Dôl săm ji proch kranh tă bah ji chrăch njŭng ta khoa Nội bah Ngih dak si nkuăl Krông Búk, yuh H’Pốc M’jao, buôn Adrơng Prong, xă Cư Pơng, an gĭt, aơ lah rơh tal 2 tâm năm aơ yuh bĭch ngih dak si. Lĕ 2 rơh yuh saơ dŭt đăp mpăn rnôk dơi ăp y nai dak si ta aơ dŭt n’hâm mât uănh:

“Nai dak si dŭt ŭnh tât mât rong nuĭh ji. Săm ta aơ mô geh nău rvê âk. Aƀaơ gâp lĕ bah oi dŭt âk”.

Ta pĭt jâng ji bah yuh H’Pốc, nô Y Thế Niê, buôn Ea Brơ, xă Cư Pơng, nkuăl Krông Búk, dôl săm ji klơm soh. Nô geh ji lĕ bơi 1 khay, bôk năp lăp ngih dak si nkual têh Buôn Hồ, jêh nĕ ndơ̆ sĭt Ngih dak si Krông Búk. Jêh 4 nar săm, ji bah nô lĕ rgâl hŭch na nê̆.

“Ta aơ kloh uĕh, nai dak si dŭt n’hâm gơih ngăn, dak si tŏng ăp lơn bĭch ngih dak si Buôn Hồ. Aƀaơ ngăch hôm, ôi taơ mbra hăn sĭt ngih dak si”.  

Tĭng nai dak si Y Păm Ayun, kruanh khoa nội, Ngih dak si Krông Búk, 2 khay plơ̆ ma aơ, rnôk Ngih dak si lĕ jêh nău ndranh dak si, rnoh nuĭh ji tât khoa hao ndal, geh narr âk ir:

“Bah khay 4 tât khay 7 ri dak si mô tŏng, âk nuĭh ji hăn but uănh mô geh dak si khân pơng hăn ntŭk êng. Yơn bah khay 9 tât khay 10 geh âk ri khân pơng sĭt. Nkôp đah rnoh an bôk năm đah rnoh âk N’gâng kan dak si ri mhe aơ geh du đêt nar way hao âk ngăn. Êng nar bu an 25 nsưng dơm, yơn geh âk nar he wơt dơn 27 tât 28 nsưng”.

Ta nkual bah lơ n’gor Dak Lak, rĭng ăp năm, Ngih dak si Krông Búk wơt dơn n’hanh săm nklăp 5.700 nuĭh ji. Rơh srê Covid-19 mro mrăng, Ngih dak si dơi mpla dŏng gay săm an rlău 3.500 nuĭh ji Covid-19 ta ăp nkuăl Krông Búk, Buôn Hồ, Krông Năng n’hanh Ea Hleo. Jêh rsê, kơt âk ntŭk kan dak si ta ntŭk, ngih dak si pah kan dŭt jêr jŏt yor mô tŏng dak si n’hanh ndoh ndơ dak si. Yơn lah, đah âk nău nsrôih mô rlu, khay 9 mhe rlău, Krông Búk lĕ ƀư lôch uĕh ăp ndơ ndranh dak si, lah ngoăy tâm âk ntŭk kan ta Dak Lak rklaih jêr jŏt nău mô tong dak si n’hanh ndoh ndơ dak si rhŏ an but săm ji. Wa Trần Thuận, Giám đốc Ngih dak si nkuăl Krông Búk an gĭt:

 “Ngih dak si n’gluh an du đêt trong nchrăp, bôk năp lah nkra rgâl rmôt kan bah nơm, tal 2 tay lah n’hâm ƀư an tŏng ăp dak si ndoh ndơ gay rhŏ an nuĭh ƀon lan, tal 3 tay lah hăn ndrel he geh âk rmôt hăn bah kan ta ntŭk gŭ rêh pah kan đah ăp xă, thôn ƀon ta bah dâng nĕ he tâm rgop nkoch tơih nkô̆ nău he lĕ tŏng ăp nău geh gay mât uănh săk ta ntŭk ri nuĭh ƀon lan khân pơng tât đah he âk lơn”.

Đah nău nsrôih, mkra jêr jŏt bah nsum mpôl cán bộ, y, nai dak si, ăp năm dăch aơ, uĕh nâp trong kan but uănh, săm ji bah Ngih dak si nkuăl Krông Búk nar lơ hao na nê̆, rnoh nuĭh ji trơng gưl bah lơ hŭch, nuĭh ji tât nar lơ âk. Ngih dak si tâm di ntŭk nsing nơm nâp nâl mât uănh săk soan an nuĭh ƀon lan ăp rnoi mpôl đêt ta ntŭk./.