Ngih dak si nkuăl M’Drăk, n’gor Dak Lak geh 12 khoa n’hanh 13 ngih dak si xă, nkuăl têh yơn mô knŭng geh 43 nai dak si n’hanh 11 nai dak si chuyên khoa 1. Tĭng wa Lê Thị Thủy, Giám đốc Ngih dak si nkuăl M’Drắk, bah kơi năm 2019 đah nău ƀư tĭng ăp Thông tư 37 n’hanh Thông tư 07 bah N’gâng kan mpeh nău lăp nsum ăp Ngih dak si âk ntil nău kan ri ngih dak si gưl bah dâng ƀư tay âk nău kan kơt: but uanh săm si, dak si nchrăp njrăng, rnăk wâl deh kon đêt, mbơh ƀư ăp bôk nău kan rƀŏng tĭng lam dak mpeh dak si... du đêt cán bộ an ƀư âk nău kan tâm rnoh nău kan têh. Nău aơ ƀư rmôt dak si bah ngih dak si an nsrôih rlău 2-3 tŏ mư jêh nău kan dơi jao. Nău kan âk, nuĭh kan mô tŏng ƀư rmôt nai dak si gưl bah dâng geh rnôk dŭt âk. Wa Lê Thị Thủy an gĭt:

“Bôl he geh nău ŭch săch n’hanh geh âk nău kơl bah Ngih dak si kơt wăch rgum Nghị quyết bah Hội đồng nhân dân n’gor yơn ma mô geh nai dak si sĭt dŭt âk rơh săch dŏng. Yor nê đah ntŭk kan, rlău ma nchrăp lor ntĭm nti hao prêh cán bộ ta ntŭk, mpŏng ŭch geh nău kơl tong ăp mpeh nău kơl an, wăch rgum êng an cán bộ lơn lah nai dak si jêh ê̆ cán bộ uĕh blău âk mpeh trong kan ta gưl bah dâng”.

Bôl âk nsưng, ndoh ndơ dak si dŭt tŏng ăp, yơn mô dơi săch nai dak si jêng âk năm bah năp Ngih dak si nkuăl Krông Buk (n’gor Dak Lak) mô jêng ăp chuyên khoa chrai kơt mbơh ƀươ ăp kỹ thuật mhe. Tĭng wa Trần Anh Hùng, Groi Giám đốc Ngih dak si nkuăl Krông Buk, nĕ lah nkô̆ nău khuch tât trong kan but uănh săm ji, kơt uĕh tam dak si ta ntŭk.

“Nai dak si dŭt mô tŏng, aƀaơ ăp nai dak si dôl pah kan ta Krông Buk kơt mhe jêh nti, mô hŏ geh sam ƀŭt pah kan, mô geh nău blău ơm. Lơn lah mô tŏng nai dak si chuyên khoa ngoại, chuyên khoa sản n’hanh chuyên khoa gây mê hồi sức n’hanh ăp nai dak si chuyên khoa chrai jêng nău sŏk dŏng but uănh săm ji mpeh hệ ngoại sản knŭng săm bôk năp gay ndơ̆ ngih dak si bah lơ dơm. Hôm rak mô dơi mbơh ƀư yor mô geh nai dak si ƀư nho, nai dak si rek. Mpeh but uănh ji ri Ngih dak si mô geh nai dak si chuyên khoa chrai ri mô dơi but uănh săk soan n’hanh sam ƀŭt but uănh săk soan an nuĭh ƀon lan”.

Tĭng N’gâng kan dak si lam n’gor dôl mô tŏng rlău 1.700 biên chế y tế, n’hanh geh 7,15 nai dak si/rmưn nuĭh ƀon lan nkôp đah nău ntrŭnh lah 8 nai dak si/rmưn nuĭh ƀon lan. Nu nău âk nuĭh ji dôl geh ta âk ntŭk ngih dak si bah n’gor, đah âk nsưng ta rnoh 110% tât 130%. Nkô̆ nău khlay jêng tât nău mô tŏng nai dak si ta gưl bah dâng yor ntŭk ntô pah kan jêr, âk. Tâm rnôk nĕ, nău kơl an prăk khay tĭng gưl nău kan n’hanh ăp nău ntop kơl êng tĭng rnoh prăk khay đêt ngăn uănh nsum hôm e đêt, mô hŏ tâm di nkôp đah nău kan.

Gay mkra nu nău aơ, nău kan dak si Dak Lak lĕ tâm ôp tâm nchră an Ủy ban n’gor trong mkra jao an rmôt Y tế Dự phòng mpeh an ăp ntŭk mât uănh n’hanh ntuh kơl. Nkre Nău kan dak si mbra ndâk njêng du đêt Nău rgop tâm nchră dŏng nai dak si bah dih lăp but uănh săm ji ta ngih dak si ngih dak n’hanh trok ăp nău kơl tâm di. Nău săch ăp y, nai dak si ta ntŭk dơi kơl an ƀư tĭng tâm năm tât. Wa Nay Phi La, Giám đốc N’gâng kan dak si n’gor Dak lak an gĭt:

“Aƀaơ ri N’gâng kan dak si lĕ ndơ̆ an âk trong mkra, trong ƀư kơt ăp nuĭh deh, têh ta ntŭk mbra dơi wơt dơn sĭt ta ntŭk nĕ dâl. Năm 2023 mbra uănh săch ta lơn lah kơl lor ngih sam ƀŭt Đại học Tây Nguyên, Đại học Buôn Ma Thuột kơt ăp sinh viên geh ŭch sĭt pah kan ta n’gor”.

Mô tŏng nuĭh kan, lơn lah rmôt nai dak si dôl ntŭl rlong mô jêt đah nău kan dak si Dak Lak. Bôl năm bah năp, n’gor lĕ mbơh ƀư âk nău kơl wăch rgum nai dak si kơt uănh mĭn đă cán bộ dak si hăn ntĭm nti hao prêh nău way kan, yơn mô hŏ tâm di nău ŭch ngăn. Gay mât jâng n’hanh wăch rgum geh nai dak si sĭt pah kan ta ăp ngih dak si bah dih, bah meng nĕ nău kơl wăch rgum, an geh tay ăp nău kơl êng gay khân pơng đăp mpăn pah kan, tĭng đah nău kan.