VOV4.M’nông: Tâm mpông trong lăp bah Tây Nguyên nthoi ma ăp n’gor mpeh ba dâng-ntŭk srê ji Covid-19 dôl ma âk hô tâm năm 2021, yơn n’gor Dak Nông hŏ ƀư ueh ăp nau kan njrăng, rdâng srê. Dak Nông lah ngoai tâm 2 n’gor geh rnoh nŭih ntưp đê̆ ngăn đah srê Covid-19 tâm Tây Nguyên, rnoh nŭih khĭt tâm rmôt dêh ngăn bah lam dak. Nau dơi nê rnơm tâm nau nsum nuih n’hâm bah ƀon lan ndrel lam ntrong kan chính trị, tâm nê geh kơp tât ăp cán bộ nai dak si mpeh bôk năp njrăng rdâng. Khân păng nchlơi nau kan bah nơm ba kơi gay ma nsôih n’hâm rgop nau ƀư rjăp nau nkân njrăng srê tâm Dak Nông, du n’gor jêr ngăn bah Tây Nguyên.

Lôch ntơm khay 7/2021, jêh rnôk srê Covid-19 ntoh luh tâm n’gor Dak Nông tât rnôk aơ, Dược sĩ Bùi Thị Tuyết ndrel cán bộ rmôt sŏk mham ƀon lan-Ntŭk kan nkân njrăng srê ji bah n’gor Dak Nông, kơt lah ê geh du nar rlu. Yuh mbơh, geh rnôk ri n’gul măng ndơn điện thoại bu kuăl lah nơm hăn. Ndrel âk tơ̆ hăn sŏk mham xét nghiệm tâm lôch măng gay ma kơl an nau ƀoi tĭng nŭih, njrăng rdâng srê. Lôch nar pah kan tâm kho ao njrăng srê, du đê̆ nŭih hŏ khĭt yơh. Dược sĩ Bùi Thị Tuyết, nkoch:

‘Geh rnôk kŏ rvê ngăn yor nơm geh kon hôm jê̆, geh rnăk vâl kơt bu đŏng. Yơn lah yor nau kan nsum, yor srê păng tât jêr ir, gâp kŏ kơt ma bu êng tâm rmôt ri kŏ nsôih gay ma dơi rgop n’hâm kơl rdâng srê. Kŏ ŭch ăp nŭih geh du năm sa tết ueh lăng ndrel tâm mâp ma rnăk vâl, ăp nŭih sâm ƀư ueh 5K, ndrel mro ntoh n’hao nuih n’hâm nkah njrăng, mô dơi thơ tha”.

Tâm Khoa xét nghiệm-Ntŭk nkân njrăng srê ji tâm n’gor Dak Nông, lôch âk khay ma aơ, 19 cán bộ nŭih pah kan kŏ geh nchlơi êng rnăk vâl gay ma kơl an nau pah kan. Thạc sỹ Nguyễn Phước Phúc, Kruanh Khoa xét nghiệm, mbơh:

‘Mhâm ƀư gay ma mât đăp mpăn nau xét nghiệm ntơm 2000 tât 3000 mẫu, tâm ban đah nklăp 7000 tât 10 rbăn nŭih sŏk mham ăp nar, ri âk oh nô tâm khoa, jrâu, kơt lah nchlơi lĕ nau kan bah rnăk nơm gay ma ƀư nau kan tâm măng ndrel nar. Ndrel geh măng ri hên rngeh tât ôi, lôch măng gay ma tŏng dơi nau kan njrăng rdâng srê tâm n’gor, ngăn lah tâm ăp rnôh ntoh luh srê âk tâm Gia Nghĩa, Krông Nô, Dak Mil, Cư Jút tâm ăp khlay rlau aơ.

Mhe sĭt jêh 2 khay njrăng rdâng srê tâm Ngih dak si Chợ Rẫy-nkuăl ƀon têh Hồ Chí Minh, nau dak si Lê Văn Thương lŏ hăn lăp kan jŏ jong tâm ntŭk bu săm srê Covid-19 jâk hô-Ngih dak si Đa khoa n’gor Dak Nông. Mô ŭch nkoch âk mpeh săk nơm, nô dôl ma ƀư nau jao nau kan trih mham mro ân ăp nŭih pah kan nsum ma nơm đah nau ŭch nsĭt tay nau rêh ân âk nŭih dôl ma săm srê Covid-19:

‘Nsôih lôch n’hâm ngăn, nkân lơi ăp nau mĭn, nau ŭch êng bah săk nơm gay ma ƀư nau njrăng rdâng srê, ndri ma nuih n’hâm păng nsôih hô ngăn. Jêh rnôk hăn ngih dak si Chợ Rẫy sĭt ri gâp lŏ rgum geh âk nau gĭt, nê lah nŭih ntưp srê Covid-19 hô lah geh ƀư nau trih mham mro ndrel ƀư ân ơm ri nau geh kơl an rêh lah dŭt dơi geh âk nŭih rih ndrel mra n’huch rnoh nŭih khĭt. Nau gay nkoch lah ăp oh nô ntơm bah khoa êng bol ma mô di lah nau blau bah khân păng yơn hôm nsôih kơt tĭng ndrel jêh âk nar ri khân păng ueh đŏng ri ma bah oi nau ji jâk jru ân nơm”.

Mpông trong mpeh ba dâng Tây Nguyên, tâm rlau du năm ma aơ, n’gor Dak Nông mro njrăng rdâng nau kan ntoh luh srê Covid-19. Yơn lah, lăp tâm năm mhe 2022, jêh ba kơi Kon Tum, Dak Nông lah n’gor geh rnoh nŭih ntưp srê Covid-19 dêh ngăn tal bar tâm nkuăl Tây Nguyên, đah rlau 700 nŭih ji. Tâm nê, rnoh nŭih khĭt tâm n’gor geh nklăp 0,25% tâm rmôt dêh ngăn bah lam dak. Nchră nkoch tât nau kan njrăng rdâng srê Covid-19 tâm n’gor, wa Ngô Thanh Danh, Bí thư n’gor uỷ Dak Nông ân lah, n’gor ngăn lah geh nau dơi nkân njrăng ma srê ji rnơm geh nau tâm rnglăp, tâm kơl bah lam ntrong kan, tâm ban, tâm du nuih n’hâm kơl an ƀon lan đah nau rđau kan, nau lăp kan ngăn bah lam ntrong kan chính trị, ngăn lah ăp nau rgop bah rmôt kan mpeh bah bôk năp njrăng srê:

‘Phung hên hŏ uănh năl tă bah bôk năp lah du n’gor hôm ach o, jêr jŏt âk ntil, kơl n’ăp ma nŭih pah kan, kơp n’ăp ma tâm ntŭk kan dak si ri mô tŏng âk ngăn, ri ma ân geh nchrăp đah ăp nau kan tâm ntŭk pah kan lah njrăng rdâng srê lơn ngăch lơn ma ueh, yơn ma rnôk păng ntoh luh kơt ăp n’gor êng ri nơm mô tŏng n’hâm. Ăp nau jêr, nŭih ji hŏ geh nau jêr đŏng ma nơm hăn njrăng rdâng srê ri lơn ma jêr đŏng, mô nkah nau kan êng gay ma ƀư nau kan nsum, nê lah du nau kan ueh”.

Tết tât, năm mhe tât, rnôk ma ăp nŭih dôl ma nchrăp tâm năm mhe, ndrel ma ăp mrôt ƀư nau kan bôk năp njrăng, rdâng srê, cán bộ nai dak si hôm geh nau nsôih ngăn tâm nau kan bah nơm, dôl nsoh tâm săk nơm ăp blah ao njrăng rdâng duh, nchlơi nau geh êng bah săk nơm, nsôih sŏk mham, ƀoi tĭng, săm săm nŭih ji...rgop nau mât ân ƀon lan vơt sa tết năm mhe ân ueh, tâm ban ma nau dơi bah năp nau khuch bah srê Covid-19./.

Nŭih rblang: H’Thi