Lơ 25/11, Rmôt hăn kơl an bah tahen Biên phòng n’gor Dak Lak ndrel rmôt cảnh sát njrăng rdâng nau ŭnh sa ndrel kơl an nau tât khuch mrô 6, Công an n’gor hŏ tât tâm xã n’har bri Buôn Đôn gay kơl an ƀon lan rklaih nau khuch dak lip lơh. Ntơm bah ôi, ăp rmôt hŏ rgum rep ntŭk ntu, rgum lơi dak bŏk, n’hong hoch ăp trong tâm thôn ƀon, kơl an nchuăn leo ndoh ndơ ân ăp rnăk hôm geh nkol; kơl an kônh wa ƀon lan nkra ăp ntŭk gŭ, dăp rgum tay ngih vâl, ăp nhoat đăp mpăn nau rêh jêh lôch dak buk lơh.

Tât rnôk aơ, bar ntŭk nkol tâm tỉnh lộ 1 hŏ geh dơi hăn ro. Ntŭk kan dak si bah xã hŏ khám ndrel pă dak si ân kônh wa geh ntrơn du, nkre ndơn đăp mpăn du hê kon se jê̆ geh nau ji bah ntŭk geh nkol tât săm.  Wa Nguyễn Cảnh Tùng, Kruanh UBND xã Buôn Đôn mbơh, n’gâng kan dôl manh tơm prăk kơl an tâm ăp ntŭk geh ntrơn, nchrăp ân phôi, mung, ndơ dŏng ndrel dak si ân kônh wa. Nchrăp đê̆ nar tât, rnôk rhuăt dak lĕ, nŭih ƀon lan mơ plŏ rep tay ndrel đăp mpăn nau rêh./.