Jêh 2 khay nti re dak, aƀaơ, oh H Trần Kbuôr, ta ƀon Triết, xă Ea Kuêh, nkuăl Cư M’gar, n’gor Dak Lak lĕ gĭt re blău n’hanh dơi mkra ăp nu nău lah mô lap tŭp tâm dak. H Trần nkoch, knơm geh jrô nti re an dơm dơi ƀư ta ngih sam ƀŭt jêng oh n’hanh ăp băl dŭt ŭch hăn, nti ƀa ƀơ kêng măng nar pe n’hanh nar prăm ăp pơh:

Jrô dŭt răm. oh mpŏng lah bôk nău kan dơi rêng hvi âk lơn gay an ăp băl jêr jŏt êng dơi nti re dak kơt oh.

Ta nkual ƀon têh Buôn Ma Thuột n’hanh ăp nkual kiău ma, tâm rơh rlu nti aơ geh âk jrô nti re dak n’hanh tiăr nti nău blău đăp mpăn tâm ntŭk ntô dak dơi ƀư. Wa Nguyễn Thị Thúy Hiền, Groi Giám đốc mât uănh Ngih văn hóa Thanh thiếu nhi n’gor Dak Lak an gĭt: lĕ rngôch ăp oh râng nti ta ntŭk tâm khay rlu nti dơi an râng nti re n’hanh rlet rlău ăp nău pâl tâm dak.

Jrô nti re dak an dơm yor Ngih sam ƀŭt Tiểu học Lý Tự Trọng tâm rgop rgop đah nai Nguyễn Đình Ngư ƀư, đah 30 kon hŏk geh nău rêh jêr jŏt, bah jrô 2 tât jrô 5 râng. Nkre nti re, ăp oh nkre dơi nti ăp nău blău đăp mpăn tâm ntŭk ntô dak; trong săm kơl ndal rnôk geh nuĭh rmok dak.

Ndơ̆ kon tât nti re, wa Y Lem Byă, ta ƀon Wing, xă Ea Kuêh, nkuăl Cư M’gar, an gĭt: gŭ ta xă geh âk n’glău, dak diăng jêng rnăk wâl dŭt rvê yor ăp kon geh tât pâl, ngăn lah tâm rnôk rlu nti. Đah nău nsum  nti bah ngih sam ƀŭt n’hanh ăp nai, ăp kon lĕ geh âk nar nti răm rhơn n’hanh năp nău blău uĕh.

Kon nti re ta aơ dŭt răm. Lah uĕh nai, ngih sam ƀŭt lĕ an mon nti re. Gĭt re hôm, lah hăn tâm mir ma geh n’glău geh dak ri mon dơi mkra êng, dơi re.

Mpôl hên mbra dăp ăp bôk nău an ăp oh ƀư bên n’hanh rlet rlău ăp nău pâl tâm dak. an mkra nău bôk năp lah ăp oh an lĕ klach dak n’hanh jêh nĕ mbra ƀư ăp nău pâl rlưn an ăp oh n’hanh tâm pleh kơt nĕ mpôl hên mbra ƀư na nao tâm yan rlu nti.

Hôm ta ăp ntŭk nkual jru ngai, tâm n’gor, ăp bôk nău ƀư “nti re an dơm”, “n’glău dak ê nkra” dơi ƀư ƀa ƀơ, dơi geh nău uănh tât, hăn ndrel bah ăp ntŭk kan, nuĭh lŏng bôk tôr.

Nô Võ Tiến Tuấn Niê, Groi Kruanh rnâng kan Hội đồng đội n’gor Dak Lak an gĭt, bah năp khay rlu nti, n’gor đoàn, hội đồng đội n’gor lĕ geh sam ƀŭt ntĭm rđău ăp nkô̆ nău rlu rlău khay mih tât ăp đoàn bah dâng n’hanh hội đồng đội ăp nkuăl, nkual têh, nkual ƀon têh. Tâm nĕ uănh khlay ăp nău ƀư njrăng n’gang sôt rmanh, rmok dak an kon se. N’gor đoàn ƀư tiăr nti an ăp rmôt  mât uănh kon se ta gưl bah dâng; rgŏ jă nuĭh gay ndâk njêng ăp bể dak ta ăp ntŭk, mât ăp jrô ntĭm re an dơm ta ăp ntŭk ƀon lan gŭ.

Tĭng nô Tuấn đŏng, njrăng n’gang sôt rmanh, rmok dak lĕ dơi ndơ̆ tâm trong rnoh ƀư ăp nău kan khay mih ta ntŭk, dơi ăp gưl đoàn uănh tât, dăn rgŏ jă nuĭh bah ơm.

Ntơm bôk năp, rnôk an sam ƀŭt ntĭm rđău mbơh ƀư ri mpôl hên lĕ ntĭm rđău an 100% ăp nkuăl, nkuăl têh, thành đoàn mbra ƀư đêt ngăn du jrô re dak an dơm tâm yan mih năm aơ. Kơp n’hanh rgum lĕ ngăch yan mih ri lam n’gor, êng ăp nkuăl, nkual têh, nkual ƀon têh dơi ƀư geh nklăp 20 jrô nti re an dơm đah tât râng bah rlău 1.000 kon se.

N’gor Dak Lak aƀaơ geh rlău 500 rbăn kon se, geh bơi 27% rnoh nuĭh ƀon lan lam n’gor. Bah bôk năm 2024 tât aƀaơ, ta n’gor lĕ geh 25 kon se khĭt yor rmok dak, tâm nĕ geh âk nuĭh rmok nsum. Yor nê, nău ntrôl dăng ntrong leo ntĭm re an kon se an dơi uănh tât âk lơn, gay ăp oh gĭt n’hanh năp ăp nău blău khlay, đăp mpăn tâm ntŭk ntô dak, dơi mât njrăng săk nơm n’hanh ăp nuĭh kiău ma rnôk mô lap geh tŭp tâm dak. Tă bah nĕ, rgop n’hŭch nău rmok dak, gay ăp oh geh ăp nar rlu nti geh nkô̆ nău n’hanh đăp mpăn.