Lôch 5 nar n’gul pah kan, ôi 29/9, Ủy ban Thường vụ Quốc hội mpôch dŭt rơh hop tâl 49, hŏ mĭn uănh 34 nkô̆, tâm nê geh 13 trong nchrăp luật nchrăp hao rblang dăn Quốc hội uănh an dŏng ta rơh hop tâl 10. Kruanh Quốc hội Trần Thanh Mẫn dăn đă ăp nhih pah kan ndăn djăt ăp tŏng nău rgop tâm ban ŭch dơn ngoăy, lôch jêh siƀŭt mbơh njuăl đại biểu Quốc hội di nar ton.

Rơh hop tâl 10, rơh hop n’glĕ dŭt bah Quốc hội khóa XV, geh rnoh nău kan dŭt têh, nkre mĭn uănh ăp nkô̆ way kan, nkre n’glôch jêh năm kan n’hanh n’glêh an âk nău khlay rƀŏng tât rơh mhe. Nchrăp, Quốc hội mbra mĭn uănh, n’gluh an dŏng bơi 50 trong nchrăp luật, nghị quyết, tâm nê geh âk nghị quyết khlay gay jêng đă tĭng năn ngăch ăp trong nchrăp mhe bah Trung ương mpeh ntĭm nti, dak si n’hanh lăp rgum dak bah dih.