Ôi 13/10, ta Thủ đô Hà Nội, Đại hội Đại biểu Đảng bộ Chính phủ lor bôk năp, năm kan 2025–2030 ntơm pơk ngăn. Tổng Bí thư Tô Lâm tât râng n’hanh rđău đă. Ntơh măt Bộ Chính trị, Ban Bí thư, Tổng Bí thư rhơn rnê ăp dơi nău dơi ntoh lư Đảng bộ Chính phủ hŏ dơi geh tâm năm kan 2020–2025, lơn lah tâm rđău đă, nchŏng đă ƀĭt juel pah kan rdâk njêng trong tĭng, hun hao wăng sa – rêh jêng kon nuĭh, njrăng n’gang nuh srê n’hanh đăp mpăn nău rêh ƀon lan.

Tổng Bí thư lah rjăp, Đảng bộ Chính phủ ân ntĭt leo lor tay mpeh han săk chính trị, bôk rngok gĭt blău, nuih n’hâm kan nsum uĕh lŏng n’hanh rgâl blău ƀư mhe; lah ntŭk rgum tâm rnglăp, dơn ngoăy nău mĭn n’hanh nău kan tâm lam nuĭh kan ngih dak. Păng đă rdâk njêng Đảng bộ kloh rvah ngăn, nâp dăng; njrăng, n’gang sa khâm, mpŭng lir, tih djơh; ntik n’hao nău khlay kan Chính phủ “nta trong dơh hun hao, sơih rmơih, dâk kan, rhŏ dŏng ƀon lan”.

Ntoh nau tâm nar ntơm rƀŭn Đại hội ntoh măt Đảng bộ Chính phủ tal bôk năp, Bí thư Đảng uỷ Chính phủ, Thủ tướng Chính phủ Phạm Minh Chính lah rjăp, Đại hội ngăn ngên lah nau kan chính trị khlay, nkah nau dơi tâm rnôk ndâk njêng Chính phủ nâp, rjăp, pah kan, yor neh dak, yor ƀon lan.

Đại hội mbơh nkô̆ nau tât năm 2030, Việt Nam jêng dak dôl hun hao geh công nghiệp mhe, nau geh dơi âk, tâm rmôt 30 jâng văng sa geh rnoh mrô GDP âk ngăn lam ntur neh. Hun hao văng sa lvang năm 2026-2030 ân ngăch, nâp nâl, đăp mpăn ân tâm ban têh. Đại hội nchrăp luh 10 nau kan, ntrong kan tơm, rgum tâm nau ƀư jêh nau kan, rklaih n’hâm ƀư kan, rgum tu tơm, pơk nau nsôih mhe ân hun hao; ntrŭt dăng nau kan công nghiệp rgâl mhe, ueh nâp; uănh khoa học công nghệ, rgâl blau mhe ndrel ntrơn rgâl mrô lah nau nsôih ân hun hao; ndâk nau kan ntĭm nti mhe, hun hao nŭih ƀư nau kan nâp nâl prêh.