VOV4.M’nông: Tâm rơh ntoh srê Covid-19 rơh tal 4 aơ, Dak Lak lĕ kơp dơn rlău 1.300 nuĭh ji Covid-19, lah n’gor geh rnoh nuĭh ji âk ngăn nkual Tây Nguyên. Rnoh nuĭh hao ndal, mbak jâk tâm trong dak si nar lơ âk ri ăp du hê nai dak si, y, nai dak si an rdâng âk nău jêr êng êng. Yơn ta ta ntŭk kan, khân pơng dôl rgum soan gay tâm rlong đah mong nar rgop ntrôl rŭch chôt srê. Âk nuĭh lĕ ntlơi nău ŭch êng nơm gay lôch uĕh nău kan bah nơm.

          Ta nkual nkhah êng Ntŭk ntĭm nti mât njrăng bri dak rnă njrăng Ngih sam ƀŭt Đại học Tây Nguyên, du nsưng ƀư brah mhe dơi ƀư gay yuh Trần Thị Hương (deh năm 1983) lah nuĭh kan mât uănh săm nuĭh ji ta Ngih dak si Y học cổ truyền Dak Lak dôl ƀư nău kan ta aơ kuh mbah nuĭh mbơ̆ lĕ roh nar 1/9. Hoch dak măt rnôk yuh knŭng dơi kuh mbah huêng phan mbơ̆ bah ngai; Rup ndah bah ngai; Rup gui khĭt ta ƀon tơm Nam Định knŭng dơi saơ tă bah zalo ta rup tâm điện thoại. Yuh Hương mpŏng lah, srê Covid-19 ơm dơi ntrôl rŭch gay yuh dơi sĭt ƀon tơm mpoh nhang ta môch mbơ̆:

          “Khay ru nti mhe rlău gâp geh nău nchrăp ndơ̆ kon sau sĭt gay răm đah u che yor u che âk năm hôm, yơn yor srê mô dơi sĭt, aƀaơ che lĕ roh ndal tay jêng nău tâm mâp mô dơi ƀư tĭng. Mpŏng ŭch lah ăp nuĭh ndrel ty gay ntrôl rŭch srê gay gâp dơi sĭt ƀon tơm su nhang an mbơ̆”.

Bah nkual nkhah êng rgum, yuh Trần Thị Hương mpoh nhang kuh mbah bơ̆ lĕ roh

15 năm pah kan ta Khoa Xét nghiệm-Chẩn đoán hình ảnh-Thăm dò chức năng bah Ntŭk uănh nđôi kop ji n’gor Dak Lak, yuh Nguyễn Thị Kim Tuyền lĕ rdâng đah âk ntil srê ta nuĭh. Yơn an tât rnôk nuĭh bah rmôt joi chôt srê mrô 3, lah rmôt n’gâng tơm hăn lor tâm nău njrăng n’gang srê Covid-19 yuh mư wât lĕ ăp nău jêr jŏt, klach lơn n’hanh n’ăp nău rôih soan rnôk hăn ƀư nău kan.

Yuh Tuyền an gĭt, rlău 3 khay bah năp, rnôk srê Covid-19 ta Dak Lak geh nu nău jêr jŏt, bôl ơm măng, rnôk ntŭk geh nuĭh ji lah rmôt bah yuh lŏ hăn trong gay joi chôt srê. Bôl ƀư kan măng nar tâm bok ao nchrôm n’gang lam săk jăn, yơn mĭn nău sŏk ndơ uănh năl geh nkô̆ nău khlay tât trong kan njrăng n’gang srê, jêng ăp yuh an ndăn tĭng mông, tĭng mnĭt gay jêh nău kan du trong ngăch ngăn. Nău rêh êng nơm, nău ƀư ur, ƀư mê̆ an gŭ bah kơi tay.

          “Ngăch mông nar ri ndôt ndal geh rnôk ôi, geh rnôk ƀư kan tât măng, n’gul măng. Rnôk jêh kan lĕ mông mơ sa, âk tơ̆ 1-2 mông ôi mư sa, sa jăch dơm. Ôi nar bah kơi geh mông gâm n’gôn mô geh he sa ƀănh mì mô lah ngêt dak. Aƀaơ geh Zalo, he kuăl, he uănh sa rup bah kon dơm mô gĭt mhâm ƀư. Ŭch mât njrăng an kon đah sai ri he an ƀư kơt nĕ dơm, yor nău kan tay”.

Ăp y, nai dak si ta nkual săm nuĭh ji Covid-19 mbăn dôl nsrôih sŏk pit nău rêh an nuĭh ji

          Bah nar 15/8, rnôk Khoa Truyền nhiễm bah Ngih dak si Đa khoa nkual Tây Nguyên dơi rgâl jêng nkual săm ji Covid-19 mbăn bah nkual Tây Nguyên, 21 nuĭh geh nuĭh kan si, nai dak si, nuĭh mât uănh săm ji, hộ lý n’hanh kỹ thuật viên lĕ pah kan rlău âk tơ̆ gay kơl ăp nuĭh ji dơi geh tay nău rêh.

Nai dak si chuyên khoa 2 Trịnh Hồng Nhựt, kruanh Khoa hồi sức tích cực chống độc, mât uănh nkual săm nuĭh ji Covid-19 mbăn ta Ngih dak si Đa khoa nkual Tây Nguyên an gĭt ăp nuĭh ji leo ta aơ geh âk nău ji ơm n’hanh mbăn khĭt hô. N’har đah n’gul khĭt n’gul rêh n’hanh nău khĭt dŭt đêt, ăp y nai dak si bah nkual săm nuĭh ji Covid-19 mbăn nsrôih tĭng mnĭt, tĭng mông nsrôih lơh dăng tâm nău kan aơ:

Nguyễn Thị Kim Tuyền dôl sŏk ndơ uănh năl an ăp nuĭh F1 ta nkuăl Krông Ana

“Mpôl hên joi ăp trong gay n’ăp nău rêh n’ăp n’hâm soan, n’ăp nău gĭt blău way kan, n’ăp nuih n’hâm bah nai dak si gay tâm pit tĭng mông tĭng mnĭt n’hanh nar đah nău rêh bah nuĭh ji ta năp nău khĭt nuĭh”.

Nău kan njrăng n’gang tay chôt srê Covid-19 hôm e jong n’hanh âk nău jêr jŏt, ăp tahen ta ntŭk bôk năp njrăng n’gang srê ta Dak Lak n’hao prêh mro nuih n’hâm, têh janh, măng nar joi nuĭh chôt srê, mât uănh, njrăng n’gang nău rêh bah nuĭh ji n’hanh nuĭh ƀon lan. Khân pơng lah ăp nuĭh janh dăng rôih soan êng ta ntŭk kan mô geh nteh phao”.

          Nuĭh rblang: Y Sưng Phê Ja