VOV4.M’nông: Tâm ăp nar lam dak nkah ndray 76 năm Cách mạng Khay Pham n'hanh Quốc khánh nar 2/9, nô nău nuh srê COVID-19 hôm tât dŭt n'hâm krit nji. Rhơn nđơr tâm nar lễ têh khlay bah neh dak, yơn ƀon lan Tây Nguyên mpư n'hao nuih n'hâm njrăng n'gang nuh srê đŏng. Tâm pă nău dja, wa Y Trớp (rnoi Bu Nong), ta bon Jâng Plây, xã Trường Xuân, nkuâl Dak Song, n'gor Dak Nông lah:

          “Tết đăp mpăn bah neh dak, nar rgum têh bah neh dak. Kônh wa mpôl hên dŭt rhơn nđơr rnôk neh dak nar lơn ma hun hao, nău rêh ƀon lan nar lơn ma dơi n'hao prêh. Yơn lah tă bah nuh srê Covid-19 ƀư an jâng wăng sa -rêh jêng kon nuĭh geh tât khuch. Lơn lah nău rêh bah kônh wa ăp n'gor tơm nuh srê. Gay mât njrăng săk nơm, rnăk wâl n'hanh nsum mpôl lam ƀon lan, kônh wa tâm ƀon tĭng ƀư jăp nău mbơh njrăng lor 5K bah Bộ Y tế, n'hao nuih n'hâm dơn kan. Rnôk geh nău mha êng, nuĭh sĭt bah tơm nuh srê ri mbơh tât nhih pah kan dơi kan dĭl. Mât uĕh nuih n'hâm rŏng dak, kônh wa rgŏ jă rgop bum biăp, njuăl tât ăp n'gor Bình Dương, Đồng Nai, nkual ƀon têh Hồ Chí Minh đah nău ŭch rŏng tâm pă nău jêr jŏt n'hanh nuh srê ơm dơi rlău, ăp nuĭh plơ̆ tay nău rêh kơt ơm".  

          Gay njrăng n’gang srê Covid-19, n’gor Kon Tum lĕ ndâk njêng rlău 2.800 Rmôt pah kan ntŭk gŭ rêh. Ta xă dŭt jêr jŏt Đăk Pxi, nkuăl Đăk Hà, wa Y Dim, Groi Bí thư rnâng kan Đảng ủy xă an gĭt:

“Rnôk bah năp, Đảng bộ n’hanh n’gang kan ƀon lan xă lĕ geh rơh rƀŭn n’hanh mbơh an lĕ rngôch kônh wa mpeh nău klach, jêr jŏt bah srê Covid-19. Tĭng nĕ, ntĭm kônh wa gĭt gay ƀư tĭng ăp trong njrăng n’gang srê tam. Cán bộ rƀŭn ƀon lan, thôn tâm pă ƀa ƀơ mbơh rblang an nuĭh ƀon lan mpeh trong kan njrăng n’gang srê Covid-19. Mpôl hên nkah ntĭnh nuĭh ƀon lan lah geh nău khlay an luh bah dih mâp nuĭh an wăn bok put mbung, rao ty đah xa ƀu rao kaman ngăn lah jêh rnôk mâp đah nuĭh êng gay dêr ntưp rêng chôt srê. Mpôl hên way mbơh nkoch an kônh wa mô an rgum âk nuĭh, mô ƀư ngêt sa...”

          Xã Đạ Sar, nkuâl Lạc Dương, n'gor Lâm Đồng dôl lah nkual đăp mpăn, mô hŏ năl geh du hê nuĭh ntưp nuh srê Covid-19, yơn nuih n'hâm njrăng n'gang nuh srê way dơi n'hao prêh. Wa Liêng Jrang Ha Rô Ky, Kruanh UBND xã Đạ Sar an gĭt, bol ma nău rêh hôm jêr jŏt, yơn kônh wa hŏ rgop ăp ndơ dŏng sa khlay, lơn lah ăp ndơ tuch tăm bum biăp, play do tă bah he nơm ƀư gay njuăl ntop kơl tât nkual an gŭ srang ngai êng lam rêh jêng kon nuĭh:

“Tĭng ƀư nău rđău đă bah n'gor Lâm Đồng tâm ban kơt nkuâl Lạc Dương đŏng mpeh pah kan njrăng n'gang nuh srê, cán bộ ƀon lan ăp rnoi nuĭh xã Đạ Sar mpôl hên du nuih n'hâm tĭng ƀư jăp ăp trong njrăng der nuh srê tâm ban kơt gŭ srang ngai êng lam rêh jêng kon nuĭh. Tâm bar pe pơh rlơ̆ aơ, mpôl hên hŏ njêng ntŭk nking kâp mât njrăng ntŭk mô hŏ geh ntưp mât njrăng ăp nuĭh mha êng lăp tâm nkual gay lor njrăng der nuh srê. Rlău ma râng nău kan gŭ kâp njrăng ta ăp ntŭk nking, kônh wa ta ntŭk mpôl hên uănh tâm nău geh ta rnăk wâl nuĭh geh phe rgop phe, nuĭh geh bum biăp rgop ndrel nsum ti ntop kơl njuăl tât ăp tơm nuh srê dôl an gŭ srang ngai êng lam rêh jêng kon nuĭh tĭng nău ntrŭnh mbrô 16 bah Thủ tướng Chính phủ”.

          Nsing nơm tâm nău rđău kan bah Đảng n’hanh ngih dak njrăng n’gang chôt srê Covid-19 đah nuih n’hâm “Njrăng srê kơt njrăng rlăng:, wa Rmah Chứt (rnoi Bana) ta ƀon Thong A, xă Ia Hrú, nkuăl Chư Pưh, n’gor Gia Lai nkoch:

“Rnôk ntoh srê, kônh wa tĭng uĕh gay njrăng n’gang srê, kônh wa ƀư tĭng 5K. N’gâng kan xă, thôn ƀa ƀơ nkah ntĭnh kônh wa njrăng n’gang srê. Kônh wa mpŏng srê mbra ngăch lĕ, kônh wa dơi hun hao wăng sa plơ̆ tay. Gâp ŭch lĕ rnoi mpôl he ndrel du nuih n’hâm gay chôt srê ơm rlău. Dăn an kônh wa he dôl gŭ ta nkual srê mât njrăng uĕh an săk soan”.

Nuĭh rblang: Điểu Thân n'hanh Y Sưng