VOV4.M’nông: Bol ma rven tâm jâng, yơn yuh H’Yar Kbuôr tâm nkuăl Krông Ana, n’gor Dak Lak hôm nsôih rlet nau jêr, ndâk nau kan đah nau tanh njuh ndrel kchoh nah ao ơm. Yuh hôm râng nau kan yor rmôt bu ur ăp gưl ƀư, dâk bôk jrâu ntĭm nti tanh njuh gay ma mât nau ơm bah rnoi nơm.

Du nar bôk khay 7, ngih yuh H’Yar Kbuôr (vay kuăl lah Amĭ Ru mi) ta ƀon Kla, xã Dray Sáp, nkuăl Krông Ana, n’gor Dak Lak jêng khuh n’gôr lơn rnôk nŭih bu tât ntuh kơl tât ngih yuh gay ma pă ndrel nglăp, ntĭm nau dŏng máy vắt sổ. Aơ lah ndơ nkhôm bah Giải khuyến khích geh ntơ lah “yơng kon ntil” ma yuh H’Yar hŏ geh dơi tâm rnôk râng nau tâm rlong Bu ur ndâk nau blau kan mhe 2021 yor rmôt Bu ur n’gor Dak Lak ƀư. Wa Nguyễn Thị Thu Nguyệt, Kruanh rmôt kan bu ur n’gor Dak Lak, kruanh rnâng kan ƀư rơh tâm rlong mbơh, rnâng kan rnê prêh ngăn nau kan bah yuh H’Yar mô knŭng nau ueh nâp ndrel nau ueh bah ndơ ƀư, ma hôm lah yor nau nsôih bah săk yuh tât đah nau tâm rlong aơ:

‘Âk nŭih tât tma rlong lah bu ur mô geh nau dơi dăng tâm nê, nŭih lah bu ur rnoi mpôl đê̆, âk nŭih geh rven tâm săk kŏ jang hăn râng tâm rlong đŏng, tâm dăch ma ndơ nơm ƀư mpeh nau ueh ơm bah rnoi nơm, ntoh nau mĭn, nau ŭch gay ma bôk nau kan kŏ kơt lah ntil ndơ bah nơm geh tăch âk ndrel đăp mpăn tâm rnôk hun hao jêh aơ”.

Tâm nar tâm rlong, ndrel ma nau nkhôm dơi geh pă, yuh H’Yar hôm geh nthoi đah du đê̆ ntŭk kan ndrel geh tay nau dơi gay ma pơk hvi nau nkra, n’hao nau nâp ndơ tanh bah nơm. Tĭng nô Phạm Thanh Tuấn, nŭih ndâk Công ty xã hội Bồ Công Anh, nŭih tâm rmôt săk rơh tâm rlong, bôk nau ƀư kan bah yuh H’Yar mra geh kơl an jong lơn jêng du ntrong ntơm bah rnôk nkra ân tât rnôk tăch. Đah nkô̆ nau ŭch lah ndơ bah yuh geh tâm dăch ueh lơn đah ăp nŭih, kơl yuh H’Yar geh dơi rêh ma nau kan ndrel prêh lơn lah dơi nthoi đah ăp oh nur êng tâm nkuăl njêng nau ƀư tuch tăm, pa ưkan pah ân âk nŭih tanh njuh êng êng:

‘Rnâng kan ƀư nau tâm nthoi ma ăp nŭih ntuh kơl kơl an ân yuh ndơ gay ma ê nkra ndrel ăp tơm, rgum rvăt ăp ntil ndơ bah yuh jêh lôch tanh. Ndrel ma jêh rnôk lĕ ndơ tanh, uănh rnoh dĭng lĕ rnoh ntuh kơl nê ri dĭng ndŏ ndơ hôm e ri lah ndơ yuh nơm. Phung hên kŏ dăn ton lah mra hăn nsum ma yuh ndrel kơl an mô êng đah yuh ma hôm đah ăp nŭih bu ur tanh njuh êng êng, lah săk gâp ăp nŭih tanh njuh, khân păng rêh ma nau kan ƀât lor. Bah nau kan khân păng dơi tanh njuh, phung hên ntuh kơl lor ndơ gay ma tanh, rvăt ndơ khân păng jêh tanh ndrel ma tăch ndơ ân khân păng, nkra ăp ntil ndơ tanh ân ueh tâm di ma nau ŭch dŏng rnôk aơ”.

Tĭng yuh H’Mên Apuôr, Groi Ktuanh rmôt kan bu ur xã Dray Sáp, nkuăl krông Ana nkoch, bol ma geh rven tâm jâng geh tă bah rnôk yuh ji kop rven ntơm bah kon se, yơn yuh H’Yar mro gơih ndrel geh âk nau nsôih tâm nau rêh. Rnôk geh nau tâm rlong tâm xã, nkuăl ƀư, yuh kŏ dăn râng nau tanh njuh ndrel geh nau nkhôm. Yuh hôm râng nau nkoch mbơh nau nti tanh bah ăp jrâu yor bu ur pơk, mô lah geh jă hăn nti tâm nkuăl Buôn Đôn. Yuh H’Yar kŏ lah ngoai tâm rnoh nŭih blau âk ntil ndơ kao cheh bah rnoi Rđe ndrel tanh êng ăp ntil ndơ tanh ueh. Yuh hôm blau koh ndrel kchoh nah ao ndrle pơk êng ntŭk tanh, kchoh nah ao êng tâm ngih gay ma geh prăk rong săk nơm ndrel ma rnăk vâl:

‘Phung hên saơ lah bol ma geh rven tâm jâng yơn yuh H’Yar geh nau nsôih ngăn tâm âk nau kan. Nau rêh bah yuh bol ma geh âk nau jêr rnôk ƀư me rong êng kon. Bol ma jâng mô ueh kơt bu êng yơn nau nsôih bah yuh lah nau ueh ngăn, yuh mô geh nau dun bah nau kan, mô kâp rnơm tâm bu êng ma nsôih pah êng đah nuih n’hâm nơm”.

Yuh H’Yar Kbuôr nkoch, đah yuh, tanh njuh lah nau ŭch ngăn gay ma nthoi nau tanh tă bah U ndrel mê̆ yuh. Ntơm rnôk 10 năm yuh hŏ ŭch ndrel ma ytanh êng ân nơm nah, ao, phôi ntâk. Mô dơi tĭng ăp băl păng pâl mô lah hăn kan, yuh rvăt êng săm ƀŭt gay ma kơt tĭng nti kchoh ân nơm gay ma geh nau kan rong êng săk. Bah bơi tât 25 năm yuh hŏ hŏ pơk êng ntŭk kchoh nah ao ndrel geh âk kônh wa bu tât kơl an, joi tât kchoh ndơ. Jêh nau tâm rlong, ndơ bah yuh geh âk bu gĭt tât ri ma yuh geh bu rvăt âk lơn. Ndrel ma nê, nau ton bah nŭih ntuh kơl kơl an yuh geh tay âk ndơ, blau nau nkra mhe. Rnơm ri mô êng nau văng sa ma nau blau kan bah yuh kŏ blau lơn:

‘Gâp saơ rhơn ngăn đah ăp ntil ndơ geh ntuh kơl ân jăp, mhe lơn, máy dơi nchuăt ma điện ri mra geh ƀư ngăch lơn, tă bah nê kơl an gâp geh nkra tay âk ntil nah ao, hun hao nau kan bah săk gâp ndrel geh tay nau kơlo an ăp oh nur êng. Gâp kŏ ŭch geh tay nŭih kơl an, kơl ân nơm tâm rnôk ê nkra, njêng ndơ, ŭch geh tay 2 nŭih bu ur ndrel râng ri nau kan mra ngăch lơn, tŏng dơi nau ŭch bah năch ri rnoh ndơ mra âk lơn”.

Bol ma jâng mô ueh, săk jăn mô dăng, yơn nau nsôih ndrel nuih n’hâm n’hâm ƀư nau kan bah yuh, yuh H’Yar hŏ nsôih rlet rlau tâm nau rêh, njêng ân nơm du nau kan gay ma dơi rong rêh săk jăn ndrel ma rnăk vâl. Săk yuh hôm nsôuh nti nau kan tanh njuh, nkra tay nah, ao ueh mhe đah njuh, rgop nau tâm nau kan mât nau vay ơm ueh bah rnoi nơm./.

Nŭih rblang: H’Thi