Nar 2/11, tĭng nău mbơh bah Ntŭk rgum mât kân kop ji (CDC) n'gor Dak Lak, ta n'gor mhe năl geh du hê nuĭh ƀon lan mpơl luh mŭn gŭr ta săk rnôk hăn pâl nđaih bah Nam Phi sĭt.  

Nuĭh ji dja lah wa N.V.P, deh năm  1963, ta tổ dân phố 02, thị trấn Quảng Phú, nkuâl Cư M’gar, n'gor Dak Lak. Tĭng nău mbơh bah wa P. nar 19/10/2022 păng ncho ndeh păr bah Việt Nam hăn tât dak Nam Phi gay pâl nđaih. Tâm rnôk hăn pâl nđaih păng hăn tât âk ntŭk n'hanh mâp, nkoch bri, nhŭp ti đah âk nuĭh. Nar 26/10, wa P. ncho ndeh păr plơ̆ sĭt bah Việt Nam (tach ndeh păr Nội Bài) geh jŭr rlu ta tach ndeh păr Singapore, lôch nê ncho ndeh păr sĭt Dak Lak. Tât nar 01/11, păng mpơl geh ji lam săk ji kô̆ mâk n'hanh luh âk mŭn gŭr ta ndŭl n'hanh ndôn kơi, păng hŏ mbơh ngăch dăng n'hâm suan. Ntơm bah nar 26/10 tât aƀaơ wa P. geh mâp đah ăp nuĭh tâm rnă n'hanh wăr kiău ma. Yơn ăp nuĭh geh mâp dăch đah wa P., aƀaơ mô hŏ geh mpơl ji, n'hanh dôl an gŭ rgum êng ta jay. N'gâng kan dak si hŏ sŏk dak luh mŭn gŭr ta ntô n'hanh dak ntêng ta rmlông ko bah wa P. njuăl tât Viện Vệ sinh Dịch tễ Tây Nguyên ƀư uănh năl.

Sở Y tế Dak Lak hŏ geh siƀŭt njuăl ndăn ngăch rđău đă ăp nău  kan njrăng, n'gang nuh srê ji rtoh luh dôk; Mât ăp rmôt kan hăn kơl ngăch ta nhih pah kan n'hanh ăp nhih dak si, Trung tâm Y tế nkuâl, thị xã, nkual ƀon têh; An tĭng ƀư trong njrăng n'gang rdâng lơh nuh srê ji rtoh luh dôk ta ntŭk; n'hao dăng pah kan nkoch trêng njrăng, n'gang nuh srê ji rtoh luh dôk n'hanh kan nsum đah ăp nhih pah kan nsum mpôl geh trong rƀŏng nkra ngăch mô an nuh srê ntoh luh lam ƀon lan.

VOV Tây Nguyên/Nuĭh rblang: Điểu Thân