VOV4.M’nông: Ăp nar êp aơ, ăp ngih dak si tâm n’gor Dak Lak mro ndơn saơ geh âk kon se tât ngih dak si khám ndrel ma săm yor nau ji jâng ty mbung. Nau ngăn lah, âk nŭih kon se ji jâng ty mbung ma me mbơ̆ mô gĭt, rnôk kon lăp ngih dak si ri hŏ ji jru.

            Mât chăm sau mhe 10 khay geh nau ji jâng ty mbung dôl ma săm tâm ngih dak si Đa khoa nkuăl Tây Nguyên, wa Vũ Thị Hương tâm nkuăl Krông Pách, n’gor Dak Lak mbơh, du pơh bah năp nê, rnăk wa saơ sau geh nau ji kop duh, vay nhĭm hô, luh rtoh gur tâm mpang ty ru ma leo tât ngih dak si nkuăl gay ma săm. Jêh 2 nar gŭ tâm ngih dak si nkuăl, nau ji bah mon ê geh bah ri ma rnăk vâl leo mon tât ngih dak si Đa khoa nkuăl Tây Nguyên:

            ‘Bah băo nơh knŭng uănh tivi, nau dak si mbơh nau ji aơ jâk ngăn ri ma gâp saơ mon kơt nê ri gâp leo ngih dak si. Ăp mẹ lah saơ kon ji kop duh ri ân leo tâm ngih dak si gay nai dak si khám nkre, yơn mô dơi ân tâm ngih ôh, rvê ngăn”.

            Kŏ mât chăm kon tâm khoa Nhi tổng hợp bah Ngih dak si Đa khoa nkuăl Tây Nguyên, yuh Nguyễn Thị Thanh Thảo tâm nkuăl Cư Kuin, n’gor Dak Lak mbơh, yuh hôm ê bah nau phit klach rnôk ăp nar rlau aơ saơ kon nơm k’nhăck mro yor nau ji jâng ty mbung:

            ‘7h ôi nai dak si lăp khám jêh ri nai dak si hăn luh ri kon gâp jêng k’nhăk ro, păng k’nhăk nklăp 10 mnĭt ri bah, jêh ri rnôk 14h ri kon gâp kŏ k’nhăk tay đŏng, lôch 10 mnĭt ri păng khĭt lêt tât 30 mnĭt ro, lah nau ji jâk ngăn tâm nar. Dŭt klach ngăn đah kon gâp, păng tât ngăch ndrel nơm mô năn nkân”.

            Nai dak si Trần Thị Thuý Minh, Kruanh Khoa Nhi Tổng hợp ngih dak si Đa khoa nkuăl Tây Nguyên mbơh, rnôk aơ ngih dak dôl ndơn săm âk kon se geh nau ji jâng ty mbung, knŭng êng tâm du pơh aơ, Khoa hŏ ndơn săm ân rlau 10 nŭih ji. Tĭng nai dak si Minh, nau ji jâng ty mbung vay mâp tâm kon se tâm dâng 5 năm, ngăn lah kon se 3 năm. Nau ji aơ nơih ntưp ngăn. Kon se ntưp kman jêng nau ji jâng ty mbung rnôk mâp ma dak muh, dak diu, mbung, rtoh dak ndrel ăch bah nŭih ji mô lah tă bah ndơ dŏng geh pah ndơ pâl, măt sưng, ty kuăn mpông...

            Rnôk geh nau ji, kon se geh ăp nau mpơl: Ji mlông ko, luh rtoh gur tâm mpang ty, mpang jâng, mbŭm ta yơi. Đah ăp nŭih geh nau ji mô lăng jâk, nau ji mra bah êng tâm prăm prao nar. Yơn lah, du đê̆ nŭih ji păng jêng jâk jru, mô geh săk năn ri khuch ngăn tât rnok ndrel ân ba kơi âk nau ji jâk kơt lah ji tâm rngok yor kman, môr rngok:

            ‘Nau ji aơ păng khuch tât nau ji êng êng ndrel nsing tâm ăp nau ji jâk ma nơm ân geh năn săm. Ndri ma ăp u, che, me mbơ̆ ân geh njrăng ngăn tât kon nơm, rnôk kon nơm geh tât ngih dak si êp ngăn gay ma khám ndrel geh năl tâm rnok jâk jru gay ma năn tât”.

            Kŏ tĭng nai dak si trần Thuý Minh, nau ji jâng ty mbung lah nau ji tâm ntưp, ê geh vắc xin njrăng rdâng. Nau kan njrăng ji ngăn bah bah nau răk săk jăn bah kon se ân kloh ndrel săk bah nŭih mât chăm kon se đŏng, kơt lah rao kloh ty ma sa ƀu ndrel ma dak kloh, răk kloh ăp nar ăp ntil ndơ dŏng, ndơ pâl bah kon se. Đah kon se geh nau ji jâng ty mbung mô lăng jâk, mra dơi mât chăm ndrel săm êng tâm ngih. Yơn lah, me mbơ̆ ndrel nŭih mât chăm kon se ân geh uănh nrjăp nau tât bah kon se, lah saơ geh ăp nau ji jâk ri ân leo tât ngih dak si êp ngăn gay ma geh năl ndrel ma săm ân năn./.

                        Nŭih rblang: H’Thi