VOV4.M'nông: Tĭng rnoh nchih rgum bah Ntŭk rgum mât kân kop ji n'gor Dak Lak, nău ji luh mham rih dôl ntưp âk rnôk du pơh năl geh nklăp 400 nuĭh ji. Aơ lah nău mpơl mbơh njrăng lor geh ma nău ntoh luh nuh srê tâm let năp tay. Dơn kơp êng tâm 3 nar mhe aơ (25-26-27/7) Dak Lak năl geh 200 nuĭh ji ntưp mhe, tâm nê geh 114 nuĭh ji luh mham rih Dengue jru. N'hao lĕ rngôch rnoh nuĭh ji luh mham rih ta Dak Lak hao 2.211 nuĭh, âk rlău 4,4 tơ̆ rđĭl đah ndrel khay dja năm 2021.

Nău ji luh mham rih năl geh lĕ rngôch ta 15/15 nkuâl, thị xã, nkual ƀon têh, tâm nê 3 nkuâl geh rnoh nuĭh ji luh mham rih dŭt âk lah Ea Súp, Krông Pách n'hanh nkual ƀon têh Buôn Ma Thuột. Tĭng wa Hoàng Hải Phúc, Groi Giám đốc Mât uănh Ntŭk rgum kan mât kân kop ji n'gor Dak Lak nklăp nuh srê ntưp dŭt hô tâm khay 8 n'hanh khay 9, yor kơt nê̆, ndrel đah ăp nău nsrôih bah n'gâng kan dak si, ăp nuĭh ƀon lan ân n'hao nău  gĭt êng, tĭng ƀư jăp ăp trong njrăng n'gang nuh srê kơt mpôih kuaih kloh uĕh ntŭk gŭ rêh, mbluh aih n'hong dak sor, rlơt nkŭp ăp ndơ đâng dak, nkhĭt tăp măch./.

         Nuĭh rblang: Điểu Thân