Đah lah du n’gor yôk geh âk nŭih rnoi mpôl đê̆ rêh, ndrel bu ur deh kon tâm ngih âk rđil ma lam dak. Ntrŭnh ƀư nau kan mrô 8 mpeh nau tâm ban bu ur bu klô ndrel rklaih nau tât đah bu ur ndrel kon se rơh I (2021-2025), Gia Lai lah 1 tâm 10 n’gor geh kơl an ntrŭnh ƀư 4 nau kơl an bu ur deh kon đăp mpăn ndrel mât chăm n’hâm soan ân kon se, geh: Mât chăm bah năp rnôk deh, kơl an   tâm rnôk deh, kơl an mât chăm jêh deh, mât chăm n’hâm soan ân kon se.

 Rơh rlau aơ, ăp gưl kan hội hŏ tâm rgop ma n’gâng kan dak si ƀư bơi tât 100 nar nkoch trêng ntĭm mbơh n’hao nau gĭt ndrel bonh đă bu ur hăn deh kon tâm ngih dak si, rgum rlau 7000 bu ur tâm di năm deh kon râng. Êp nê, hŏ dŏng kơl an 361 nŭih bu ur deh kon tâm ngih dak si đah rnoh prăk bơi tât 365 rkeh. Bah ăp nau kan aơ, mô knŭng n’hao nau blau, nau mât chăm n’hâm soan ân bu ur, kon se, nŭih rnoi mpôl đê̆ ma hôm rgop nau nsôih gay ăp oh nur tât ngih dak si deh kon tâm di nau ntrŭnh rnoh nŭih.

            Yuh Rơ Châm Alênh, ƀon Amơng, xã Ia Mơ Nông, nkuăl Chư Păh, n’gor Gia Lai mbơh:

             ‘Gâp geh kơl an bu rvăt nal ăch ân ma kon gâp. Bah nê ri gâp saơ rhơn ngăn yor mhe geh ndơn nau kơl an, nkre geh ntĭm mbơh nau răk chăm kon tŏng ăp. Deh kon tâm ngih dak si ri kon nơm geh chuh n’gang ân tŏng, geh khám ân kon đŏng”.

            Bah nau ntrŭnh ƀư nau kơl an bu ur rnoi mpôl đê̆ deh kon đăp mpăn ndrel mât chăm n’hâm soan kon se hŏ rgop nau n’hao nau gĭt bah bu ur mpeh nau deh kon đăp mpăn, mât chăm n’hâm soan ân mhe, kon se; oh nur geh dŏng nau kan dak si, gĭt tay nau mât chăm kon tâm di. Yuh Đinh Thị Ly Ơn, ƀon Jek, xã Chư A Thai, nkuăl Phú Thiện, n’gor Gia Lai nkoch: Gâp deh kon bôk năp hôm, jêh aơ lŏ deh kon tal 2 đŏng. Rnôk deh ri gâp mra hăn deh tâm ngih dak si ân đăp mpăn ân me ndrel kon. Gâp kŏ nsôih mât chăm kon ân ueh gay ma ueh lăng đŏng.

            Bah 3 năm ƀư bôk nau kan mrô 8 tâm n’gor Gia Lai hŏ geh âk nau dơi ueh đŏng tâm nau jut jăng nau rdâng, nau tâm nkhah bu ur bu klô, nau ƀư ân săk tam nau tâm ban ndrel n’hao nau rêh, drăp ndơ, nuih n’hâm ân bu ur ndrel kon se nkuăl rnoi mpôl đê̆. Mbơh tât nau geh dơi săk tam bah nau kan ntrŭnh nau mrô 8 tâm n’gor, wa Rơ Chăm H’Hồng, Kruanh rmôt bu ur n’gor Gia Lai, mbơh:

            ‘Ăp nau kan, nau ƀư rnôk geh ntrŭnh tât tâm n’gor ân tât rnôk aơ ri geh ƀon lan ndrel rmôt bu ur kơp dơn, geh nau kơl an, tâm ban nuih n’hâm bah ăp gưl uỷ, n’gâng kan tâm n’gor rnê prêh. Tâm rơh tât ri ăp gưl kan hội lŏ nchrăp nau ƀư ueh nau kan bah nơm gay ma râng, ƀư, ntrŭnh ân tam 16 nau kan tâm 4 nkô̆ nau tơm bah bôk nau kan mrô 8, nsôih geh ndrel rlet rlau nau dơi bah rơh bôk năp nchrăp luh. Nau tơm lah ƀư nau kan ân rgâl nau mĭn, nau kan, rgop nau jut jăng lơi nau tâm nkhah bu ur, bu klô, nau dơi bah bu ur tâm rnăk vâl ndrel ƀon lan, ăp nau vay ơm mhĭk ndrel du đê̆ nau tât tâm nau rêh mô ueh ma bu ur ndrel kon se”.

            Kŏ tĭng Kruanh rmôt kan bu ur n’gor Gia Lai, rmôt kan mra lŏ mât ăp nau kan ueh, gay rgâl nau mĭn, nau kan, n’hao nau dơi văng sa ân bu ur, ntrŭt dăng nau trâm ban, rklaih ăp nau tât bah bu ur ndrel kon se, đăp mpăn nau ngơi ndrel nau râng ngăn bah bu ur ndrel kon se tâm nau kan hun hao văng sa, rêh jêng tâm ƀon lan. Uănh ndrel mbơh, kơl an n’hao nau dơi ân bu ur râng rđay kan tâm ntrong kan chính trị. Ƀư ăp nau nchrăp blau mpeh nau rêh, nau kan, ƀư rgop nsum ân cán bộ tâm ntrong kan chính trị, ăp bu ur ƀon, kruanh ƀon, nŭih bu rnơm tâm ƀon lan. Bah nê, mra njêng dơi nau rgâl ngăn tâm nau ƀư tâm ban bu ur bu klô ndrel rklaih ăp nau kan tât ndal ma bu ur ndrel kon se, rgop nau n’hao nau rêh drăp ndơ, nuih n’hâm ân bu ur, kon se rnoi mpôl đê̆ tâm n’gor Gia Lai.

            Đah âk nau kan geh nau khlay hŏ ndrel dôl geh ăp gưl kan bu ur n’gor Gia Lai nsôih ntrŭnh, râng ƀư, Bôk nau kan mrô 8 ŭch mra njêng nau tơm ân ăp nau kan, nau ƀư êng êng geh ntrŭnh ân geh săk tam ndrel nâp nâl tâm nkuăl rnoi mpôl đê̆ tâm Gia Lai./.