Ngih dak si ntŭk n’glêh dŭt bah n’gor n’hanh nkual, Mpôl kruanh Ngih dak si nkual tây Nguyên lĕ ntĭm rđău ăp khoa, jrô kan tâm pă khoa, tâm di đah nuĭh kan, ndoh ndơ dak si, nchrăp lor rnoh dak si, ăp trong nchrăp lor...an nău kan but, săm ji tâm ăp nar Tết Nguyên đán 2023. Tĭng wa Nguyễn Đại phong, Kruanh Ngih dak si Đa khoa nkual tây Nguyên, ngih dak si pă kâp uănh 24/24 mông, đăp mpăn kâp uănh tŏng ăp tĭng 4 gưl: kâp uănh kruanh rđău kan, kâp uănh nău way kan, kâp uănh hành chính n’hanh kâp uănh mpông pêr, ăp trong mkra gay dêr âk ir nuĭh ji dơi ngih dak si mbơh ƀư lor:

“Mpeh đah kon nuĭh ri mpôl hên rgŏ jă lĕ rngôch ăp rmôt nai dak si n’hanh nuĭh kan tâm rơh Tết ri mô rlu n’hanh ăp kruanh khoa jrô kan ri an kâp ta ngih dak si. Rnôk geh rmanh âk, khih ndơ sa ri mpôl hên rgŏ jă lĕ rngôch nuĭh kan bah ăp khoa gay săm ngăch nuĭh ji du trong năn, êng dak si ri mpôl hên lĕ nchrăp du đêt tâm di bơi lĕ tŏng ăp. Mpeh nău ndoh ndơ ri mpôl hên lĕ nchrăp tŏng ăp n’hanh êng mham ri tâm rơh tết mpôl hên nchrăp nklăp 20 rbăn đơn vị gay tŏng an săm ndal nuĭh ji tâm rơh Tết”.

Ăp y nai dak si kâp uănh 24/24 gay nchrăp but uănh săm ji an nuĭh ji.

Bah meng nĕ Ngih dak si hôm uĕh ngăn ăp trong săm nuĭh kop ji, săm ngăch yor prah tâm tom ndeh, khih ndơ sông sa... Tâm ăp nar tết. Uănh khlay tŏng ăp dak si rhŏ an trong kan săm ndal; njrăng n’gang nuh srê, lơn lah srê Covid-19. Nkre, nchrăp an trong kan săm ndal bah dih ngih dak si, trong kan trơn ngih dak si. Ƀư rjăp nău tâm trong, uănh săch, nkhah êng, njrăng n’gang ntưp rêng an ngih dak si đah nuih n’hâm nchrăp uĕh, tâm di ngăch. Nai dak si Chuyên khoa 2 Trịnh Hồng Nhựt, Groi Kruanh, kruanh khoa Hồi sứch cực Ngih dak si Đa khoa nkual Tây Nguyên an gĭt:

“Tâm rơh Tết mpôl hên dŭt âk jêng âk ir tâm ăp nar Tết bah mpôl hên dŭt lah âk. Dŭt lap mpôl hên geh nuĭh kan âk n’ăp nai dak si, n’ăp điều dưỡng mpôl hên tâm pă gay kâp na nao đăp mpăn nău kâp uănh Tết kơt nchrăp an tŏng ăp chôt srê Covid-19 kơt ăp srê êng geh”.

Tĭng wa Nay Phi La, Kruanh N’gâng kan dak si n’gor Dak Lak lam n’gor aƀaơ geh rlău 200 ngih dak si but săm ji. Gay tŏng ăp trong kan mât uănh săk soan nuĭh ƀon lan rơh Tết Nguyên đán, N’gâng kan dak si lĕ ndâk ƀư, mbơh trong nchrăp n’hao trong kan dak si đăp mpăn wơt Tết Nguyên đán năm 2023; tâm pă kâp uănh 24/24 mông đah kruanh ntŭk kan, nuĭh kan đăp mpăn khoa học, săk rnglăy; geh trong đăp mpăn tŏng dak si, mham, dak si rom, ndơ săm ndal, nchrăp tŏng, rhŏ trong kan săm ji, nsưng ji, ngăn lah săm ndal rmanh prah tâm tom ndeh, pháo rtoh, sôt săk, khih ndơ sông sa n’hanh săm nuĭh ntưp ji tâm rêng ta rơh Tết.

“Ăp ntŭk kan tâm pă nuĭh kan kơt ndoh ndơ khlay ngăn gay tâm di trong kan njrăng n’gang srê kơt đăp mpăn ndơ sông sa n’hanh nchrăp rdâng đah ăp nu nău. Ta aơ rlău ma nuĭh kan ơm geh ri nău kan dak si lĕ đă ăp jrô but uănh ji bah dih kơt ntŭk but uănh săm ji ta n’gor ndrel râng. Đah ăp nuĭh ji bah dih ăp nău kan bah ngih dak ri mpôl hên mbra kuăl jă ăp rmôt kan lŏng bôk tôr kơl an nuĭh ji”.

Nău kan dak si Dak Lak nchrăp dak si n’hanh nuĭh kan rhŏ mât uănh nuĭh ji tâm rơh Tết.

Kruanh N’gâng kan dak si an ntĭm đă ăp ntŭk kan tâm nău kan dơi kan trong kan dak si đăp mpăn wơt Tết Nguyên đán Quý Mão 2023 răm m’ak, đăp mpăn. Na nê̆, Kruanh N’gâng kan dak si ntĭm đă, kruanh ntŭk kan mpeh tâm n’gâng kan dak si, Kruanh N’gâng kan dak si ăp n’gor, nkual ƀon têh n’hanh ntŭk kan dak si ăp nău kan rgum ndâk njêng, mbơh ƀư trong nchrăp n’hao trong kan dak si đăp mpăn wơt Tết Nguyên đán năm 2023; tâm pă kâp uănh 24/24 mông đah kruanh ntŭk kan, nuĭh kan đăp mpăn khoa học, săk rnglăy; an mbơh rah wah săk nuĭh kâp uănh ăp nar tĭnh nău ntrŭnh.

Bah meng nĕ, mô an thơ tha, roh nău njrăng bah năp srê; ndâk ƀư rmôt, ndeh rklư kâp, uănh nđôi nu nău n’hanh mkra ngăch ăp nu nău ntoh mhe; đăp mpăn rnă njrăng mạng, nău khlay gay ăp trong mbơh nău, ndoh ndơ dữ liệu pah kan đăp mpăn rhŏ an uĕh ngăn an nuĭh ƀon lan n’hanh doanh nghiệp, ngăn lah ta ăp ntŭk but uănh, săm ji; ƀư uĕh nău mât uănh, ntrŭt nsôr nuih n’hâm đah rmôt kan njrăng n’gang srê n’hanh cán bộ dak si pah kan ta ntŭk kan.