VOV4.M’nông: Bơi 2 khay bah năp, bu ur điều dưỡng H Wi Byă (33 năm deh), pah kan ta Khoa hồi sức cấp cứu Ngih dak si nkuăl Ea Kar dơi đă hăn pah kan ta Ngih dak si rdâng sam mrô 1 săm ji Covid-19 n’gor Dak Lak nar măng mât uănh nuĭh ji. Yuh H’Wi uănh nuĭh ji kơt nuĭh bên tâm rnăk wâl, ăp rnôk nchrăp rnôk nuĭh ji ŭch kơl.

Mông kan ôi bah điều dưỡng H’Wi Byă ntơm pah kan kơt chuh dak si, chuh si rom, ndơ̆ nội khí quản, rhôp n’hak an nuĭh ji n’hanh ntop kơl ăp nai dak si ƀư âk nău kan êng. Jêh nĕ, yuh lŏ tât nsưng ji, ôp khâl săk soan, ntrŭt đă nuih n’hâm kơl nuĭh ji đăp mpăn nuih n’hâm gay ngăch bah ji.

“Rnôk mhe lăp pah kan ta aơ, săk gâp nơm nkah gĭt ngih wâkl hô ngăn bah meng nĕ gâp dŭt rvê, lơn lah tâm yan srê Covid-19 dôl ntoh kơt aƀaơ, klach geh ntưp ji, gâp saơ âk băl ntưp ji aơ, uănh saơ nuĭh ji gâp nkah gĭt jay ngăn. Yơn rnôk lăp kan roh oi. Săk gâp nơm an nsrôih pah kan uĕh ngăn, gay ăp nuĭh ji ngăch bah ji, ơm dơi plơ̆ sĭt jay”.

Điều dưỡng H’Wi  Byă nkoch, bôl krêp dêh đah nău kan y geh 10 năm, yơn nău kan ăp nar ta Ngih dak si nkuăl Ea Kar lŏ êng âk ngăn nkôp đah ta Ngih dak si Rdâng săm mrô 1. Ta aơ nuĭh ji dŭt âk ntil, bah nuĭh têh, druh ndăm tât kon se jêt n’hanh n’ăp bu ur bŭn, geh nău mâp  an săk nơm mô geh jêt n’hanh lơn lah rnôk nuĭh ji Covid-19 lăp tâm ngih dak si săm lah an nkhah êng lĕ rngôch đah nuĭh bên. Tâm ngih dak si knŭng geh nuĭh ji n’hanh nai dak si, yor rĭ nău kan bah ăp y, nai dak si ta ngih dak si rdâng săm mô geh êng săm ji, săm ngăch ma hôm mât uănh, kơl khân pơng bah ăp nău ƀư jêt ngăn. Jêh rnôk mông kan, bu ŭm tuh dak rhal yor nsoh ăp duh lam săk lôch 7 mông. Ndrĭ yơn, ăp mông dơi rlu rlău, nău nkah gĭt jay, yô̆ kon jêt mhe geh 5 năm hao nău rngot. Bơi 2 khay ngai jay, ndơ tâm ôp ngoăy dơm đah yuh n’hanh kon sai knŭng lah điện thoại thông minh:

“Ăp tơ̆ kuăl điện sĭt jay nkoch bri đah kon, săk gâp nơm nkah gĭt ngăn, kon hôm e jêt yơn gĭt ntrŭt nsôr gâp nsrôih pah kan uĕh, ta jay bôl nkah gĭt yơn geh bơ̆ ta meng, tăng kon lah kơt nĕ gâp đăp mpăn n’hanh ăp nar mpŏng mbra ơm ntrôl rŭch srê Covid-19 n’hanh dơi plơ̆ sĭt jay đah rnăk wâl”.

Điều dưỡng H’Wi ôp khâl săk soan bah nuĭh ji Covid-19 dôl săm tâm ngih dak si rdâng săm mrô 1

Lah nuĭh bôk năp mâp n’hanh ntĭm điều dưỡng H Wi Byă knŭng yuh rgâl bah Ngih dak si nkuăl Ea Kar hăn dơn nău kan ta Ngih dak si rdâng săm mrô 1, điều dưỡng Trần Thị Quế, cán bộ mât uănh groi nđôi  ntưp kaman ngih dak si rdâng săm mrô 1 an gĭt: điều dưỡng H Wi, mô knŭng lah nuĭh geh nău kan tâm nău kan, uănh mĭn mât săm dŭt n’hâm an ăp nuĭh ji, yuh hôm lah rblang nău ngơi đah nuĭh ji lah nuĭh rnoi mpôl đêt đah ăp y, nai dak si n’hanh điều dưỡng tâm ngih dak si. Tĭng yuh Quế, nău mô tâm ban nău ngơi lah nking n’gang dŭt têh tâm nău săm ji an nuĭh ji, n’hanh nking n’gang nĕ dơi jŭt jăng knơm ăp nuĭh điều dưỡng H’Wi:

“Ta aơ gâp wơt dơm nuĭh rnoi đêt ranh đêt blău nău ngơi yoăn âk ngăn, knơm H’Wi gâp mbra dơi wât bôk năp lah nu nău kop ji, tal 2 lah nău rêh nău ŭch rnăk wâl ntrŭt nsôr bu tay”.

Nar plơ̆ sĭt đah điều dưỡng H’Wi n’hanh ăp băl ta ngih dak si rdâng săm mrô 1 mô dơi gĭt lor, rnôk rmôt nău kan hôm e âk, rnoh nuĭh ji njuăl tât mô hŏ hŭch. Ntlơi tay nău rvê n’hanh nău rŏng êng nơm, yuh hôm e nsrôih ăp nar đah du nău kan geh dŭt jêr jŏt n’hanh rlău ma nĕ, yor nău kan đah nău rêh ăp nuĭh ji dôl rdâng, tâm pit đah nău rêh ta “nău rdâng săm” aơ./.

                    Nuĭh rblang: Y Sưng Phê Ja