VOV4.M’nông: Lvang aơ, he dôl tâm lvang âk ntŭl rlong n’hanh joi nău tâm di âk, nkre an rêh ndrel đah nu nău chôt srê Covid-19 jêr njrăng, nkre an rdâng đah yan mih nđik. Geh du đêt ndơ kah mbra kơl ƀư an duh săk n’hanh n’hao chŏl kop srê.

Geh âk trong n’gluh an aƀaơ gay he ndrel tâm di ngăch n’hanh đăp mpăn đah srê, nkre rêh ndrel đah yan trôk nar mih nđik hô ngăn tâm năm. Tâm ăp trong mkra gay tâm di an lĕ 2 ntŭl rlong geh ndrel, trong mkra n’hao chŏl kop srê n’hanh mât răm săk lah nău ŭch khlay n’hanh dŭt ŭch đah ăp nuĭh. Ăp ndơ sa way ơm bah ăp ndơ sa dơh joi kiău ma mbra lah du trong săk rnglăy kơl n’hao chŏl kop srê n’hanh ƀư duh săk du trong geh ơm tâm rnôk aƀaơ hin.

Ndơ sa bôk năp dăn nkoch, nĕ lah ndơ sa por tuh ônh kơl n’hao chŏl kop srê: Aơ lah du ndơ kah nkre pă an ndơ kah nkre nsĭt tay nău răm an săk tâm yan nđik. Tuh ônh geh âk chất sắt n’hanh đồng, yor rĭ sa por tuh ônh dôl duh mbra kơl mplăy soan bah he dŏng oxy âk lơn n’hanh n’hao trong chŏl kop srê bah săk. Du ngan por tuh ônh pă an săk 15 gram protein n’hanh chất xơ. Mô kơt ăp protein mpa rong, tuh ônh kơt mô geh ngi lăy tâm di. Khoa học an saơ, ntô ônh bah ntil tuh aơ geh hàm lượng âk ăp chất nchăng n’gang oxy hóa kơl njrăng n’gang kop ji rlău ăp ntil tuh geh ntô êng.

Ndơ sa kah tal 2 lah por phe kê̆r bum cải nglang

Phe kê̆r lah du ntil rnih bah grăp phe, knŭng kê̆r ntô dăng bah dih n’hanh mât tay lư̆k phe ndrel đah ăp ndơ dŭt âk ndơ kah khlay an săk kơt vitamin, chất njrăng n’gang oxy hóa n’hanh ăp ntil chất. Rlău ma nĕ, phe kê̆r lah tu tơm pă an ăp ntil dưỡng chất kơt canxi, kali, vitamin B2 n’hanh folate. Ntop tay, phe kê̆r geh hàm lượng mangan âk, lah du vi chất dŭt uĕh an săk. Phe kê̆r sŏk nkret ndrel bum cải nglang, ntop tay dak nkret por. Sa por phe kê̆r bum cải nglang mô lah rnih phe dôl duh ta ôi ơm n’hanh măng kơl mât răm, n’hao soan chŏl n’gang uĕh trong n’hâm n’hanh uĕh an trong proch.

Jêh nĕ tay lah ndơ sa bah bắp cải Bruxen: Ndơ sa bah cải băp jêt brunxen dơi kơl he njrăng n’gang nđik tâm yan mih nđik. Rlău am nău pă an chất xơ n’hanh chất njrăng n’gang ung thư phytonutrients, cải bruxen geh âk vitamin C đŏng. Vitamin C mbra mô nking n’gang nău hor dak muh, yơn vitamin C lĕ dơi an saơ kơl rhoăt đêt ăp nău kop sroh nđik, yor geh tam n’hao chŏl kop srê an săk.

Tal 4 lah súp play rpoăl: Súp play rpoăl kah duh lah du ndơ sa dơh joi, kơl an he duh săk ngăch lơn. Lah he dôl mô tŏng vitamin A, ndơ kah khlay an măt, súp play rpoăl mbra kơl an he ntop nău mô tŏng aơ. Play rpoăl geh njrăng n’gang oxy hóa dơi n’hao trong chŏl kop srê n’hanh kơl njrăng n’gang ung thư.

Ndơ sa tal 5 lah por rnih yến mạch: Rnôk bri mih nđik, nĕ lah rnôk tâm di gay sa por yến mạch. Yến mạch lah du ntil ngũ cốc nâm ơm grăp, pă an chất xơ n’hanh protein tơm tăm kơl nking n’gang nău ji ngot knŭng geh du ngan por yến mạch, geh tam nkre ƀư răm nkre n’hao săk soan njrăng chŏl nău kop ji an săk.

Súp poăch djiăr lah ngoăy tâm âk ndơ sa way dơi săch kơl ƀư răm duh n’hanh n’hao săk soan njrăng chŏl kop srê an săk. Ntop ăp ntil biăp play tâm ndơ sa súp poăch djiăr, gay pă an ăp nău uĕh chất njrăng n’gang oxy hóa ntop tay.

Mpŏng ăp nău mbơh mpôl he pă an kơl kônh wa geh tay nar sa uĕh kah, ngăch dăng an săk soan.

                              Nuĭh rblang: Y Sưng Phê Ja