Ôi nar 30/12, wa Nguyễn Thiên Văn, Groi kruanh UBND n’gor Dak Lak, hŏ ký siƀŭt mbrô 12306 njuăl Sở Nông nghiệp n’hanh Phát triển nông thôn, Sở Công Thương, Sở Y tế, Công an n’gor, n’hanh UBND nkual ƀon têh Buôn Ma Thuột đă ôp uănh năl di ngăn nău lư ntrăm giá đỗ ma dak si mpăng dŏng ta Dak Lak, geh tât nău nchih bah VOV đah nkô̆: "Giá đỗ ntrăm dak si mpăng dŏng ta Dak Lak: Nhih pah kan dơi kan “tâm nje nău dơn kan”.

Tĭng nê, UBND n’gor Dak Lak đă Sở Nông nghiệp n’hanh Phát triển nông thôn ƀư tơm, kan nsum đah ăp nhih pah kan geh tât kơt Sở Công Thương, Sở Y tế, Công an n’gor, UBND nkual ƀon têh Buôn Ma Thuột n’hanh ăp nhih pah kan dơi kan mbơh mpeh nău kan mât uănh đăp mpăn kloh uĕh ndơ sa đah 6 ntŭk ntrăm giá đỗ dŏng dak si mpăng (bah dih săk nchih dơi an dŏng), pah kan hăn ôp uănh, ƀoi tơm luh, rgum sĭt mplơ̆ ndơ geh ƀư n’hanh lôch jêh tĭng ƀư an tât rnôk aƀaơ. UBND n’gor Dak Lak đă ăp nhih pah kan dơi kan mbơh na nê̆ rnoh âk siƀŭt kơp dơn tŏng đăp mpăn kloh uĕh ndơ ƀư njêng, tăch rgâl giá đỗ ta n’gor, nkre dăn đă n’gluh trong nkra mât uănh ăp ntŭk ƀư njêng, tăch rgâl giá đỗ tâm let năp tay.