Kưt lah nău nkoch bri, kuăl lah nkoch êng, Tâm văn học kuăl lah mprơ nkoch, jêng lah nkoch mpeh nău ŭch bah nơm n’hanh mô geh mprĭng, knŭng geh er. Er kưt geh nău ŭch êng dŭt âk. Đah nău nkoch, ndrel đah ăp nghệ nhân, ăp nuĭh dơi mprơ kưt. Kơt tâm khĭt ôm ri mprơ nkoch nău đah nuĭh lĕ roh, mô lah tâm ăp nar lễ răm ri mprơ kơt du rơh nkoch bri, ntĭnh kônh wa ƀon lan ndrel tâm rnglăp, rgŏ jă nkra njêng, ntĭnh ntăn kon sau rêh uĕh, mô lah mprơ mpeh nău tâm rŏng bu ur bu klô. Rnôk mprơ kưt way geh mboăt uh ndrel an nuĭh mprơ, mô lah mprơ khôm ê jêh ăp gưl mprơ. Nău ngơi rplay tâm nău mprơ kưt geh rup ndah ntĭt hôr uĕh. Yơn nê geh âk êng đah mprơ ot ndrong n’hanh mprơ kưt tâm nău rêh ăp nar. Nghệ nhân Y Đhin Niê, ta buôn Triă, xă Ea Tul, n’gor Dak Lak an gĭt:

Nău ngơi rplay tâm mprơ ot ndrong n’hanh mprơ kưt way geh ăp nău uĕh êng. Mprơ kưt way lah rklah êng tâm ăp rnôk, ntĭt hôr mpeh nău ngăn, tơm si dak nor... hôm ot ndrong ăp nău ngơi rplay tĭng du trong jong, mô geh ndôp gưl aơ nthoi tâm ntŭk êng.  

Trong luh bah nău rêh mhe ăp nău mpet tâm nău mât ndrăy ăp nău uĕh văn hóa rnoi mpôl đêt, tâm nĕ er kưt tâm nău mprơ Êđê. Nghệ nhân Y Ƀhĭ Ayun, buôn Kna, xă Čŭ M’gar, n’gor Dak Lak, nkoch: ăp nghệ nhân ranh lah ăp nuĭh mât huêng me, trong mprơ geh êng bah er nău mprơ Êđê, tâm nĕ geh mprơ Kưt. Nău mpoh hâng nău ŭch, ntrôl kon sau plơ̆ sĭt đah er nău mprơ, nău uĕh văn hóa rnoi mpôl đêt n’hanh mât ăp nău uĕh nĕ mô dơh yor ăp nghệ gĭt wât jru hvi, dơi trêng ntĭm mô hôm âk. Nghệ nhân Y Ƀhĭ Ayun an gĭt:

Kăl e ăp nghệ nhân way mprơ kưt tâm ăp nar răm rhơn têh. Aƀaơ đêt nuĭh gĭt kưt, lah geh gĭt ri mô hôm rĭng kơt ăp nuĭh ranh. Gâp mpŏng geh ăp nuĭh mprơ kưt blău mprơ rhôp tay, ntĭm dŭt n’hâm an kon sau nti tay.

 Tĭng wa Y Mang, Groi giám đốc Trung tâm Truyền thông-Văn hóa-Thể thao xă Quảng Phú, n’gor Dak Lak, xă aƀaơ geh 300 nghệ nhân hôm e gĭt nău ngơi hôr, mpât mprơ. Gay mât ndrăy er nău mprơ an rơh bah kơi, ăp năm bah năp, nău kan văn hóa xă lĕ dŭt nsrôih trêng ntĭm tâm ăp ngih samƀŭt, ăp jrô dơi pơk tâm thôn ƀon, yơn lah aơ du nău an geh nău nsrôih.

Đah nău kan mât uănh văn hóa, he an geh âk nău ƀư geh tât trong kan mât ndrăy. Tâm nĕ nău mprơ Êđê n’hanh ƀư na nao nău rgum rƀŭn n’hanh ƀa ƀơ lơn tay, ăp năm ƀư âk nău ƀư gay trêng ntĭm tay an rơh druh ndăm rdâk nsơm n’hanh mât ƀa ƀơ

Wa Linh Nga Niê Kđăm-Nuĭh gŭ mĭn njêng văn hóa dân dân Tây Nguyên an gĭt, aƀaơ ntŭk ntô mpât mprơ ntơm jêr lơn, hôm đêt nuĭh trêng ntĭm. Nău trêng ntĭm nthoi er nău mprơ Êđê, tâm nĕ geh mprơ kưt an uănh tât lơn. Knŭng geh ăp nuĭh blău âm nhạc bah ndŭl me dơi blău mprơ kưt.

Kăl e, ăp nuĭh mâp ndrel mprơ kưt, eirei âk, ăp druh ndăm lăp mŭt, mô nuĭh ntĭm. Knŭng uănh, djăt n’hanh ƀư tĭng. Brah ân he ri he dơi ƀư. He mô dơi ƀư jêng lah brah mô an he. Mô nuĭh ntĭm mprơ kưt kơt Ei rei. Ăp nău ƀư brah âk tâm ăp rơh rgum rƀŭn khân pơng mprơ kưt. Văn học nkoch i mbung dơi djăt âk. Aƀaơ ăp nău ƀư me mô hôm. Jêng rơh druh ndăm dŭt jêr mprơ kưt n’hanh mprơ Ei rei. Ndrĭ jêng tâm trong ntĭm nti âm nhạc tiểu học geh đă ntĭm nău mprơ Buôn Dur Kmăn gay pơng hôm e mât ndrăy.

Bah kăl e, er kưt lah du ndơ sa nuih n’hâm mô dơi mô geh tâm nău rêh bah nuĭh Êđê. Tâm nĕ yor nsum nuĭh Êđê gĭt uănh khlay nău uĕh ơm rnoi mpôl nơm. Tâm nău rêh aƀaơ, ndrel đah nău ntop kơl mât ndrăy bah ngih dak, rnôk ndâk njêng ăp ntŭk ƀư pâl nđaih nsum mpôl,. nuĭh Êđê dôl mbrơi rdâk nsơm tay, mât, ƀư uĕh lơn nău uĕh văn hóa bah rnoi mpôl đêt, tâm nĕ geh ăp er mprơ nău mprơ way ơm, trêng leo hâng ŭnh an rơh druh ndăm nthoi tay.