Dơn nău jă bah Tổng thống Đại Hàn Dân Quốc Lee Jae Myung, Tổng Bí thư Tô Lâm n’hanh I ur ndrel mpôl ntơh măt gưl têh dak he khâl gưl ngih dak tât Đại Hàn Dân Quốc ntơm bah nar 10-13/8, ôi (11/8) tĭng mông ta ntŭk ta Nhih pah kan Tổng thống, Tổng thống Lee Jae Myung ƀư tơm rơh wơt rgum Tổng Bí thư Tô Lâm tĭng nău way dŭt têh. Lôch lễ wơt ngăn 2 kruanh rđău kan leo mpôl ntơh măt gưl têh bar dak ƀư tâm nchră n’gluh ăp trong nkra khlay gay mât mbro n’hanh hun hao lơn đŏng tâm boh têh jong lam lĕ rngôch Việt Nam n’hanh Hàn Quốc tâm let năp tay.

Lah ta rơh tâm nchră, Tổng Bí thư Tô Lâm lah rjăp: Dŭt rhơn n’hanh lah uĕh Tổng thống hŏ rong lor mha êng jă Tổng Bí thư lah năch dak bah dih lor bôk năp rnôk Hàn Quốc geh n’gâng kan mhe, mpơl nău uănh khlay n’hanh an lor dŭt têh bah Hàn Quốc n’hanh Tổng thống nơm đah tâm boh 2 dak. Tổng thống Hàn Quốc Lee Jae Myung lah rjăp, ta nâm nău rđău đă chrat ang bah Tổng Bí thư Tô Lâm, Việt Nam aƀaơ dôl geh nău hun hao wăng sa dŭt ngăch, Tổng thống Hàn Quốc nsing nơm an lah tâm let năp tay Việt Nam mbra jêng dak hun hao đah rnoh geh wăng sa âk.