Dak Lak dôl dơi geh ăp nău dơi têh tâm nău kan njrăng rdâng kop sâr. Aơ mbra lah nău nsrôih gay ma Dak Lak, n’gor gôl yôk geh âk nuĭh rnoi đê̆ ƀư tĭng nkô̆ mpong kan tât năm 2028 mbra geh mbơh njrăng bah nău kop sâr aơ.

Đah ƀon lan nuĭh Rđe ta ƀon Kom Leo- ntŭk geh kơp dơn âk nuĭh ntưp kop sâr ta xã Hòa Thắng, nkuăl ƀon têh Buôn Ma Thuột tâm ăp năm ba năp, rĭ nău ji kop sâr aƀaơ lĕ mô hôm geh. Yuh Hrobeca Mlô, ƀon Kom Leo an gĭt.

“Ta ƀon rĭ lĕ rngôch ăp nuĭh ƀon lan hăn pah kan ta mir âk, geh nuĭh rĭ hăn ta bri pâk ƀăng. Aƀaơ nău mĭn mât bri geh n’hao âk hôm, khân păng geh gĭt vât âk lơn hôm. Bâh geh ta trạm y tế jŭr mbơh tơih rgŏ jă, aƀaơ lah geh kop sâr rĭ tât săm êng ta trạm y tế, mô hôm kơt ntơm kuăl bu n’hŭm, lah ta bri rĭ geh njôt mŭng phôi nkre lah hăn bĭch ta mir ta bri”.

Tĭng nău mbơh bâh nai dak si Hoàng Văn Hùng, kruanh trạm y tế xã Hòa Thắng an gĭt, nău gĭt vât n’hanh nău mĭn njrăng rdâng nuh srê bâh ƀon lan ăp nar lơ ma n’hao. Nău rêh geh rgâl mhe jêng nău hăn ta bri, hăn ta mir âk nar lĕ mô hôm geh, ndrel đah nĕ nău mbơh tơih ăp nău kan njrăng kop sâr lĕ geh trạm y tế uănh khlăy.

“Trạm y tế ƀư mbơh tơih rgŏ jă ăp khay an mpôl kan cộng tác viên gay ma n’hao nău mbơh tơih njrăng nău kop sâr an ăp nuĭh mbra geh tâm ntưp âk kơt lah hăn bĭch ta mir, ta bri lôch nĕ geh nuĭh hăn pah kan ngai ta ăp ntŭk êng dôl geh ntưp nuh srê kop sâr, lôch nĕ pă mŭng phôi geh mbŭk dak si njrăng măch”.

Tĭng nău mbơh bâh nai dak si Võ Minh Hùng, Giám đốc ntŭk kan dak si nkuăl ƀon têh Buôn Ma Thuột, năm 2022, lĕ rngôch 21 xã phường bâh nkuăl ƀon têh  lĕ mô hôm geh kop sâr mbro ta ntŭk, ăp nău mât đăp mpăn gay ma njrăng kop sâr lĕ geh mât ƀư ƀa ƀơ. Nai dak si Võ Minh Hùng an lah, bol ma kơt nĕ, nkuăl ƀon têh hôm nha geh mbơh ƀư ăp trong kan njrăng rdâng nău kop sâr plơ̆ tay.

 “Nău ma gay njrăng rdâng dơi kop sâr tâm năm 2022 lah ăp nău dơi geh bôk năp dơm, tâm let năp tay an hôm nha geh n’hao nău pah kan mbơh tơih tât đah ƀon lan, ngăn lah hăn bĭch ta mir ta bri, mô lah hăn pah kan ta ntŭk êng mpeh nău gay ma bu gĭt vât nău mât ueh săk soan an ntŭk rêh jêng, rlău ma nĕ hên mbra geh n’hao ăp jrô nti nău kan gay ma n’hao nău gĭt vât an cán bộ dak si mpeh nău kan ngăch saơ, nău kan mbơh tơih n’hanh nău kan ntĭm mbơh ntĭm nti nău mbơh tơih nău mhe an nuĭh ƀon lan mpeh ăp trong kan njrăng rdâng kop sâr ta nkuăl ƀon têh”.

Tĭng ntŭk kan mât njrăng nău kop ji n’gor Dak Lak, nău nuh srê kop sâr lĕ ntơm bah tâm 3 năm ba năp. Lah kơt ta năm 2020, lam n’gor kơp dơn 126 nuĭh ji kop sâr, rĭ tât năm 2021-2022, ăp năm kanŭng geh kơp dơn rlău 10 nuĭh. Rlău ma nkuăl ƀon têh Buôn Ma Thuột lĕ geh kơp dơn njrăng rdâng bah nău kop sâr, aƀaơ geh 6 nkuăl nkuăl ƀon têh mbơh mbra njrăng săm bah nău kop sâr ta dŭt năm aơ.

Nai dak si Hoàng Hải Phúc, groi Giám đốc mât nău kan ntŭk kan mât njrăng nău ji n’gor Dak Lak an gĭt, bol ma nău kan njrăng rdâng kop sâr ta n’gor geh nău dơi khlăy, yơn ta Tây Nguyên n’hanh du đê̆ n’gor bâh dak he hôm nha geh nău tât jêr njrăng, mbra geh kop sâr n’hanh ntoh ntưp nuh srê hôm âk. Yor nĕ, tâm let năp tay, ntŭk kan leo kan njrăng rdâng rdâk njêng nău nchrăp njrăng rdâng nuh srê kop sâr plơ̆ ntưp tay, mât ueh ăp nău kan uănh nđôi ƀa ƀơ way geh ta lĕ rngôch ta ăp trong hăn:

“Mpôl hên ntrôl dăng nău kan mbơh tơih rgŏ jă an nuĭh ƀon lan n’hanh ăp n’gâng kan ndrel tâm rgop. Tal 2 tay lah hên n’hao nău uănh nđôi ăp nuĭh ntưp srê, tal pe lah nău uănh năl nuĭh ntưp srê njrăng ta ăp ntŭk ntưp âk. Ăp khay ăp pơh jŭr uănh năl ăp nuĭh tă hăn bĭch ta bri ta mir, ăp nuĭh ntôn geh ntưp rĭ sŏk ntil mham gay ma ngăch năl ăp nuĭh mbra ntưp n’hanh nkre lah mpôl hên mbơh tơih ăp trong kan pă mŭng mbŭk dak si ta 2 rơh”.

Ăp nău geh dơi tâm nău njrăng rdâng kop sâr ta n’gor Dak Lak lah nău nsrôih gay ma n’gor ntrôl njrăng bah an nău nuh srê aơ, mpŏng tât njrăng bah kop sâr ta năm 2028.