Ta năp nău tât krit hô bah ji so ndrăng kăp tâm bah ri aơ rnôk mô hŏ tât 3 khay bôk năm hŏ năl geh 4 nuĭh khĭt tă bah nău ji so ndrăng kăp, kêng măng 20/3, Ủy ban nhân dân n’gor Dak Lak ƀư tâm nchră pơk sŏng dăng gay uănh năl nô nău pah kan njrăng n’gang ji so ndrăng kăp  ta n’gor.  

Ntơm bah năm 2023 tât nar 19/3/2024, n’gor Dak Lak geh 8 nuĭh khĭt tă bah ji so ndrăng kăp, âk tâl 3 lam dak. Êng ntơm bah bôk năm tât aƀaơ, n’gor dja geh 4 nuĭh khĭt tă bah ji so ndrăng kăp, dah rnoh âk khĭt ji so ndrăng kăp lĕ ma năm 2023. Ủy ban nhân dân n’gor Dak Lak an gĭt, gay bah ir ntoh ji so ndrăng kăp tâm ban kơt hŭch rnoh nuĭh khĭt tă bah ji so ndrăng kăp, ăp n’gâng kan dơi kan n’hanh ăp n’gâng kan tâm dâng ân rgum ăp tơm ndơ gay tĭng ƀư jăp ăp trong nchrăp  njrăng n’gang ji so ndrăng kăp ma n’gor hŏ n’gluh an dŏng. Tĭng UBND n’gor, trong nkra dŭt geh nău tam gay hŭch bah ji so ndrăng kăp lah n’hao rnoh âk chuh vaccine njrăng n’gang ji so ndrăng kăp, nsrôih  chuh vaccine ji so ndrăng kăp rlău 70% lĕ rngôch rnoh so meo tâm lvang năm 2022 - 2025, hăn tât geh 80% tâm lvang năm 2026 - 2030.