N’gâng kan Thú y n’gor Dak Lak dôl nsrôih kan nsum đah ăp nkuâl, thị xã, nkual ƀon têh lor nchrăp nkoch trêng nuĭh ƀon lan njrăng, n’gang ji so ndrăng kăp; nkre an ƀư chuh vaccine an so, meo. Tĭng nchih rgum bah Chi cục Mât rong n’hanh Thú y n’gor Dak Lak an saơ, lam n’gor geh nklăp 180.000 mblâm so, meo bah ăp rnăk mât. Ntơm bah bôk năm tât aƀaơ, ta n’gor hŏ geh 2 hê nuĭh khĭt tă bah ji so ndrăng kăp, bar pe jât nuĭh êng ƀa ƀă dơi chuh n’gang ngăch.

Nhih pah kan dơi kan hŏ năl saơ, nkhĭt jăng bar pe jât mblâm so ndrăng. Nklăp 64.000 mblâm so, meo hŏ dơi chuh vaccine ji so ndrăng kăp tâm bôk năm. Wa Trần Ngọc Sơn, Groi Chi cục trưởng Chi cục Mât rong n’hanh Thú y Dak Lak mbơh gĭt, aƀaơ ndrel đah nău ntrôl dăng pah kan chuh n’gang vaccine an so, meo, n’gâng kan dak si nsrôih kan nsum đah ngor nkoch trêng gay nuĭh ƀon lan n’hao nău gĭt êng, lor nchrăp njrăng n’gang ji so ndrăng kăp, mât krŭng ndơ mât./.