VOV4.Mnông- N’gor Dak Lak dôl ntrôl ngăch nău kan chuh vacxin njrăng Covid-19 nglai nkah tay tât ăp xã, phường, đah trong kan hăn ta ăp jay, ăp rnăk, uănh nđôi tât ăp nuĭh gay ma chuh an ƀon lan. Tĭng nĕ, bâh aƀaơ tât lĕ khay 6 aơ, Dak Lak nsrôih chuh lĕ bơi tât 260 rbăn dĭng vacxin njrăng Covid-19 lĕ geh pă an. Rnoh vacxin aơ geh dŏng gay ma chuh nglai 3 n’hanh nglai 4 an nuĭh ƀon lan bâh 18 năm deh let lơ, đah nău ŭch rlău 95% nuĭh ƀon lan bâh 18 năm deh let lơ geh chuh nglai 3, n’hanh ăp nuĭh bôk năp njrăng srê, nuĭh ơm geh nău ji an geh chuh nglai 4.

Tĭng ntŭk kan mât njrăng nău ji n’gor Dak Lak, aƀaơ rnoh chuh vacxin njrăng Covid-19 nglai 3 ta n’gor mhe geh rlău 32%, n’hanh nglai 4 mhe geh 1,5%. Aơ lah rnoh dŭt đê̆ đah nău ntrŭnh bâh n’gâng kan dak si. Wa Hoàng Hải Phúc, groi giám đốc ntŭk kan mât njrăng nău ji n’gor Dak Lak an gĭt, gay ma nău chuh vacxin njrăng Covid-19 mât đăp mpăn di nău ngăch kan, ntŭk kan lĕ mbơh an ntŭk kan dak si pă mbơh nău ntrŭnh na nê̆ an 15 nkuăl, nkuăl ƀon têh, tâm nĕ đă ăp ntŭk an geh hăn tât ăp jay, ăp rnăk, ăp nuĭh gay ma chuh an ƀon lan.

“Mpôl hên mbơh nău mpŏng kan gay ma ta nkuăl mbơh ôp đah ủy ban nhân dân nkuăl gay ma geh trong kan răng dăng đah ăp ntŭk, ăp n’gâng kan gay ma ƀư tĭng. Mpôl hên pă vacxin, mơh ntŭk i mô hŏ dơn vacxin rĭ rnâng kan ntĭm đă bâh nkuăl an geh tâm ton đah ủy ban n’gor lah an geh nău ntưp rêng nuh srê ta ntŭk ntŭk nĕ dơn kan êng. Mpôl hên ƀư tĭng nău kan mbơh tơih ta ăp ntŭk kan ntoh rup ntoh ngơi sŏng dăng mhâm ƀư gay ma ƀon lan gĭt nĕ lah ăp nău ntrŭnh, nău kơl an bâh Đảng n’hanh nău dơi kan bâh nuĭh ƀon lan lah an geh tât râng, yor chuh vacxin aơ lah chuh vacxin njrăng rdâng đah Covid-19.

Nuĭh rblang: Thị Đoắt