VOV4.M’nông – Ta rgum tâm rlong tahen lam ntŭr neh Army Games 2021, neh dak n’hanh nkual neh tât râng tâm rlong. Nĕ lah nău mbơh ta ƀư n’glôch jêh Rgum tâm rlong tahen rơh ta 7 (Army Games 2021) lĕ dơi ƀư ta Mát-xcơ-va, Liên bang Nga. Jêh âkanar tâm rlong, Mpôl Tahen ƀon lan Việt Nam tât râng Army Games 2021 ta dak bah dih lĕ lôch uĕh ăp nău kan dơi jao, geh âk nău uĕh ngăn rlău 4 rơh râng tâm rlong Tahen lam ntŭr neh. Âk môn râng tâm rlong dăng âk lơn mô lah tâm ban năm e bôl rnoh rmôt bah ăp dak râng tâm rlong âk lơn n’hanh geh  môn tâm rlong dŭt jêr đŏng. Ăp trọng tài ta Army Games 2021 uănh lah ăp nuĭh Tahen ƀon lan Việt Nam dơi tiăr nti uĕh, geh nău blău uĕh n’hanh geh kỷ luật dŭt têh. Army Games lah di an ăp nuĭh tahen ƀon lan Việt Nam nti nsơm, rgum nău blău ơm tâm rơh tiăr nti nchrăp tâm lơh, ngăn lah nău gĭt, mĭn joi, dŏng n’hanh mâp prăp ăp ntil ndrăk nsiu, ndoh ndơ mhe, ndơ uĕh.

Nŭih rblang: Y Sưng Phê Ja