Ôi 24/11, Ban Bí thư ƀư tâm nchră lam dak n’glôch jêh pah kan ôp uănh, groi nđôi lhăt jăp bah Đảng năm 2025 n’hanh năm kan Đại hội XIII. Lah rđău đă ta rnôk tâm nchră, Tổng Bí thư Tô Lâm lah rjăp năm kan rlău aơ, pah kan rdâk njêng, rmăn uĕh Đảng dơi an ƀư tay lĕ n’hâm suan, lam lĕ rngôch, rgâl mhe, rgop n’hao nău dơi rđău kan, n’hao nău dơi mât bôk kan n’hanh suan rlăch ndăng bah Đảng.

Ăp năm rlău aơ, Bộ Chính trị, Ban Bí thư n’hanh ăp gưl hŏ ôp uănh rlău 232 rbăn mpôl kan đảng n’hanh rlău 1,2 rkeh đảng viên; rmal 545 mpôl kan đảng n’hanh 4.213 đảng viên geh nău tih, bău rbăn lhơ. Gay n’hao săk tam pah kan tâm năm kan tât, Tổng Bí thư dăn đă ăp gưl ủy, mpôl kan đảng, ủy ban kiểm tra rgum tĭng ƀư jăp 5 nău dơn kan rgum tơm, tâm nê uănh khlay n’hao săk tam, nsĭt nău dơi tam, groi nđôi ntơm bah tĭng chi bộ, đăp mpăn tĭng jăp, nău tâm ban ŭch dơn ngoăy, kloh uĕh nâp dăng bah Đảng.