Ăp nar aơ, tâm ăp lŏ bah ăp xã Cư A Thai, Phú Thiện, N’gor Gia Lai, ba ntơm dum. Du đê̆ nkuăl lŏ, ƀon lan manh máy gay rek ân ơm.  Wa Kpă An, rnoi Jrai tâm ƀon Ring Dap, xã Cư A Thai, hăn chop lŏ ri saơ rhơn ngăn yor ba âk.  Wa mbơh rnăk wa geh bơi tât 1 du n’gul ba dak 2 yan, dak tŏ tă bah trong hoch Ayun Hạ, ri ma ăp năm geh nklăp 20 tấn ba:

            ‘Rnôk aơ ƀư ba dak tâm nkuăl aơ, lah knŭng sa tâm rnăk nơm ri rmeh âk ngăn. Jêh geh nkŭp ăp rnoh prăk nơm rvăt phân, dak si puh ndrŭng, nkhôm bu srih, rek...hôm e rnăk vâl nơm sa lôch năm, mô êng tŏng sa ma nơm hôm geh têm ân năm ba kơi, ndrel leo tăch geh tay prăk. Bah năp nơh, ƀư ba mir, mô geh âk ôh. Rnôk aơ, ƀư ba dak rnơm geh trong hoch Ayun Hạ, geh tŏng dak tŏ, nau geh âk lơn. Ntơm rnôk ntrơn tăm ba lŏ, nau rêh ƀon lan geh hơm răm”.

            Tâm neh tăm ba tâm xã Phú Thiện, n’gor Gia Lai, ntŭk heh săk ntơ ‘Phe Phú Thiện’ ntoh lư, nteh máy rek ba tâm ăp ntŭk.  Wa Nay Keng, rnoi Jrai, Kruanh thôn Rbai, xã Phú Thiện mbơh, rnơm geh dak tŏ tă bah trong hoch Ayun Hạ, nŭih ƀon lan hŏ tăm âk ntil tơm, njêng neh tăm tao, bum chin, hât...Bah năp nơh ƀon lan knŭng srih tŏng sa, rnôk aơ hôm tâm rgop ma ntŭk kan gay ma tăm ba kah, geh ntơ ‘Phe Phú Thiện’ ntoh lư ngăn:

            ‘Ntơm rnôk geh nglau hoch dak Ayun Hạ, nau kan tuch tăm bah kônh ư ưa tâm nkual njêng nơih ueh ngăn. Tơm dak tŏ tă bah nglau geh hoch tâm mương hoch tât lŏ, rnơm nê ma kônh wa dơi nchrăp nau srih tăm, mô hôm nsing tâm dak mih kơt ntơm nơh ôh. Ăp yan kŏ geh dak tŏ, ba hao jêng ueh, nau geh ak, mô hôm mô tŏng sa kơt ntơm nơh ôh. Kônh wa mô knŭng tăm geh ba 2 yan tâm năm ma hôm geh nau dơi pơk tay neh tăm, tâm rgop ma tăm hât n’ha, bum chin gay ma n’hao nau geh. Rnơm nê, nau rêh văng sa bah ƀon lan lơn ma đăp mpăn ndrel geh dơi. Trong hoch Ayun Hạ ngăn ngên kơl an kônh wa rgal nau mơng tăm, n’hao nau geh, rgop nau hun hao văng sa an ăp xã”.

            Ayun Hạ lah ngoai tâm ăp ntŭk hoch dak tâm nkuăl Tây Nguyên, kơl tŏ ân rlau 13.500 ha tơm tăm ăp ntil, ngăn lah ba. Ndrel ma ăp ntil mhe, dŏng nau blau kan mhe, ăp năm rlau aơ tơm dak tŏ bah trong hoch Ayun Hạ hŏ rgop nau leo nau dơi tâm ăp xã Phú Thiện, Chư A Thai hao 8 tấn/ha, geh tnŭk hao tât 10 tấn/ha.  Wa Phạm Văn Lượng, bah năp nơh ƀư Bí thư nkuăl uỷ Phú Thiện, rnôk aơ lah Groi Bí thư Đảng uỷ-Kruanh UBND xã Chư A Thai, n’gor Gia Lai mbơh, ba lah tơm tăm tơm khlay tâm xã. Ƀư tĭng nau ntrŭnh bah nkuăl uỷ Phú Thiện (bah năp nơh) mpeh nau dŏng nau kan mhe tâm tuch tăm, rƀŏng tât ndâk săk nto ‘Phe Phú Thiện” ăp năm xã kơl an tơm prăk kơl an ƀon lan, ngăn lah nŭih rnoi mpôl đê̆ pơk hvi neh tăm ba âk. Ntŭk hoch dak Ayun Hạ kŏ rgop nau kơl an ƀon lan rgâl nau mĭn tuch tăm, ngăn lah rnoh mpôl đê̆ ntrơn bah tăm ba nsing tâm dak mih jêng tăm di ntul, geh săk tam:

            ‘Ƀư ueh nau dơi bah ntŭk hoch dak Ayun Hạ, geh dak gay hun hao văng sa, kônh wa hŏ rgum ntrơn rgâl nau kan văng sa. Đah nkuăl Phú Thiện bah năp nơh ri kônh wa ƀư ăp nau kan tâm rgop tăm ba dak leo nsĭt nau geh văng sa âk. Ntơm bah nê, nŭih ƀon lan đăp mpăn nau rêh, ngăn lah kônh wa rnoi Jrai hgŏ leo dŏng âk ntil ba mhe geh nau dơi ndrel rnoh văng sa âk”.

            Ăp lŏ ba dŭm âk nar aơ hŏ leo tât âk nau rhơn ân kônh wa ƀon lan tâm ăp xã Chư A Thai, Ayun Hạ, n’gor Gia Lai ntoh ngăn tă bah nau săk tam ntơm bah geh dak hoch Ayun Hạ. Ntơm bah ntŭk tăm mô jêng, nsing tâm dak mih, ri kônh wa ăp rnoi ta aơ hŏ nchrăp srih tăm 2 yan ba tâm rgop, hun hao tay ntil tơm tăm êng, ăp nhoat leo tât nau săk geh, hao jêng têh ndrŏng. Nau dơi nê kŏ ân saơ nau khlay têh bah nau kan dŏng tuch tăm mhe ndrel dŏng săk tam ăp nau kan bah trong hoch dak tâm hun hao tuch tăm nâp nâl tâm Tây Nguyên./.