VOV4.Mnông- Lôch bơi tât 4 nar pah kan ndăn, răng dăng, ôi nar 7/10, ta ntŭk kan Trung ương Đảng, đah nău leo kan bâh Tổng Bí thư Nguyễn Phú Trọng, rơh rƀŭn nchră tal 4 BCH Trung ương khóa 13 lĕ rƀŭn nchră nglôch lôch. Ban chấp hành trung ương lĕ dơn ngoăy tâm ban nău an lah, 9 khay ba năp, nău wăng sa têh geh mât đăp mpăn, nău lạm phát lĕ dơi njrăng, ngăn lah lĕ dơi ngăch tâm rdâng n’hanh ƀư tĭng ăp nău kơl an gay ma ndâk nsơm nău jêr, doh rklaih nău jêr jŏt an ƀon lan n’hanh doanh nghiệp geh nău khuch tât yor nuh srê. Tổng Bí thư Nguyễn Phú Trọng lah na nê̆, Trung ương lĕ geh rgum mbơh rblang ăp nău khuch tât hô, âk nău tât bâh rơh nuh srê tal 4, nchră mpeh ăp nău ntrŭnh, nău kơl kan tâm di, lĕ rngôch, tơm khlăy, na nê̆ lơn gay ma doh rklaih răng dăng tâm nău njrăng rdâng nuh srê, mpŏng mbơh ntrong kan ndâk nsơm hun hao wăng sa rêh jêng tâm let năp tay. Mpeh nău rdâk njêng Đảng, tâm nău ntoh ngơi nglôch lôch Tổng Bí thư Nguyễn Phú Trọng lah na nê̆, rơh rƀŭn nchră lĕ dơn ngoăy âk nău ntrŭnh mhe mpeh ăp nău đảng viên mô dơi ƀư, uănh aơ lah nău kan tơm khlăy, nău khlăy gay ma geh uănh n’hêl, rmal ăp nău tih bâh cán bộ, đảng viên.

Nuĭh rblang: Thị Đoắt