Tĭng nău mbơh bah Ntŭk rgum mât kân kop ji (CDC) n’gor Dak Lak, ta n’gor mhe năl geh du đêt tơm nuh srê ji luh mê gŭr ta nkuâl Cư Kuin. Aƀaơ n’gâng kan dak si n’gor hŏ  an  ƀư  ăp trong rdêl bah nuh srê, mô an nuh srê ntưp rêng ta ntŭk. Tơm nuh srê geh ta xã Ea Bhốk n’hanh Drây Bhăng đah 2 hê nuĭh ntưp đah ji luh mê gŭr. Tĭng bác sĩ Nguyễn Khắc Dũng – Giám đốc Trung tâm Y tế nkuâl Cư Kuin, n’gor Dak Lak, lôch năl geh nuh srê ji luh mê gŭr.

Trung tâm hŏ kan nsum đah Ntŭk rgum mât kân kop ji n’hanh Nhih dak si xã ƀư ôp uănh,  groi nđôi nuĭh ji, puh ntŭk gŭ rêh ma  dak si Cloramin B; Ntĭm nti rnăk wâl puh nkhĭt kaman ndơ pâl rlưn kon se, ndơ dŏng sa, ntŭk gŭ rêh bah kon se n’hanh nkoch trêng na nê̆  pah kan rdâng lơh ji luh mê gŭr wăr jay nuĭh geh ji.  Nkre ƀư  hăn ôp uănh, nchih rgum lĕ rngôch kon se ta nâm 5  năm deh mô hŏ dơi chuh n’gang, chuh mô hŏ tŏng n’glai mô lah mô gĭt kloh tă gĭt hŏ chuh n’gang nău ji luh mê gŭr, ji luh mê gŭr – rubella gay ntop chuh tay, chuh ntêr an kon se.