Nkhêp di 69 năm Nar nai dak si Việt Nam, nar nđaơ (27/2), N’gâng kan dak si n’gor Dak Lak ƀư rgum nchră gay nkah gĭt ăp trong hăn têh ang bah nău kan dak si tâm nău kan mât uănh, njrăng n’gang săk soan bah nuĭh ƀon lan tâm ăp năm bah năp.

Ta rgum nchră, wa Nay Phi La, Giám đốc N’gâng kan dak si n’gor Dak Lak an gĭt, đah nău nsrôih bah nsum mpôl kruanh, cán bộ, công chức, viên chức, nuĭh pah kan ăp năm bah năp, nău kan dak si Dak Lak lĕ dơi geh nău rƀŏng, rnoh an dơi jao, rgop đăp mpăn trong kan mât uănh săk soan nuĭh ƀon lan ta ntŭk.

Tât abaơ, 100% ăp xă, phường, nkuăl têh geh ngih dak si; 97% ngih dak si geh nai dak si rhŏ kan, 100% ngih dak si geh măy tính boăt nthoi mạng n’hanh ứng dụng ăp phần mềm mât uănh dak si. Rnoh geh bảo hiểm y tế rlău 92%. Bah meng nĕ ăp săk rnglăy dơi geh, ăp năm bah năp, nău kan dak si n’gor Dak Lak mâp âk jêr jŏt kơt nău pă an dak si, ndoh ndơ, hóa chất rhŏ an nuĭh ji hôm e mô tŏng; nuĭh kan mô hŏ tâm di nău ŭch, lơn lah nău mô tŏng nai dak si geh nti nău way kan n’hanh jru.