VOV4.M’nông: Rnôk mhe rlău, ngih dak si Đa khoa nkual Tây Nguyên, lĕ wơt dơn n’hanh săm an âk kon se geh nău ji MIS-C (ji ăp ntil trong) jêh Covid-19, tâm nĕ geh ăp nuĭh kon se geh djuôr trong n’hâm, djuôr play nuih klăch tât nău rêh.

          Mât chăm kon ta ngih dak si Đa khoa nkual Tây Nguyên, yuh Vũ Thị Hương, ta phường Tân Lập, nkual ƀon têh Buôn Ma Thuột, n’gor Dak Lak an gĭt: Tă aơ rlău 1 khay, kon bu klô 7 năm deh bah yuh geh saơ duh, rnăk wâl an mon ngêt dak si bah duh n’hanh saơ mon plơ̆ tay nâm ơm jêng rnăk wâl mô test Covid-19 an mon. Yơn lah nklăp 5 pơh bah kơi, jêh rnôk ăp nai dak si but uănh, ƀư ăp ntil uănh năl mham khlay, gĭt saơ min geh MIS-C jêh Covid-19.

“Dŭt klach, yor nơm mô saơ ơm an tât rnôk aƀaơ săm pơng geh jŏ hôm lah he gĭt saơ ơm n’hanh mon geh jêh Covid-19 he săm ơm lơn ri mon mbra ngăch lơn, dơh lơn”.

Kơt yuh Hương, nô Nguyễn Chí Quốc ta phường Ea Tam, nkual ƀon têh Buôn Ma Thuột dŭt klach rvê n’hanh ndrăt rnôk ăp nai dak si an gĭt kon bu ur bah nô geh nău ji MIS-C jêh Covid-19.

“Nău ji bah mon ri bôk năp mon duh na nao 4 nar n’hanh nar tal 5 mư lăp ngih dak si, duh rtoh luh, wăy măt, ji bôk hok, mô dơi sa du ntil ndơ. Rmôt nai dak si ntop kơl n’hanh săm tât aƀaơ ri mon dơh oi hôm, lĕ rngôch ăp nău ji lĕ hŭch, aƀaơ mon ngăch, ngêt sa nâm ơm”.

Kon se geh nău ji MIS-C jêh Covid-19 dơi nai dak si but uănh ta Ngih dak si Đa khoa nkual Tây Nguyên.

 Tĭng Tiến sĩ, nai dak si Trần Thị Thúy Minh, Kruanh Khoa Nhi Tổng hợp Ngih dak si Đa nkual Tây Nguyên, nău ji MIS-C lah nău môr ăp ntŭk êng geh play nuih, klơm soh, leh, rngok, ntô, măt mô lah ăp ntŭk tâm trong proch kon se tâm rnôk 4-8 pơh jêh rnôk ntưp Covid-19. Aơ lah nău dun n’gang nău ji dŭt hô, dơi ƀư klach an kon se, n’glơi an âk nău ji mô lah jêng tât khĭt nuĭh.

“Nău ji MIS-C jêh Covid-19 mô tĭng tâm rnôk e ntưp Covid-19 mbăn mô lah n’gơich. Ăp nuĭh mê̆, nuĭh bơ̆ geh kon ntưp Covid-19 mô lah ntôn ntưp Covid-19 bah năp nĕ jêh nklăp bah 4-8 pơh ma kon se geh nău duh ta 3 nar na nao, chăng măt, chăng ta yoi, rtoh luh, ji ndŭl, ji ŏk, ty  rplăy luh mô lah mpang ty môr ri an tât du ntŭk ngih dak si êp ngăch gay dơi nchroh n’hanh săm ơm, dêr ăp nău rgâl mbăn geh yô̆ nđach”.

Nău ji MIS-C jêh Covid-19 dŭt mbăn n’hanh klach an kon se. Yơn lah, dơi saơ n’hanh lăp ngih dak si, nchroh di n’hanh săm ơm, dŭt âk nuĭh geh ji mbra geh tŏng ăp. Gay mô ntưp nău ji aơ, rnăk wâl an mât njrăng, dêr gay kon se ntưp Covid-19. An kon se chuh vaccine Covid-19 gay n’hŭch geh ji mbăn n’hanh n’hŭch khĭt nuĭh rnôk ntưp ji./.

          Nuĭh rblang: Y Sưng Phê Ja