`VOV4.M’nông: Tĭng nau kơp bah ntŭk kan tuch tăm, n’gor Dak Lak rnôk aơ geh tât 62 ntŭk nglau n’gâr dak geh djơh khuch ân geh ntuh kơl nkra nâp. Bah năp nau aơ, tâm yan mih dak lip, ăp rmôt kan, nkuăl bah n’gor Dak Lak dôl ma rgum nau kan 4 ta ntŭk gay ma mât đăp mpăn ân nglau dak ndrel mpeh ba dâng.

            Ntơm bôk khay 9 tât rnôk aơ, ntŭk nglau n’gâr dak Ea Đrăng, tâm nkuăl têh Ea Đrăng, nkuăl Ea H’Leo, n’gor Dak Lak, geh tât nau pơk dak ơm gay ma rdâng phŭt. Wa Nguyễn Văn Hiếu, Giám đốc ntŭk kan Công ty TNHH du ntŭk kan mât trong pă dak Dak Lak tâm nkuăl Ea H’Leo mbơh, rhuăt nau tă blau nau kan tă bah nau khuch lip nglau, lip băm tâm mpeh ba dâng năm 2013 yor geh nau khuch bah nglau, ri tâm yan mih, rmôt kan hŏ pă nŭih kâp njrăng tâm măng nar tâm ntŭk gay ma pă dak, đăp mpăn ân ƀon lan tâm nkuăl Ea Đrăng:

            “Nau dôl geh bah ntŭk n’gâr dak aơ ri mpeh ba dâng păng tât 58,6 km2 ma nau dơi n’gâr dak knŭng 1,217 rkeh khối, ri nsing tâm nau mbơh bah mih nar ri ntŭk kan mra pă n’hoch dak mhâm ƀư ân tâm di. Rnôk aơ, lah n’hoch lơ nklăp 30-40m2/giây ri nglip ngăn mir tăm byăp bah ƀon lan, ri lah tĭng au ngăn kơt nê ri ntŭk kan hên ân geh n’hoch jur dêh gay ma ndơn nau vơt bah dak lip tâm mpeh ba lơ hoch tât, der nau khuch tât ƀon lan”.

            Tĭng nau uănh nau tât bah mih, pă nŭih mât uănh tâm ăp ntŭk dôl geh kâp njrăng, đah nau kan 4 ta ntŭk, ăp nkuăl, ăp rmôt kan mât ntŭk trong dak lip hoch tâm n’gor Dak Lak dôl nchrăp ƀư ăp nau kan đăp mpăn nglau dak tâm yan mih dak lip. Wa Trịnh Văn Quang, mât ntŭk hoch dak nglau ƀon Pu Huê, mbơh, nglau rdâng dak bah ntŭk kan geh tâm rgop ƀư jêng trong hăn, tâm trong bah xã Ea Ktur, Cư Wi, Ea Hu bah nkuăl Cư Kuin. Yơn mô geh nkra ân păng ler luh. Nau aơ ƀư nglau Pu Huê mro rdâng đah nau roh đăp mpăn lah rnôk geh mih dak lip:

            ‘Nau ngăch bah ntrong hoch dak tâm rgop nsum ma nau n’hoch leo dak dôl ma rmeh aơ ri mô geh đăp mpăn ôh nau n’hoch lơi dak lip, ri ma dak mô dơi n’hoch ngăn ri ân păng hoch ler bah trong hăn, ƀư roh nau đăp mpăn tâm ntuưk n’gâr dak, ngăn lah mô geh đăp mpăn ân nŭih hăn ro tâm trong aơ. Tâm yan mih phŭt ri phung hên ƀư rjăp nau kan hŏ geh ân ƀư, lah rnôk geh nau mbơh mih dak lip ri ân geh đă nŭih kâp njrăng tâm 2 trong hăn ndrel pă trong hăn, lah geh nau tât mô ueh ân geh nau đăp mpăn ueh ngăn. Kŏ ŭch tâm rơh tât ăp gưl kan uănh mĭn gay geh nau kan n’hao nau nkra mhe nau ntuh kơl ân đăp mpăn ân ntŭk kŏ kơt lah đăp mpăn ân ăp ntrong hăn bah ăp xã aơ”.

            Tĭng nau mbơh bah N’gâng kan tuch tăm ndrel hun hao ƀon lan n’gor Dak Lak, lam n’gor rnôk aơ geh 785 ntŭk hoch dak, kơl an nau tŏ ân rlau 262 rbăn ha tơm tăm ăp ntil (tâm ban nklăp 82% rnoh neh tơm si kâp tŏ). Gay đăp mpăn bah năp yan mih, n’gor kơp, nkra năn 18 ntŭk n’gâr dak mô nâp, geh nau khuch. Yơn lah, rnôk aơ nkuăl geh tât 62 nglau n’gâr dak geh nau khuch ân geh nkra đah rnoh prăk rlau 360 rmen.

            Tĭng wa Nguyễn Thành Long, Kruanh n’gâng kan mât trong hoch dak Dak Lak, yor tơm prăk mô âk, nau nkra mhe nglau n’gâr dak ân geh dăn Trung ương kơl an, ri ma nau kan bôk năp gay đăp mpăn ân ăp nglau dak bah năp yan mih lah nau kan ân geh ƀư ân nâp tĭng nau kan 4 ta ntŭk, nchră nkra tă bah tâm dâng:

            ‘Đah ăp rmôt mât nau kan leo sŏk dŏng ri ân geh nchrăp pă tơm prăk gay ma nkra lor, ngăn lah ăp ntil ndơ dôl ma geh djơh, mô hôm nâp, roh đăp mpăn nơm ân geh nkra nkre. Tal bar lah tâm yan mih dak lip ri ân geh đă nŭih kâp mât njrăng tâm măng nar, lah pơk dak ri ân geh mbơh lor ân ƀon lan gĭt. Êng nê ri ân geh uănh n’hêl nau kan mât đăp mpăn ntŭk, mbơh ân năn ân n’gâng kan tâm nkuăl kŏ kơt lah N’gâng kan tuch tăm ndrel hun hao ƀon lan ân geh ntrong kan gay ma rklaih nkre”./.

            Nŭih rblang: H’Thi