Ôi 19/4, n’gâng kan dak si Dak Lak hŏ tĭng ƀư test COVID-19 an ăp kon se nti nhih nti THCS Trưng Vương, phường Thành Công, nkual ƀon têh Buôn Ma Thuột. Bah năp nê, nar 18/4, ta nhih nti dja hŏ năl geh 8 nuĭh ntưp đah SARS-CoV-2. Tĭng nê, n’gâng kan dak si Buôn Ma Thuột hŏ ƀư test ngăch an 49 nuĭh lah ăp kon se nti geh mâp dăch đah ăp nuĭh ji.

Kêng dŭt, năl geh tay 7 nuĭh ntưp đah kaman SARS -CoV2, ăp nuĭh dja ndrel nti jrô 8D đah ăp nuĭh ji năl ntưp bah năp nê nơh. Aƀaơ n’hâm suan bah  8 kon se nti geh COVID-19 đăp mpăn, ăp kon se đă gŭ săm êng ta jay da dê n’hanh geh cán bộ dak si tĭng groi nđôi ăp nar. Tât nŭng nar 19/4 lĕ rngôch nuĭh ntưp COVID-19 ta n’gor Dak Lak lah 22 nuĭh, êng nkual ƀon têh Buôn Ma Thuột năl geh 17 nuĭh, tâm nê geh 15 nuĭh ntưp bah tơm nuh srê nhih nti THCS Trưng Vương. Bác sĩ Nguyễn Văn Lý, Groi Giám đốc Trung tâm Y tế nkual ƀon têh Buôn Ma Thuột an gĭt, ta năp ăp nău tât krit nji bah nuh srê COVID-19 rnôk rnoh nuĭh ntưp ji geh nău mpơl hao âk tâm ăp nar rlău aơ, n’gâng kan dak si nkual ƀon têh hŏ nsŏng kơl an Ủy ban nhân dân nkual ƀon têh mpeh trong njrăng n’gang  nuh srê COVID-19.