Chôt ndal lah nău kop ji klach, rnoh khĭt âk. Lĕ rngôch nuĭh ji jêh rnôk rlet rlău nău klach geh nău n’glơi mbăn. Rnôk chôt ndal ƀư, nuĭh rnăk wâl an ngăch, dŏng ơm tĭng mnbĭt gay ndơ̆ nuĭh ji tât ngih dak si gay kơl săm rêh nuĭh ji. Nău săm bôk năp tih mbra lư ji mbăn lơn. Gay wât kloh lơn nkô̆ nău aơ, Nai dak si Trần Xuân Nhã, Khoa Lão, Ngih dak si Đa khoa nkual Tây Nguyên, nkoch du đêt nău an njrăng bah kơi aơ.

- Năm bah năp, âk nuĭh nkoch trong săm bôk năp chôt ndal, ntoh lư lah ƀih n’hanh pet luh mham 10 nglău ty. Trong ƀư an di đŏng hơi nai dak si?

Nai dak si Trần Xuân Nhã: Dŭt âk nuĭh dôl mkra tih đah nuĭh ji geh chôt ndal ta jay. Ăp nai dak si mâp âk nuih rnăk wâl ƀih ta 10 nglău ti gay luh mham. Nău ƀih chông nglău ty ƀư ăp y, nai dak si jêr năl nuĭh ji aƀaơ geh hao mham mô dah rdih luh mham rih. Rnôk ƀih chông nglăp ty mbra ƀư an nuĭh ji luh mham mô sĭt tay nău tam. Đah du đêt nuĭh mbra mô saơ geh nuĭh ji geh nău kŏt mham ta jay đŏng lah mô. Rnôk geh âk nuĭh ji mô dơi bah luh mham, mô uĕh trong kŏt mham. Ƀih ta chông nglău ty mô dơi mkra nău ma hôm ƀư jru mbăn lơn ăp nău ji êng.

Jêh nĕ tay lah nuĭh ji ngêt êng dak si ta jay. Geh đêt nuĭh rnôk lăp ngih dak si ri nuĭh ji dŏng êng ăp ntil dak si chŏng n’gang ăp ntil tiểu cầu mô lah dak si njrăng n’gang kŏt mham ta jay. Rnôk dŏng êng dak si ri tih nău way, ntĭt nsanuĭh ji geh luh mham rngok ri ƀư jru mbăn lơn rnôk luh mham rngok jêng tât nuĭh ji mbra hoơi huơi n’hanh an dŏng trong mkra mbăn lơn. Ntĭt nsa nuĭh ji huơi mbăn an geh ntĭm đă nglăp dĭng nội khí gay an nuĭh ji nsôr măy. Nĕ lah nuĭh jay nơm ƀư roh nău dơi rêh bah nuĭh săk nơm. Jêng rmôt nai dak si mpôl hên dŭt ŭch nuĭh dơi uănh nđôi bôk nău  kan aơ ri n’hŭch nău an nuĭh ji ngêt dak si.

Tal 2 lah ndra dŏng ndơ mplanh chuh ta chông ty. Jêng geh nău mbơh ntĭm bah nuĭh kan dak si, geh tŏng ăp nău way kan, uĕh ngăn tâm rnôk khlay ăp nuĭh an ndơ̆ nuĭh ji lăp ngih dak si ơm nĕ lah nău dơi kơl rêh nuĭh ji, mô dơi an ƀư ăp nău tih khoa học.

Mpôl hên lĕ săm ndal an du hê nuĭh ji chôt ndal rngok, ma nuĭh rnăk wâl ƀih lât mham 10 nglău ty. Rnôk lăp ngih dak si ri mô uĕh kŏt trong mham dŭt mbăn, luh mham âk bôl lĕ dơn ntop mham yơn nuĭh ji hôm e mô uĕh kŏt trong mham n’hanh n’glêh dŭt nuĭh ji mô dơi bah.

- Nai dak si geh ntĭm đă đŏng gay nchrăp njrăng n’gang chôt ndal lah?

Nai dak si Trần Xuân Nhã: He an nsing tâm nkô̆ nău gay geh trong săm. Ăp nuĭh geh hao huyết áp ri n’hŭch sa tăng bôh, an thể dục thể thao ƀa ƀơ. N’hŭch ndơ sa dak ngêt geh cồn, dak ngi âk, sa ndơ sa kloh uĕh, pŭt rih. Rgâl ndơ sông sa dŭt khlay. Lơn lah an hăn uănh nđôi, hăn but uănh ăp khay săk soan ƀa ƀơ, uănh nđôi mpeh play nuih, yor nkô̆ nău mpeh play nuih way geh jêr uănh nđôi n’hanh mô saơ bah âk lvang ơm jêng he an tĭng tâm nău geh ji bôk năp. Aƀaơ cận lâm sàng dŭt khlay nchroh ơm mpeh nău ji. Kơt lah pơng geh nău ji play nuih mham, kơt djuôr play nuih, rung nhĩ ri nuĭh ji an dŏng bảo hiểm y tế but uănh ƀa ƀơ gay uănh nđôi săk soan ăp rơh bôl mô geh nău ji ka đôi./.

- Ơ dăn lah ăp nău nkoch dŭt uĕh bah nai dak si