Ủy ban nhân dân n’gor Dak Lak ƀư hop báo tât leh khay 7, nkoch gĭt mpeh nô nău wăng sa- rêh jêng kon nuĭh n’hanh plơng ơh ăp nkô̆ nău báo chí nchih nkoch tâm bah ri aơ nơh. Tĭng Ban Tổ chức, ăp nkô̆ nău ntoh lư dơi báo chí nkoch tâm bah ri  aơ nơh rgum tâm nău an ƀư n’gâng kan 2 gưl, khoah ta du đêt ntŭk ƀư ntung trong, mât dŏng tơm lŭ choih, ji ndŭl djroh sŭr châu Phi n’hanh rơh khêh mpôl tă bah sa bánh mì ta xã M’Đrắk.

 Mpeh nkô̆ dja, kruanh rđău kan ăp n’gâng kan geh tât hŏ plơng ơh na nê̆ n’hanh n’gluh trong nkra tâm di. Geh tât nău nchih “Jêr jŏt ntoh luh lôch 15 nar n’glăp dŏng n’gâng kan 2 gưl ta Dak Lak”, nchih ta VOV, kruanh rđău kan ăp n’gâng ta ntŭk geh tât nchih nkah VOV hŏ nkoch di nkô̆ nău. Wa Nguyễn Tự Do, Groi kruanh UBND xã Quảng Phú an gĭt, ăp jêr jŏt ma báo nkoch, hŏ dơi nkra bah, nău kan bah xã hŏ đăp mpăn. Ta rơh hop báo, kruanh rđău kan n’gor Dak Lak hŏ mbơh gĭt mpeh ăp trong nkra ntik n’hao suan dăng hun hao wăng sa dak lêng, bri n’hanh trong nchrăp an ƀư du rơh ntŭk kan tơm khlay.