Dôl mât mê̆ 94 năm deh geh Covid-19 ta Khoa Truyền nhiễm, Ngih dak si Đa khoa nkual Tây Nguyên, wa Đặng Ngọc Lân, ta thôn 8, xă Hòa Thắng, nkual ƀon têh Buôn Ma Thuột an gĭt, tă aơ 1 pơh, mê̆ bah wa geh duh, ŏ’rah, ngêt sa jêr, rnăk wâl mĭn wa geh ji kop way mâp jêng rwăt êng dak si duh sĭt an wa ngêt. Ăp rơh duh jŏ jong, rnăk wâl ndơ̆ wa lăp ngih dak si săm. Rnôk gĭt mê̆ ntưp Covid-19, wa Lân rvê yor wa mô hŏ chuh vaccine.

“Ăp kônh ăp yơ lah an wa gŭ ta wâl, chuh an nuĭh mom lor, jêh nĕ wa mĭn bah kơi, nkhah êng wa jêh nĕ mô an nuĭh mâp đah wa ri bah oi tât aƀaơ. Mhe rlău duh ri mĭn lah klơm soh dơm, mô mĭn geh Covid-19 ôh, ndơ̆ ta aơ test tay geh Covid-19. Mô gĭt dâl, ăp mon ta jay pơng hăn nti, hôm gâp chuh vaccine hôm hôm u mô geh ntŭk hăn”.

Dôl săm Covid-19 ta ngih dak si Đa khoa nkual Tây Nguyên, nô Hoàng Văn Hân, thôn Ana, xă Dray Sáp, nkuăl Krông Ana an gĭt, jay nô tăch ndơ, ăp nar mâp đah âk nuĭh jêng nô mô gĭt geh ntưp Covid-19 moh nar. Rnôk saơ ji mlông dơ̆, duh hô nô mư hăn ngih dak si:

“Lah nsum dơi chuh 3 nglai vaccine jêng dơh đŏng, lah nsum nău ji mô tât rnoh mbăn, pơng duh đêt dơm, 2 tay pơng mô geh ji ŏk, knŭng mlông dơ̆ pơng ji, ngêt sa mô dơi jêng săk soan pơng mbrơi bah”.

 Tĭng nai dak si Phạm Hồng Lâm, kruanh Khoa Truyền nhiễm, Ngih dak si Đa khoa nkual Tây Nguyên, tâm du khlay plơ̆ aơ, rnoh nuĭh lăp ngih dak si yor Covid-19 hao ngăch. Ăp nuĭh ji lăp ngih dak si tâm nu nău lĕ săm êng đêt nar ta jay n’hanh way geh nău ji ơm, Aƀaơ Khoa dôl săm an 25 nuĭh ji Covid-19.

“Tâm 25 nuĭh geh nklăp 5% an ntop kơl oxi, an tât rnôk aơ mô geh nuĭh mbăn, yơn lah nu nău geh âk nău jêr. Gay mbơh njrăng n’hanh njrăng bah khĭt nuĭh ri nuĭh ntưp lĕ rngôch ăp nău ji mpeh trong n’hâm lơn lah ta nău ji ăp nuĭh geh nău ji ơm ri tât but uănh n’hanh nchroh mkra tĭng nuĭh. N’hanh geh du nău nuĭh ƀon lan đăp mpăn ăp nuĭh n’gơch an săm bah dih, knŭng lăp ngih dak si ăp nuĭh ji mbăn, n’hanh ăp nuĭh aơ dŭt âk geh nău ji ơm nkre”.

Bah bôk năm 2023 tât nar 16/5, lam n’gor Dak Lak kơp dơn 570 nuĭh ji Covid-19. Knŭng kơp êng 7 nar bah năp, Dak Lak lĕ kơp dơn 252 nuĭh n’hanh du hê khĭt. Tĭng wa Hoàng Hải Phúc, Groi Giám đốc Mât uănh Ntŭk uănh nđôi kop ji n’gor Dak Lak, rnoh nuĭh Covid-19 hao ngăch jêh rơh rlu lễ 30-4 n’hanh 1/5 mhe rlău., Aƀaơ lĕ rngôch nuĭh ƀon lan lĕ bên jăng bok put mbung n’hanh puh rao ntŭk gŭ rêh jêng nău ntưp âk đŏng.

“Mpôl hên tâm nchră an N’gâng kan dak si kơt Ủy ban n’gor geh ntĭm rđău n’hao trong kan nkoch mbơh gay nuĭh ƀon lan wât trong mkra 2K, nkoch trêng gay nuĭh ƀon lan rƀŏng tĭng nău chuh ma mpôl hên dôl ƀư. Aƀaơ lĕ rngôch ăp nkuăl geh nuĭh Covid hôm e geh nkual nkhah êng, hôm e mât trong njrăng n’gang srê. Rnôk ji mbăn ri mư hăn Ngih dak si Đa khoa nkual lah ngih dak si n’glêh dŭt hôm ăp ntŭk kan hôm e nchrăp săm ăp nuĭh Covid n’gơch”.

Tĭng nău mbơh bah Ntŭk uănh nđôi kop ji (CDC) n’gor Dak Lak, ta n’gor mhe kơp dơn du hê khĭt yor Covid-19. Nuĭh khĭt 56 năm deh, ta tổ dân phố 4, nkuăl têh Buôn Trấp, nkuăl Krông Ana, n’gor Dak Lak. Nuĭhkhĭt geh ji bah nar 12/5 ta nău ji ơm djuôr ăp ntil, leh, klơm n’hanh geh nău ji chrach njŭng.

Ta năp nĕ, tâm khay 4 mhe rlău, jêh rnôk saơ 8 kon hŏk ntưp đah Covid-19, nău kan dak si Dak Lak lĕ ƀư test Covid-19 an ăp kon hŏk ngih sam ƀŭt THCS Trưng Vương, phường Thành Công, nkuăl ƀon têh Buôn Ma Thuột. Jêh test, kơp dơn 7 nuĭh ntưp đah kaman Covid-19. Ta năp nu nău jêr jŏt bah srê Covid-19 rnôk nuĭh ntưp geh nău hao, nău kan dak si nkual ƀon têh Buôn Ma Thuột, n’gor Dak lak lĕ tâm ôp tâm nchră an n’gâng kan ƀon lan ăp gưl mpeh trong nchrăp njrăng n’gang srê Covid-19. Nkre n’hao nkoch trêng tât nuĭh ƀon lan gay n’hao nău wât mât uănh săk soan an nơm n’hanh nsum mpôl.