VOV4.M'nông: Kêng măng ntri, Kruanh Quốc hội Vương Đình Huệ hŏ pah kan đah Văn phòng Quốc hội n'hanh ăp nhih pah kan geh tât mpeh nău nchrăp ndơ ƀư rơh  hop tâl bar, Quốc hội khoá XV ntơm pơk ngăn tâm nar ôi tay 20/10. Tĭng Tổng thư ký Quốc hội, Chủ nhiệm Văn phòng Quốc hội, ăp nkô̆ rơh hop hŏ tŏng ăp nău dơi mbơh rblang Quốc hội. Pah kan nchrăp mpeh nău lư nkoch trêng, drăp ndơ, kỹ thuật, rnă njrăng, đăp mpăn, wơt lăp, nchrăp kơl bah kơi, njrăng, n'gang nuh srê...hŏ lôch jêh gay nchrăp rhŏ dŏng an rơh hop. Rơh hop dja nsrôih dăp rgum gay hŭch glêh mông nar pah kan (nchrăp nklăp 17 nar) yơn hôm đăp mpăn săk tam ăp nkô̆ bah Quốc hội đah nău hun hao bah neh dak tâm năm 2022 n'hanh ăp năm bah kơi nê đŏng, đăp mpăn njrăng, n'gang nuh srê Covid-19. Tâm rnôk ƀư rơh hop, Kruanh Quốc hội Vuong Đình Huệ đă ân ndăn lĕ mông nar tâm nchră ta rmôt n'hanh ta hội trường; rgâl mhe tay n'hanh n'hao săk tam pah kan kơt thư ký, rgum nchih nău rgop n'hanh rblang ăp nkô̆ nău ndơ̆ luh tâm nchră. Ndrel đah nê, Kruanh Quốc hội lah rjăp nău n'hao khlay bah ăp rmôt đảng, n'hao dăng lơn đŏng nău dơn kan, nău lah nsum bah đại biểu Quốc hội ntơh măt ngăn an nău mĭn, nău mpŏng bah ƀon lan, yor ma  nău geh nsum bah neh dak, tâm nchră na nê̆, n'glêh an tâm di yor ma nău hun hao nsum./.

Nuĭh rblang: Điểu Thân