Tĭng nău mbơh bah Ntŭk rgum mât kân kop ji n’gor Dak Lak, ta n’gor mhe năl geh kon se ji khĭt tă bah nău ji jâng ti mbung. Aơ lah nuĭh khĭt tâl 4 tă bah nău ji jâng ti mbung ta n’gor kơp ntơm bah bôk năm tât aƀaơ. Kon se ji deh năm 2021, ta xã Ia Lốp, nkuâl Ea Súp, n’gor Dak Lak.

Tĭng rnăk kon se ji, nar 11/11, kon se ji geh nău mpơl kop duh mbro, bĭch ndrât âk, luh mŭn dak ta mpang jâng, lhut dô mbung. Rnăk njŭn mon hăn but săm n’hanh ngêt dak si tĭng siƀŭt nchih. Nar 12/11, kon se geh nău mpơl ji jru jêng me bơ̆ njŭn hăn but săm n’hanh lăp nhih dak si ta Trung tâm Y tế nkuâl Ea Súp. Ndrel nar kon se dơi rdeng tât Nhih dak si nkual Tây Nguyên. Ta aơ, kon se nchroh nău ji jâng ti mbung n’hanh geh djôr n’hâm rnoh IV, bih mham, luh mham proch n’hanh môr klơm soh ndal. Tât ôi nar 13/11, kon se khĭt./.