VOV4.M’nông: Ntơm năm 2016, Rnâng kan nkuăl uỷ Kon Plông, n’gor Kon Tum ntrŭnh bôk nau kan mrô 26 ntrŭnh ƀư bôk nau kan bah neh dak ndâk njêng ƀon lan mhe, lvang năm 2016-2020. Jêh 5 năm ntrŭnh ƀư, Bôk nau kan mrô 26 hŏ leo nsĭt ăp nau rgâl ngăn tâm nau geh tuch tăm, ƀon lan ndrel n’hao nau rêh ân ƀon lan.

            Wa Lê Đức Tín- Groi Kruanh UBND nkuăl Kon Plông ân gĭt: Uănh rjăp ngăn nau ntrŭnh bah Rnâng kan nkuăl uỷ mpeh nau ndâk njêng ƀon lan mhe, UBND nkuăl Kon Plông rđau ăp ntŭk ndâk njêng, râng nchră nau ân UBND nkuăl Rnâng kan ntrŭnh ăp nau nchrăp, bôk nau kan gay ƀư nau kan ân n’hêl, khoa học, kơp uănh ăp nkô̆ nau ntrŭnh ƀư nau kan ăp năm ndrel tâm lôch njăr kan, ăp nau kan, nau dơi ndâk njêng ƀon lan mhe ân geh kơl an ntrŭnh leo, ƀư nau dơi gay ma ntrŭnh ân jêh ăp nau ndâk njêng ƀon lan mhe tâm di ma nau geh ngăn nkuăl…

            Kơp uănh ntŭk ntu gung trong ƀon lan lah nau nkol tâm nau ndâk njêng ƀon lan mhe, hun hao văng sa, rêh jêng tâm nkuăl ƀon lan, lvang năm 2016-2020, nkuăl Kon Plông rgum ăp tu tơm kơl an lor tâm nau ndâk njêng ăp ngih vâl gung trong ƀon lan.

            Tât rnôk aơ, nkuăl Kon Plông geh 7/8 xã geh tŏng nau dơi mrô 2 mpeh trong hăn, hao 6 xã; 8/8 xã geh tŏng dơi mrô 3 mpeh trong dak hoch, hao 5 xã; 8/8 xã geh tŏng dơi mrô 4 mpeh điện, hao 3 xã; 4/8 xã geh tŏng dơi mrô 5 mpeh ngih săm ƀŭt, hao 2 xã; 5/8 xã tŏng dơi mrô 6 mpeh ngih rƀŭn văn hoá, hao 4 xã rđil năm 2015.

            Nkre lah, nkuăl Kon Plông kơp năl nau ntrŭt dăng nau kan hun hao văng sa, n’hao nau geh ân ƀon lan lah ngoai tâm ăp nau kơl an gay ma rđau rgâl ndâk njêng ƀon lan mhe, tâm nê rgum ƀư ân geh săk tam nau kan ƀon lan mhe ndrel ma nau ndâk njêng.

            Kơt ri, jêh 5 năm, rgop nau n’huch ach o nkuăl ƀon lan hôm 14,98% (năm 2020), n’huch 39,31% rđil đah năm 2015, nau geh du hê bôk nŭih năm 2020 geh 33,5 rkeh, hao 16,74 rkeh prăk/năm rđil đah năm 2015.

            Nkuăl uănh khlay nau ntĭm nti nau kan ƀon lan ndrel hŏ ntĭm nti geh 2.282 ŏ nŭih, geh 91% nkô̆ nau nchrăp luh, tâm nê nau ntyĭm nti nau kan ƀon lan geh 2.107 tŏ nŭih, geh 92,3%. Ngăn lah, nau kan nti kan pah ndrel pă kan pah hŏ rgop nau n’hao nau geh nti ndrel geh kan pah lơn ma hao âk.

            Tâm nau kan ntĭm nti, ntrong ngih nti geh nkuăl ntuh kơl, n’hao nkra, pơk hvi, tŏng dơi nau ŭch ntĭm nti ân ƀon lan. 9/9 xã, nkuăl têh geh ntĭm nti tiểu học tâm di năm ndrel ntĭm nti THCS; 100% rnoh xã, nkuăl têh geh ntĭm nti mầm non ân kon se 5 năm.

            Ngih vâl, ndơ dŏng, nŭih kan bah trong kan dak si tâm dâng geh n’hao nau ntuh kơl. Lam nkuăl geh 9/9 xã, nkuăl têh geh tŏng dơi mpeh dak si, geh 100% nau nchrăp luh.

            Nau kan răk kloh ntŭk ntu geh uănh kơl, bôk nau kan bah neh dak mpeh dak kloh ndrel răk ntŭk ntu ƀon lan geh săk tam. Tât rnôk aơ, rnoh rnăk geh dŏng dak kloh tâm nkuăl ƀon lan geh 98%, hao 8% rđil năm 2015.

            Rnơm ƀư ueh ăp nau kan tâm rnôk ntrŭnh ƀư, nau ƀư bôk nau kan ndâk njêng ƀon lan mhe tâm nkuăl Kon Plông rơh rlau aơ hŏ geh ăp nau dơi ngăn. Tât dŭt năm 2020, lam nkuăl geh 2 xã geh tŏng 19/19 nkô̆ nau ndrel hŏ geh UBND n’gor kơp dơn xã tŏng dơi ƀon lan mhe. Nau ngăn loh, rnoh dơi geh kơp dơn tŏng bah xã lah 15,8 nkô̆ nau, hao 10,2 nau kan geh dơi tâm du xã rđil năm 2021. Nau ŭch lah, tâm rơh tât, kan ntrŭnh ƀư Bôk nau kan ndâk njêng ƀon lan mhe bah nkuăl Kon Plông lah leo nsĭt âk nau dơi ngăn, rƀŏng tât nau jêh nau dơi ndâk njêng ƀon lan mhe tâm nkuăl tâm di ma nau nchrăp luh./.

                                                Nŭih rblang: H’Thi