Kêng măng 19/11, HĐND n’gor Khánh Hòa sơch wa Trần Phong, Groi Bí thư Tỉnh ủy, ƀư Kruanh UBND n’gor năm kan 2021–2026. Bah năp nê ndrel nar, Ban Tổ chức Trung ương mbơh n’glêh an bah Ban Bí thư rgum n’hao wa Trần Phong, Groi Bí thư Tỉnh ủy, Kruanh UBND n’gor Quảng Trị, ƀư Groi Bí thư Tỉnh ủy Khánh Hòa năm kan 2025–2030.

 Lah ta rnôk dơn nău kan, wa Trần Phong mpơl nău rhơn n’hao rnôk dơi Bộ Chính trị n’hanh Ban Bí thư nsing nơm jao nău kan, nkre ton n’hao nuih n’hâm dơn kan, nsrôih lĕ n’hâm suan an nău hun hao bah n’gor n’hanh nău rêh nuĭh ƀon lan. Păng lah rjăp nsum mpôl kruanh rđău kan n’gor an ƀư Nghị quyết Đại hội Đảng bộ n’gor, ăp trong tĭng, trong kơl bah Trung ương rong an Khánh Hòa; rdâk njêng tay Đảng bộ kloh uĕh, nâp dăng, rgâl mhe trong mât bôk kan, n’hao nău dơi ƀĭt juet nău kan; rdâk tay nuih n’hâm nănh mĭn, nănh ƀư gay n’hao Khánh Hóa jêng nkual ƀon têh mpeh Trung ương tâm năm 2030.