VOV4.M’nông:   Kơp bah khay 12/2021, rnôk nu nău srê geh jêr jŏt rnôk na nao kơp dơn nuĭh ntưp Covid-19, n’gor Dak Lak tâm ŭch nău ntrŭnh an ăp nuĭh ji Covid-19 ta nkual ƀon têh Buôn Ma Thuột dơi săm, nkhah êng ta jay. Gay n’hŭch âk an ăp ngih dak si, rmôt nchih nău nai dak si ta nkual ƀon têh Buôn Ma Thuột lĕ ŭch êng ƀư ndâk njêng rmôt mbơh ntĭm online an dơm n’hanh ntop kơl nuĭh ji F0 ta jay.

Jêh rnôk gĭt nơm geh Covid-19, yuh Cao Thị Thanh Phương, ta khôí 2, phường Tân Hoà dŭt klach, rvê, yor tâm jay hôm e geh 2 hê kon jêt. Dơi băl bên nkoch rmôt Ntop kơl săm F0 ta jay n’gor Dak Lak, yuh lĕ kuăl điện đă ntop kơl, knơm kơt nĕ lĕ rlet rlău nău rvê, tâm rgop tĭng ăp nău ntĭm bah rmôt nai dak si, đăp mpăn rlet rlău chôt srê:

          “Gâp saơ gâp geh F0, gâp dŭt klach n’hanh rvê, gâp dăn nkhah êng ta jay jêh nĕ gâp dơi băl nkoch an gâp rmôt nai dak si Hòa Anh săm F0 ta jay. Tâm rmôt nai dak si Hòa Anh ăp nuĭh dŭt gơih, ăp nar ăp nai dak si, nău săm kuăl điện ôp khâl n’hanh but uănh săk soan an gâp n’hanh ntĭm gâp gŭ ta jay nkhah êng m’hâm ƀư gay đăp mpăn an gâp n’hanh ăp nuĭh kiău ma, ăp nai dak si pă dak si an gâp gay săm, tâm rnôk săm gâp lĕ bah, lah uĕh rmôt nai dak si Hòa Anh lĕ ntop kơl săm F0 ta jay”.

Rmôt kơl kan bah nai dak si Hòa Anh dôl ntop kơl săm F0 ta jay

          Kơt yuh Cao Thị Thanh Phương n’hanh âk nuĭh ji Covid-19 êng ta Dak Lak, jêh 5 nar đă săm ta jay đah nău ntop kơl bah rmôt dak si ntop kưl săm F0 ta jay, wa Trần Thị Kim Loan ta phường Tân An, nkual ƀon têh Buôn Ma Thuột lĕ geh uănh năl mô ntưp đah SARS-CoV-2. Nău răm rhơn yor săk soan lĕ bah, wa Loan lah uĕh rmôt mbơh ntĭm-kơl, lĕ dŭt n’hâm ntĭm wa tâm nar săm.

“Tă nău mbơh bah rmôt ntop kơl Dak Lak nău wa Hòa Anh ri gâp điện thoại dâl n’hanh dơi ăp wa, ăp điều dưỡng y tá kơl dŭt ngăch n’hanh pă dak si, uănh nđôi ăp nar. Jêh 5 nar lah mô ntưp n’hanh mbơh an phường uănh nđôi tay n’hanh năl na nê̆”.

Rmôt mbơh ntĭm online an dơm n’hanh ntop kơl nuĭh F0 ta jay yor nai dak si Phạm Hòa Anh, aƀaơ dôl pah kan ta Ngih dak si Đa khoa Thiện Hạnh, n’gor Dak Lak ƀư. Râng rmôt geh 50 nuĭh geh ăp y, nai dak si ta âk n’gor, nkual ƀon têh êng êng ndrel râng rmôt kơl kan ta Dak Lak. Gay dơi đăp mpăn kâp 24/24, ơm mbơh ntĭm online, rmôt dơi pă jêng ăp rmôt jêt lơn, tâm di đah ăp nkô̆ nău mbơh ntĭm ntop kơl F0. Tĭng nĕ, rmôt nai dak si mbra mât uănh mbơh ntĭm, săm; rmôt điều dưỡng mât uănh ntĭm trong răk rao kaman, nsôr n’hâm, uănh nđôi nău ji, nchih nău mbơh tâm trong uănh nđôi mô lah tâm ôp trong mbơh ndal tâm rnôk rgâl nău ji; rmôt dược sĩ mbra mbơh ntĭm ngêt dak si; rmôt wơt dơn, tâm pă dak si, ndơ dak si...

Tĭng nai dak si Hòa Anh, jêh bơi 4 khay ndâk njêng, rmôt lĕ ntop kơl online mât uănh săm ta jay an nklăp 1.500 F0 n’hanh mô geh nău rgâl mbăn.

“Râng tâm bôk nău kan geh âk ntil dơi geh nuĭh tâm nău kan dak si, geh âk nuĭh bah dih nău kan y lăp ƀư gưl tâm pă dơn nuĭh ji n’hanh ntĭm bu nglăp ap, jêh nĕ ntrŭt đă bu. Tal 2 lah bôk nău kan dơi âk nuĭh lŏng bôk tôr kơl ri mbra geh prăk nkrem bah pơng n’hanh prăk nkrem nĕ mbra rwăt geh âk dak si gay he kơl nuĭh ji dơh khân pơng hăn rwăt n’hanh he geh đêt prăk nkrem gay năp rwăt ăp ntil ndơ bah ăp nuĭh kơl kan kơt xăng ndeh hăn nsong”.

Rmôt bah nai dak si Hòa Anh nchrăp tŏng ăp bình oxi n’hanh ăp ndoh ndơ êng gay kơl săm F0 ta jay

Lăp tâm năm 2022, srê Covid-19 geh jêr jŏt ta Dak Lak; rnoh nuĭh ji hao âk nan ao, geh nar kơp dơn rlău 4.500 nuĭh. Aƀaơ n’gor Dak Lak geh rlău 87 rbăn nuĭh ji Covid-19, tâm nĕ, êng nkual ƀon têh Buôn Ma Thuột geh rlău 30 rbăn nuĭh ji. Tâm rnoh rlău 30 rbăn F0 aơ geh nklăp rlău 15 rbăn nuĭh dôl săm, 98% tâm rnoh nĕ dôl săm ta jay. Tĭng wa Nay Phi La, Kruanh N’gâng kan dak si n’gor Dak Lak, rnoh nuĭh F0 dôl săm ta jay ta Buôn Ma Thuột lĕ ƀư an âk ntŭk dak si ta ntŭk geh âk nuĭh. Nău hăn ndrel, ntop kơl bah rmôt nai dak si Phạm Hòa Anh lah nău ryơk ngăn, rgop n’hŭch jêr an dak si bâh dâng:

“Jrô but uănh bah nai dak si Hòa Anh lĕ râng tâm rmôt Covid-19 ntŭk gŭ rêh n’hanh tŏng ăp ndoh ndơ bah bình ô xi, măy SPO2 n’hanh dŭng dak si A, B gay săm. Aơ lah ngoăy tâm âk nău nsrôih bah nsum mpôl trong kan njrăng n’gang. Kơt ndrĭ nău kan dak si mô geh rngot êng. Tâm nar tât dŭt ŭch n’hanh kuăl jă ăp rmôt n’hanh ăp jrô but uănh ndrel râng đah nău kan dak si săm F0 ta jay”.

Tâm rnôk srê Covid-19 dôl geh jêr jŏt, dơi lah nău râng bah rmôt y, nai dak si bah rmôt mbơh ntĭm online an dơm ntop kơl nuĭh ji F0 ta jay dŭt khlay, kơl ăp F0 geh ntŭk nsing knơm, nâp nâl gay rdâng đah chôt srê, tă bah nĕ rgop mô jêt tâm nău njrăng n’gang srê, kơt rêng hvi ăp nău khlay uĕh lăng tât đah nsum mpôl.

                    Nuĭh rblang: Y Sưng Phê Ja