VOV4.M’nông: Tă lah ntŭk srê âk ngăn n’gor Dak Lak, đah 51 nuĭh F0, aƀaơ hin Ea Bhok, xă Bhok, nkuăl Cư Kuin lĕ rlău 25 nar mô geh nuĭh ntưp mhe. Lĕ rngôch F1 lĕ jêh nar nkhah êng n’hanh lĕ geh 44 nuĭh ji dơi sĭt. Nău rêh bah nuĭh ƀon lan Ea Bhok dôl plơ̆ tay đah ăp nău rêh nău kan ăp nar.

          Ut n’ha mbo an ndrôk sa, wa Y Doen Mlô, ta ƀon Ea Bhok, xă Ea Bhok, nkuăl Cư Kuin, n’gor Dak Lak lŏ nchrăp hăn chom ba lŏ. Ăp nău kan aơ mhe plơ̆ tay đah wa Y Doen Mlô geh 1 pơh aơ. Bah năp nĕ, tâm dŭt khay 7, rnăk wâl wa geh 9 nuĭh lah ntưp Covid-19 da dê; geh 2 ur sai wa Y Doen Mlô ndrel 3 nuĭh kon n’hanh 4 sau. Tât aƀaơ knŭng hôm ur sai wa dôl săm ji, 8 nuĭh nkhah êng ta jay jêh rnôk sĭt ngih dak si.

          “Sĭt đah rnăk wâl saơ răm ngăn, săk soan bah nơm lŏ nâm ơm. Lŏ mir, sŭr ndrôk geh nuĭh kơl, mât chăm an, gâp plơ̆ sĭt gâp saơ uĕh, lŏ mir dôl luh mbôn hôm gâp lah uĕh đŏng”.

Wa Y Doen Mlô plơ̆ tay nău kan ăp nar jêh săm ji Covid-19

          Kơt wa Y Doen Mlô đŏng, wa H’ Noen Ksor jêng nuĭh ji Covid-19 tâm nar 27/7 rnôk mâp êp đah nuĭh ƀon lan lah F0 ta thôn. 5 nuĭh êng tâm rnăk wâl bah wa jêng F1 n’hanh hăn nkhah rgum 21 nar. Plơ̆ tay nău rêh nâm ơm jêh 1 khay n’gul săm n’hanh nkhah êng yor Covid-19, wa H’Noen Ksor gĭt wât lơn mpeh nău khlay bah nău rêh n’hanh wât lơn tâm nău njrăng n’gang srê:

          “Nai dak si ntĭnh rnôk sĭt jay, mô dơi hăn bah dih knŭng gŭ tâm jay dơm, mô dơi mâp đah nuĭh êng, n’ăp oh kon tâm jay, nkhah êng piăng trau sa dak ngê kon sau tâm wâl n’gôn jêh nĕ djôt an gâp, đêt nar bah kơi rnôk sĭt jay dơi nai dak si tât but uănh. Aƀaơ ngăch hôm, bu an hăn xă ƀư sam ƀŭt dơi an hăn nsong, hăn luh tâm mir. Aƀaơ gâp mư janh hăn bah dih gay ƀư sam ƀŭt, hôm bah sa ơm gâp mô janh hăn luh bah dih. Aƀaơ gâp saơ lĕ ngăch dăng ngăn. Gâp dăn lah uĕh tât ăp nai dak si lĕ dŭt n’hâm săm ji an gâp”.

          Wa Đào Huy Cường, kruanh ƀon Ea Bhok an gĭt, nar 19/7, rnôk ƀon saơ nuĭh ji bôk năp lah nuĭh ƀon lan tâm ƀon plơ̆ sĭt bah n’gor Bình Dương, knŭng jêh 3 nar, rnoh nuĭh ji lĕ hao 36 nuĭh; n’hanh jêh 10 nar, lam ƀon kơp dơn 51 nuĭh. 70 rnăk geh khuch yor geh nuĭh lah F0 n’hanh F1. Gay nchrăp an ntrôl rŭch srê Covid-19, âk trong mkra dŭt n’hâm n’hâm dơi n’gâng kan ƀon lan ƀư kơt: nchăng n’gang lam ƀon Ea Bhok, kơt dĭng ntĭm đă 16 ta lam xă. Ndrel đah nĕ, trong kan nău rêh nuĭh ƀon lan dơi ntop kơl ngăch, đăp mpăn mô an geh rnăk ji ngot, moh rnăk mô tŏng sa tâm nar ƀon ƀư tĭng nchăng n’gang gay nkhĭt rdêl srê.

Wa H’Noen Ksor ndrel kon sau hăn rek ba

Tĭng wa Đào Huy Cường, kruanh ƀon Ea Bhok, knơm nău du nuih n’hâm bah nuĭh ƀon lan, nău lăp dŭt n’hâm bah n’gâng kan ƀon lan, tât aƀaơ, ƀon Ea Bhok lĕ rlău 25 nar mô saơ geh nuĭh mhe, 44 nuĭh ji Covid-19 lĕ dơi sĭt n’hanh jêh nar nkhah êng jêh săm ji. Ăp ntŭk nchăng n’gang srê dơi rơih jăng, nău rêh bah nuĭh ƀon lan lĕ plơ̆ tay nâm ơm.

          “Aƀaơ ntơm nău rêh plơ̆ tay ri mhe aơ lĕ dơn geh nău mbơh bah ntrŭk ntrŭt nsôr pah kan xă mpeh nău ntop kơl an kônh wa du đêt kỹ thuật mkra kop ji an tơm tăm lŏ mir jêh nar jong nơm mô dơi hăn mkra. Geh du trong ntĭm na nê̆ tĭng ntil dak si săm an ntil dak si nĕ an ba, cà phê, an tiêu gay kônh wa nsrôih hăn nkra njêng an săk geh âk ngăn gay dêr khuch an kônh wa”.

          Wa Nguyễn Văn Dũng, Kruanh UBND xă Ea Bhok, nkuăl Cư Kuin, n’gor Dak Lak an gĭt: ndrel đah nău ntop kơl kônh wa njrăng n’gang tu ndrŭng bu tuh, ndâk nkra tay lŏ mir tâm nar ƀon geh nchăng n’gang, n’gâng kan xă kuăl jă ăp nuĭh lŏng bôk tôr an ndơ sông sa, ndơ sa an ăp rnăk ach o, rnăk geh khuch yor srê Covid-19 gay khân pơng ơm đăp mpăn nău rêh. Ăp nău kơl ntop an dơi ƀon lan ƀư ngăch.

Nău rêh nâm ơm lĕ plơ̆ tay đah ƀon Ea Bhok

“Xă lĕ tâm ôp tâm nchră dăn Nkuăl ủy, Ủy ban ntop kơl ăp nuĭh F0 kơt nĕ lah 10 kg phe, F1 đah ƀon lan 5kg. Ăp nuĭh pah kan dah rŏng sĭt ƀon lan ri xă dôl ƀư tĭng Nghị quyết 68 gay ơm an kônh wa ngăch geh prăk gay kônh wa ƀư sa tay ta ntŭk n’hanh nkoch trêng an kônh wa mô thơ tha, ƀư tĭng uĕh nău ntĭm đă 5K bah N’gâng kan dak si”.

Bah du ntŭk srê Covid-19 têh bôk năp bah n’gor Dak Lak, n’gâng kan n’hanh nău kan dơi kan ƀư ăp trong nkhĭt rdêl srê dŭt n’hâm, ngăch, tât aƀaơ nău rêh bah nuĭh ƀon lan ta ƀon Ea Bhok, xă Ea Bhok, nkuăl Chư Kuin dôl mbrơi mbrơi plơ̆ tay nâm ơm. Yơn lah, bah năp nu nău srê Covid-19 geh jêr jŏt tay, kônh wa mô dơi thơ tha ma an tĭng rjăp ăp nău ntrŭnh njrăng, n’gang srê.

          Nuĭh rblang: Y Sưng Phê Ja