Ôi lơ 17/4, N’gâng kan dak si Dak Lak ƀư rƀŭn ntrŭnh khay kan kơl an “Yor nau đăp mpăn ndơ sa năm 2023”. Khay ƀư nau kan geh ntơm lơ 15/4 tât 15/5/2023 đah nkô̆ “Mât đăp mpăn, kloh ueh ndơ sa tâm rnôk mhe”. Tĭng nê, tâm lam n’gor mra ntrŭt dăng nau nkoch trêng, ntĭm mbơh gay ma n’hao nau gĭt, năl nau kan ndrel nau bư bah ăp gưl kan uỷ đảng, cán bộ, đảng viên ndrel ƀon lan tâm nau mât đăp mpăn, kloh ueh ndơ sa, n’hao nau dơi nau kan bah ăp ntŭk, ăp nŭih ƀư nau kan tăch rgâl tâm nau ƀư tĭng pháp luật mpeh nau đăp mpăn ndơ sa.

N’hao nau kan mêt uănh, nkân njrăng tâm nau ƀư nâp, đăp mpăn ndơ ngêt sa, nsôih lơh, rdâng, rklaih mhal ân rjăp đah ăp ntŭk, ăp nŭih, ăp ntŭk ƀư nau kan ê nkra tăch rgâl geh nau tih mpeh nau ntrŭnh bah đăp mpăn ndơ ngêt sa, n’hao nau dơi tâm nau njrăng, rdâng rklaih nau khih ndơ sa ndrel ăp nau ji tâm ntưp bah ndơ ngêt sa, n’huch nau khuh ndơ sa mô geh nau kloh kah. Năm 2022, lam n’gor Dak Lak geh 3 tŏ khuh ndơ sa đah 18 nŭih, 10 nŭih lăp` săm tâm ngih dak si, mô geh nŭih khĭt./.