VOV4.M’nông: Mhe aơ, ntoh ngơi ta nar mâp, pah kan đah 70 nuĭh khoa học; ăp giáo sư, nai dak si; kruanh, kruanh ăp ngih dak si, ngih sam ƀŭt đại học, ntŭk gŭ mĭn njêng nău kan dak si dược học; ntoh măt ăp hội đồng khoa học n’hanh ngih pah kan mât uănh nău kan dak si, Thủ tướng Chính phủ Phạm Minh Chính lah rjăp: nău rgop dŭt khlay bah nău kan dak si tâm nău mât uănh săk soan bah nuĭh ƀon lan. Đảng, Ngih dak n’hanh nuĭh ƀon lan lah uĕh rmôt khoa học nău kan dak si tă bah ăp rơh, ngăn lah tâm chôt srê Covid-19.

Pơk bôk rơh mâp măt, Thủ tướng nkoch lah uĕh, nkre ŭch djăt, rgum ăp nău rgop nkra rgâl an di. Rlău ma nău khlay, Thủ tướng dŭt ŭch ăp nai dak si ăp yơ, ăp nuĭh khoa học gĭt blău ơm tâm nchăng n’gang srê mĭn njêng, ê nkra ăp ntil dak si, vaccine njrăng n’gang Covid-19, tĭng nkô̆ nău nĕ he tâm ban ŭch geh trong mkra di gay ntrôl rŭch Covid-19. Thủ tướng ŭch ăp nuĭh khoa học an lĕ mông nar an tâm rgop.

Ta rơh rƀŭn, âk nuĭh khoa học ntoh ngơi rgop nău n’hanh nkoch nău rngot dơn geh nău uănh, tâm pă bah Đảng, Ngih dak n’hanh nuĭh ƀon lan; nkoch nău dŭt n’hâm nsơr an nău kan dak si ngih dak, ngăn lah tâm rnôk chôt srê Covid-19 aƀaơ hin, âk nuĭh khoa học dôl geh âk nău rgop uĕh tâm trong kan nchăng n’gang srê. Ăp nuĭh khoa học mbơh an Thủ tướng Chính phủ ăp nău nsrôih, nău mĭn ƀư mhe tâm nău n’hao tam săk rnglăy trong kan uănh năl, nkhah joi ăp F0, F1, mât njrăng nkual mô geh ntưp n’hanh săm ăp nuĭh ji F0 n’hanh ndơ̆ du đêt nău dăn đă, gay n’hao tam trong kan njrăng n’gang srê. GS.TS Nguyễn Thanh Bình Kruanh Hội đồng Ngih sam ƀŭt Đại học Dược Hà Nội an lah an ƀư tĭng rjăp gay ăp trong ma chính phủ n’gluh an.

“Mpeh trong kan têh ma he lĕ kơt dŏng bah ntĭm rđău bâh Chính phủ, N’gâng kan dak si mpôl hên an lah dŭt di n’hanh tâm trŭp, he lĕ rgum an njrăng n’gang srê n’hanh săm ji; njrăng n’gang srê he geh nkhah êng, 5k, he lĕ kơt dŏng hôm. He geh vaccine lĕ ƀư; săm ji he geh dak si”.

PGS.TS Lê Văn Truyền Kruanh hội đồng tư vấn pă an sam ƀŭt tăch dŏng dak si, ndơ ƀư dak si ri an lah he an rgŏ jă rmôt ăp công ty nkra njêng dak si tâm dak rgum nkra njêng dak si săm Covid-19.

He an rgŏ jă công nghiệp dak si tâm dak he geh bơi 300 ngih măy, nsrôih joi ndơ ê nkra dak si săm Covid-19 lĕ dơi lam ntŭr neh kơp dơn”.

Ntoh ngơi n’glôn jêh rơh rƀŭn, Thủ tướng Phạm Minh Chính lah rjăp 2 nkô̆ nău lah nău rgop bah ăp nuĭh khoa học nău kan dak si đah nău mât njrăng, mât uănh săk soan Nuĭh ƀon lan n’hanh rgop an ăp nău nsrôih njrăng n’gang Covid-19 ta dak he. Thủ tướng an lah nău rgop dŭt têh khlay bah nău kan dak si trong kan nchăng n’gang srê Covid-19 ta dak he tâm bơi 2 năm bah năp. Thủ tướng an gĭt, nkô̆ nău khlay gay he ntrôl rŭch, lơh dăng chôt srê rgop joi 3 nkô̆ nău khlay: Nău nsrôih dŭt n’hâm bah lĕ trong chính trị; Nău tâm ban nuih n’hâm bah nuĭh ƀon lan; Kơt dŏng ăp trong khoa học nchăng n’gang srê, njrăng n’gang đah vaccine n’hanh ăp trong săm ndrel đah dak si. Nău kan dak si lah tơm khlay tâm trong njrăng n’gang srê đah trong khoa học nchăng n’gang srê, rgop an mĭn njêng, nkra njêng vaccine n’hanh dak si săm ji n’hanh rgop đah săm ji.

Thủ tướng ntĭm kloh, gay lơh dơi srê Covid-19 lah êng n’hanh srê lah nsum, rlău ma khlay dŭt n’hâm, Chính phủ an nsrôih, dŭt n’hâm lơn bah rmôt ăp nuĭh way kan, nuĭh khoa học gay hun hao y học Việt Nam hun hao du njoăt prêh mhe. Tâm nĕ an năl na nê̆ y học bah he jâng y học khoa học, rnoi mpôl, lĕ ƀon lan, yor nuĭh ƀon lan rhŏ kan; dak si nchrăp njrăng lah khlay, dak si bah dâng lah khlay đŏng; dak si jru lăp ndrel n’hanh tâm ban đah dak si ntŭk gŭ rêh; tâm rgop y học cổ truyền đah y học mhe, quân y tâm rgop đah dân y, dak si tâm dak rgop đah dak si dak bah dih. Đah rmôt nuĭh khoa học, Thủ tướng đă:

Ta năp nu nău khar mpêt vaccine n’hanh dak si săm Covid-19 aƀaơ ri dăn đă ăp nuĭh khoa học, ăp nuĭh way kan dŏng dŭt n’hâm tâm rgop đah ăp nuĭh khoa học, ăp rmôt kan khoa học ta lam ntŭr neh gay joi ăp vaccine, dak si săm Covid-19 an Việt Nam n’hanh ntĭm but uănh săm ji Covid-19 an nuĭh ƀon lan tă bah ăp trong mbơh nkoch nău nsum”.

Lơn lah tâm trong kan nkoch trêng Thủ tướng đă, ăp nuĭh way kan, ăp nuĭh khoa học an ntop kơl nsum mpôl gay mbơh di na nê̆, khoa học mpeh ăp trong nchăng n’gang srê.

“Ăp nuĭh way kan, ăp nuĭh khoa học mât uĕh lơn tay nău ƀư n’hanh nsing nơm bah nơm ntop kơl nsum mpôl ăp nău mbơh nkoch trêng gay rblang jru hvi, rblang kloh đah nuĭh ƀon lan mpeh ăp trong uănh khoa học geh âk trong njrăng n’gang srê bah he, nău aơ mô dơi geh nuĭh lah di ăp nai ăp yơ. Gâp dŭt ŭch ăp nai m’hâm ƀư an ƀon lan gĭt. Tal 2 lah n’hâm ƀư an ƀon lan wât, tal 3 m’hâm ƀư an ƀon lan nsing knơm. Tal 4 m’hâm ƀư an ƀon lan kơl tĭng, tal 5 lah ƀon lan hăn ndrel ƀư. 5 nău aơ dăn đă ăp nai lĕ ndrel ƀư hôm, dôl ƀư hôm, mpŏng ăp nai ƀư âk lơn têh dăng lơn”.

Thủ tướng mpŏng ăp nuĭh, nsum mpôl ăp nuĭh way kan, nuĭh khoa học tâm nău kan dak si tâm n’hanh bah dih dak, mât uĕh nău way ơm jŏ năm n’hanh đah nău blău ơm, nău nuih n’hâm, nău kan ndrel soan, ndrel nuih n’hâm, đah ăp nău ƀư ngăn, săk rnglăy, ndrel lĕ lam dak lơh dăng chôt srê Covid-19, mât njrăng nău rêh, săk soan an Nuĭh ƀon lan, ơm ndơ̆  nău rêh plơ̆ tay nâm ơm n’hanh rdâk hao, hun hao wăng sa rêh jêng.

                              Nuĭh rblang: Y Sưng Phê Ja