VOV4.M'nông: Mhe aơ, âk n'gor tâm lam dak lah nsum, n'gor Dak Lak lah êng tŭp tâm nău mô tŏng dak si, ndơ dŏng kan dak si ƀư nuĭh ƀon lan rvê. Mhe aơ, Thủ tướng Chính phủ Phạm Minh Chính hŏ ƀư tơm rơh hop Rnâng kan Chính phủ mpeh nkô̆ nău dja, tâm nê nkoch tât nkô̆ mpeh si ƀŭt tâm rlong ƀư ndranh rvăt năp. Thủ tướng đă ta năp măt Bộ Y tế ƀư tơm, kan nsum đah ăp n'gâng kan geh tât ndăn ôp ŭanh lam lĕ rngôch ăp nău way dôl dŏng aƀaơ mpeh nău rvăt dak si, ndơ dŏng kan dak si. Nsing kalơ nê lor nchrăp, nsrôih nkra, an dŏng ăp si ƀŭt tĭng n'glĕ nău dơi kan.

Dôl mât chăm sai bĭch ta Nhih dak si Đại học Buôn Ma Thuột, n'gor Dak Lak ur du hê nuĭh ji an gĭt, đah aƀaơ 5 nar, sai geh ji geh sŏl mham play nuih n'hanh dơi njŭn săm ndal ta nhih dak si Nkual Tây Nguyên. Tâm rnôk but săm, bác sĩ an gĭt sai yuh ân ntrŭp stent sre suan mham ri mơ dơi kơl rêh. Yơn lah, tă bah Nhih dak si mô geh ntil ndơ ntrŭp dja jêng dơn kơl rêh bôk  năp dơm n'hanh đă rnăk rgâl nhih dak si:

    “Ăp nuĭh gŭ kan ta nê khân păng kơl rlău dơi nău ji, khân păng rblang lah nău ji dja dŭt jru, ta aơ lah an jŏ khĭt ngăn ta nê, aƀaơ mô geh máy ndơ ma ƀư".

        Mô  dơn mô tŏng ndơ dŏng kan dak si, âk nuĭh ji ta n'gor Dak Lak mâp jêr jŏt rnôk hăn rvăt dak si ta ntŭk tăch dak si bah nhih dak si đŏng. Nău ngăn geh mô tŏng dak si săm ji n'hanh ndơ dŏng kan dak si wa Nguyễn Đại Phong, Giám đốc Nhih dak si nkual Tây Nguyên năl. Wa Phong an gĭt, nkô̆ lah mô hŏ dơi  tĭng ƀư ăp rnoh ndranh rvăt dak si tĭng n'glĕ nău dơi kan bah Sở Y tế Dak  Lak:

       “Tât aƀaơ hôm 2 rnoh ndranh hôm kol quy định bah pháp luật kơt rnoh ndơ ndranh tâm di ri geh ăp ndơ mô hŏ dơi nchih mbơh rnoh khlay, mô hŏ dơi n'glăp tâm trong nchrăp bah Bộ n'hanh geh ăp ntil ndơ ma si ƀŭt bah bu mô hŏ ƀư lôch jêh n'hanh rnoh ndranh rvăt stent mạch vành, mhe aơ du đêt nhih dak si play nuih ta Hà Nội n'hanh du đêt nhih dak si êng ƀa ƀă geh tât pháp luật mpeh nkô̆ nău stent mạch vành jêng nău ƀư ndranh bah stent mạch vành lah ăp công ty khân păng dôl dŭt njrăng na nê̆ yor kơt nê̆ nhih dak si rnôk dja dôl ôp suăng lor. Lah mô ƀư di ri mbra geh tih pháp luật.”

        Wa Nay Phi La, Giám đốc Sở y tế n'gor Dak Lak an gĭt, nchih rgum bôk năp, ta du đêt ntŭk but, săm ji ta n'gor dôl mô tŏng ndơ geh tât but săm ji kơt: dak si kháng sinh, dak si geh tât rmôt generic lơn lah dak si sĭt dăng tay suan. Tĭng wa Nay Phi La, nkô̆ jêng tât geh nău mô tŏng dak si, ndơ dŏng kan dak si lah tă bah nuh srê COVID-19 ntoch jong 2 năm aơ hŏ ƀư tăch pruăt rêng pă an ndơ tăch lam ntŭr neh, tơm ƀư njêng, logistic hao khlay da dê jêng dŭt jêr gay ndơ̆ luh rnoh khlay dak si tâm di. Ndrel đah nê, nău rvăt năp ndơ dŏng kan dak si hôm jêr jŏt lơn đŏng yor ndrel du ntil máy yơn rup têh êng êng, kĩ thuật êng êng jêng rnoh khlay mbra êng êng. Ndơ dak si dơi tâm pă jêng 5 rmôt gay ƀư tâm rlong ndranh rvăt yơn ndơ dŏng kan dak si mô hŏ tâm pă rmôt na nê̆, mô hŏ geh mĭn tât nău nsing nơm, uĕh tam bah nuĭh tơm ƀư njêng jêng geh tât rnoh khlay êng êng. Nău dja ƀư nking kol nău tĭng ƀư rnoh ndranh rvăt.

        Gay manh droh rklaih jêr jŏt, Sở hŏ đă ăp tơm pă an tăch dak si nsing tâm si ƀŭt tâm ton gay ntop kơl tay dak si lam n'gor. Mpeh jŏ jong, n'gor mbra njêng du đơn vị ndranh rvăt êng gay kơl an ăp ntŭk kan dak si mô geh kol bah ăp quy định bah pháp luật

       “Mpôl hên nsŏng kơl an Ủy ban nhân dân n'gor ân njêng ngăch dĭl ntŭk rgum kan ƀư ndranh rvăt dak si, ndơ dŏng kan dak si rgum an lam n'gâng kan êng. Rdâk njêng săk nchih dak si ndơ dŏng kan dak si êng an n'gor nsing ta nău he hŏ ntuh kơl rvăt năp ndơ dŏng bôk năp, rdâk njêng du nău way kan mât njrăng tâm ban kơt ntop kơl nău tâm di; prăk dŏng kan an cán bộ râng ƀư ndranh rvăt đŏng".

        Nar 23/6 mhe aơ, Thủ tướng Chính phủ Phạm Minh Chính hŏ ƀư tơm rơh hop Rnâng kan Chính phủ mpeh nô nău pă tơm dak si, ndơ dŏng kan dak si n'hanh ăp trong nkra đăp mpăn tŏng ăp tơm ndơ an n'gâng kan dak si. Tĭng nău mbơh bah Bộ Y tế, aƀaơ geh nău mô tŏng dak si ta du đêt n'gor n'hanh dak si ta gưl Trung ương. Nkô̆ lah tă bah tơm ndơ ƀư njêng, ndơ tăch mpêt đê̆, rnoh khlay ndơ tăch âk rgoh n'gơ, nău rvăt năp dak si, ndơ dŏng kan dak si, hóa chất, ăp sinh phẩm an njrăng, n'gang nuh srê n'hanh but, săm ji nar lơn ma jêr jŏt. Dŭt njrăng geh nău mĭn rvê, klach tih, klach bu hăn ôp uănh, mô nănh ƀư, mô nănh rvăt năp bah du đêt n'gor n'hanh đơn vị.

N'glôch jêh rơh hop, Thủ tướng Phạm Minh Chính nchŏng kloh, nkô̆ uănh lhơ lah tơm, đah nău ƀư ndranh rgum an ƀư mbrơi; mô hŏ nsrôih tâm nchră mpeh rnoh khlay dak si dăch đah nô nău ngăn ngăn ta ntŭk tăch rgâl:

Gâp dăn đă tĭng ƀư jăp ăp quy định dôl dŏng aƀaơ mpeh ƀư ndranh rgum ta lĕ ma trung ương n'hanh n'gor; kalơ nuih n'hâm lah ân mbơh kloh rvah di ngăn dăch dêh đah ntŭk  tăch rgâl, njrăng bah tih djơh sa khâm, nde joi sa mpôl gay đăp mpăn dơi pă an dak si ăp tŏng an ăp ntŭk kan dak si. Ta năp măt lah ân đăp mpăn tŏng ăp dơi dak si ta săk nchih bảo hiểm y tế. Ôp uănh tay ăp tŏng, rđău đă n'hao dăng mât uănh ngih dak ta ăp đơn vị geh tât dak si gay đăp mpăn mô ƀư mbrơi nkai tâm pah kan pă an si ƀŭt rvăt dak si; ngăch rgâl nkra, kơi ntop ăp quy định gay ơm hŭch bah ƀư âk mpưm si ƀŭt. Ntrôl dăng tâm pă gưl gay rvăt năp ăp ndơ ntrŭp dŏng nsing ta nău an dŏng rnoh di, rnoh tât kan n'hanh n'hao dăng hăn ôp uănh, groi nđôi"./.

Nuĭh rblang: Điểu Thân