Gơih, lĕ nuih n’hâm đah nău kan, 20 năm bah năp, Cử nhân Điều dưỡng Nguyễn Thị Hiền-Kruanh Trạm Y tế xă Ea Kiết, nkuăl Čŭ M’gar, n’gor Dak Lak mât rong nău rêh, nsrôih nti gay n’hao nău blău way kan. Yuh lĕ jêng uĕh ang đah du hê nuĭh nai dak si lĕ nuih n’hâm đah nuĭh ji, dơi nuĭh kan ndrel n’hanh kônh wa ta ntŭk ŭch rhơn.

Krêp dêh đah trong kan dak si bah dâng rlău 20 năm, jâng choat yuh Nguyễn Thị Hiền lĕ têl ta lam 13 thôn, ƀon bah xă Ea Kiết, nkuăl Cư M’gar. Bôk nău kan, nău ƀư nkoch trêng, rgŏ jă nuĭh ƀon lan n’hao wât njrăng n’gang srê, mbơh tay nar chuh pơk hvi, râng njrăng n’gang kop duh, rtoh luh mham rih, rgŏ jă mô deh kon tal 3... geh âk rnôk n’glơi an yuh âk nău uĕh răm ngot.

Năm nĕ lah năm 2004, tât khay 6 bri mih ma hăn chuh ta ƀon nuĭh Mông dŭt lah njê, rnôk nĕ hăn trong bri ma nkre hăn nkre djôt bình nđik vaccine, năm nĕ hăn rlău dak diăng ntôn lah roh hôm, nkre hăn nkre mĭn ndơ lơh nơm lŏ hăn nău kan aơ, yơn ma gâp mĭn nuĭh ƀon lan khân pơng nsing nơm he, khân pơng kâp he tât lah ăp ntŭk ŭch he n’hanh he saơ nuih n’hâm he rhơn hao n’hanh ăp nău jêr jŏt nĕ rlet rlău lĕ. Bah nĕ lĕt năp he saơ lah nău njê lŏ ndơ̆ tât nău răm an ntŭk njê lơn he tay jêng he saơ răm lơn.

Đah nău ŭch nău kan nai dak si lah nău kan têh khlay, jêng đah nuĭh ji, yuh Hiền uănh kơt nuĭh bên bah nơm, dăch dêh, chop khâl n’hanh uănh tât tâm pă. Knơm nê, lĕ rngôch nuĭh ƀon lan Ea Kiết săch Ngih dak si xă lah ntŭk but uănh, săm ji bôk năp; nău wât mpeh trong kan mât uănh, njrăng n’gang săk soan ntơm dơi hao, gŭ âm bah kônh wa ntŭk aơ rgâl tĭng nar. Yuh H Luôr Byă, ta ƀon Ya Wầm A, xă Ea Kiết an gĭt:

Knơm nău mbơh ntĭm bah ăp yuh ta ngih dak si xă, ngăn lah yuh Hiền dŭt gơih mbơh ntĭm an mpôl hên mpeh trong mât uănh kon se bah rnôk gâp bŭn tât rnôk deh kon. Bah nĕ gâp geh tay nău wât mpeh trong mât njrăng n’hanh mât rong kon gay an kon hun hao bôk rngok, nuih n’hâm n’hanh săk soan.

Bah năp trong rgâl mrô, bu ur Trạm trưởng nsrôih mĭn joi công nghệ phần mềm rhŏ an nău kan. Yuh hôm nti êng, ntop tay nău gĭt khlay gay mĭn joi trong nkoch trêng, rgŏ jă uĕh ngăn an nuĭh ƀon lan. Ta nău ƀư Kruanh Ngih dak si xă, yuh geh nău pă na nê̆, tâm di đah nău way kan bah tĭng nuĭh gay ƀư tĭng săk rnglăy bôk nău kan nchrăp njrăng n’gang n’hanh mbơh ntĭm, but uănh ji. Nkre yuh uănh khlay ndâk njêng nău tâm boh tâm rnglăp, krêh dêh tâm ntŭk kan, nta an kơl oh yuh tâm ntŭk kan ndrel hao.

Nai dak si Đa khoa H Pim Ayun, Groi trạm Y tế xă Ea Kiết, nuĭh lĕ geh 14 năm hăn ndrel đah yuh Hiền tâm trong kan but uănh săm ji an nuĭh ƀon lan ta ntŭk nkoch:

Rnôk Lăp Trạm geh nuĭh yuh dŭt gơih kơt nĕ kơl gâp âk, rnôk gâp mô gĭt ri gâp ôp yuh dŭt gơih ơh he ri he geh nuih n’hâm tay, geh tay nuih n’hâm gay he hao.

Lah xă nkual ngai, tă bah nkuăl Cư M’gar 25 km, Ea Kiết geh bơi 1/3 rnoh rnăk lah ƀon lan rnoi mpôl đêt, nău rêh hôm e âk jêr jŏt. Gay rgâl nău mĭn bah kônh wa tâm nău mât uănh săk soan, yuh Hiền lĕ tâm ôp tâm nchră gưl ủy, n’gâng kan ƀon lan n’hanh ăp nsum mpôl xă ƀư nkoch trêng, n’hao nău wât, wât mât njrăng săk soan an nsum mpôl; uănh khlay trong kan mât răk ntŭk ntô gŭ âm. Lơn lah tâm rnôk srê Covid-19 bah năm 2019 tât năm 2022, yuh lĕ ƀư uĕh trong kan tâm ôp tâm nchră gưl ủy Đảng, n’gâng kn ƀon lan ndâk njêng ăp trong njrăng n’gang srê săk rnglăy. Wa Trần Trung Hiếu, Groi Kruanh UBND xă Ea Kiết, nkuăl Cư M’gar lah mpeh bu ur trạm trưởng Nguyễn Thị Hiền:

Yor gŭ ngai tâm nkuăl jêng nău ƀư tơm bah Trạm y tế dŭt khlay, ƀư trong kan but uănh săm ji bôk năp an nuĭh ƀon lan. Ta aơ, đồng chí Trạm trưởng lĕ mât uĕh tâm ôp tâm nchră an Ủy ban xă kơt đảng ủy đăp mpăn dak si gay but uănh săm ji an nuĭh ƀon lan. Tât aƀaơ xă ƀư uĕh trong kan but uănh săm ji jêng rnoh brêt têh bah kon se kơt nuĭh mê̆ dôl bŭn n’hanh ăp nău kơl đăp mpăn uĕh n’hanh Trạm ăp năm tâm di lam dak mpeh y tế.

20 năm nsoh ao bluse nglang, nău geh bah yuh hao âk đah âk sam ƀŭt rhên nkhôm, bằng khen tâm trong kan way kan, yơn ndơ rnê nkhôm têh ngăn đah yuh Nguyễn Thị Hiền lah nău răm bah nuĭh ƀon lan đah Trạm y tế xă Ea Kiết. Nău aơ lĕ ntop tay an yuh âk nău răm, n’hâm soan an ndơ̆ dŭt n’hâm đah nău kan.