ntuk kan hành chính gưl xã, ntrŭnh mbơh âk nău kơl mpeh nău rêh jêng an nâp nâl đăp mpăn, nsĭt tay nău geh ueh ngăn ngên kơl an ƀon lan...Ta meng nĕ, nău kan uănh nđôi ăp nar lơ ma lăp tâm nău rêh ngăn ngên, nău kan nchră nău đah dak bah dih geh mbơh tơih lĕ rngôch. Râng n’hanh ntoh ngơi ntĭm đă ta Đaị hôị, Tổng Bí thư Tô Lâm lah na nê̆ neh dak he dôl lăp ta rơh hun hao mhe đah nău ŭch geh dŭt âk, an geh ăp gưl uỷ đảng, ăp đaị biêủ Quốc hôị, cán bộ, đảng viên, công chức, viên chức, nuĭh pah kan an geh n’hao tay lơn nău nsrôih mpeh chính trị, rgâl mhe nău min, nău nsrôih pah kan. Tổng Bí thư nkah mbơh pơk 2 nău đă, 5 nău mpŏng kan tơm khlăy gay ma an Đaị hôị tâm nchră, ƀư kloh na nê̆, ntop ƀư lôch, dơn ngoăy ƀư tĭng tâm nău kan mhe, tâm nĕ an geh n’hao nău kan ƀon lan tâm ăp nău pah kan bâh Quốc hôị. Quốc hội Việt Nam an geh dăch bên đah ƀon lan,  ngăn ngên lah  “Quốc hội bâh ƀon lan, an ƀon lan, yor ƀon lan”- mô dơn geh tâm nău ngơi ma tâm ăp nău luật, ta ăp rơh tâm ôp ơh nău, ăp nău ntrŭnh kan khlăy, an geh mpŏng tât nău ŭch kan têh, hơm răm, đăp mpăn, ueh lăng bâh ƀon lan n’hanh nău têh ndrŏng bâh neh dak.