Dôl mât kon bu ur 16 khay ta Khoa nhi Tổng hợp Ngih dak si Đa khoa nkual Tây Nguyên, yuh Huỳnh Thị An ta xă Cư M’lan, nkuăl Ea Súp, n’gor Dak Lak an gĭt, tă aơ nklăp 1 pơh, yuh saơ kon siăk âk, ŏk r’ah, duh hô n’hanh ta mpang jâng ty geh ntoh rplay dak jêng leo hăn but uănh. Nai dak si n’glôn jêh mon geh jâng ty mbung. Jêh 3 nar săm ta ngih mô bah, rnăk wâl lĕ leo mon hăn Ngih dak si đa khoa Nkual Tây Nguyên:

“Rnôk lăp ta aơ rplay dak ntoh âk hăn 2 mpang jâng jêh nĕ rêng ta du đêt mpang ty tay. Gâp mô gĭt mpeh ji jâng ty mbung jêng gŭ ta jay ndơ pâl ri gâp an mon pâl dơm mô mĭn yan aơ pơng ntoh srê aơ”.

Mât kon 7 năm đŏng ntưp jâng ty mbung ta ngih dak si Đa khoa nkual Tây Nguyên, yuh Nguyễn Thị Diện ta phường An Bình, nkual têh Buôn Hồ an gĭt, jêh 5 nar săm, kon bah yuh lĕ bah duh, săk soan mbrơi mbrơi bah:

 “Bah sa ơm mô geh, ta bah dâng nĕ đêt nău, đêt nuĭh geh jêng mô dơi gĭt. Gâp sĭt gâp răk rao kloh uĕh lơn, njrăng lơn tâm nău hăn nsong, pâl rlưn”.

Tĭng nai dak si Huỳnh Thị Bích Như, Khoa nhi tổng hợp, Ngih dak si Đa khoa nkual Tây Nguyên, bah bôk năm tât aƀaơ, khoa lĕ wơt dơn, săm an rlău 85 kon se ntưp ji jâng ty mbung. Dôl lah tâm 1 khay plơ̆ aơ rnoh nuĭh lăp ngih dak si hao âk Aƀaơ khoa dôl săm 15 nuĭh ntưp ji jâng ty mbung, tâm nĕ, geh 2 hê mbăn. Nai dak si Huỳnh Thị Bích Như mbơh ntĭm

“He njrăng dêr đah trong n’hao soan rdâng an kon, ngêt sa tŏng ăp ndơ kah, ngêt dak jêh nĕ ntop ăp vitamin gay n’hao soan rdâng an kon n’hanh an chuh ăp ntil vaccine njrăng n’gang srê n’hanh ntĭm an kon rao ty yor ty jâng mbung he răk kloh pơng n’hŭch ntưp rêng”.

Tĭng Ntŭk Uănh nđôi kop srê n’gor Dak Lak, kơp bah bôk năm tât aƀaơ, lam n’gor lĕ kơp dơn rlău 100 nuĭh ntưp jâng ty mbung chah chrai ta 15 nkuăl, nkual têh, nkual ƀon têh. Tâm nĕ, geh 1 hê khĭt. Nklăp 1 khay plơ̆ ma aơ, tâm bôk yan mih, rnoh nuĭh ntưp ji jâng ty mbung dôl hao, rĭng 1 pơh kơp dơn bah 12 tât 15 nuĭh. UBND n’gor Dak Lak lĕ công văn mrô 4953, mpeh nău n’hao trong kan njrăng n’gang srê, jâng ty mbung; nău kan dak si ntĭm rđău ăp ngih dak si n’hao trong kan uănh nđôi, gay nchoeng nkual, mkra ntŭk srê; ntrôl dăng trong kan nkoch mbơh mpeh njrăng n’gang srê tât nuĭh ƀon lan. Nkre, tâm rgop đah N’gâng kan ntĭm nti tiăr nti an ăp ngih sam ƀŭt trong njrăng n’gang srê ntưp rêng. Wa Hoàng Hải Phúc, Groi Giám đốc mât uănh Ntŭk kan groi nđôi kop srê n’gor Dak Lak an gĭt:

“Mpôl hên tâm nchră an N’gâng kan dak si gay ntĭm rđău ăp ntŭk kan n’hanh tâm nchră an nău kan ntĭm nti nkoch trêng 3 nău kơt ngêt duh, sa sĭn, răk rao kloh uĕh, rao ty n’hanh ƀư tĭng 6 trong mkra ma N’gâng kan dak si đă yơn nuĭh ƀon lan hôm e thơ tha. Mpôl hên tâm rgop đah N’gâng kan ntĭm nti tiăr nti an ăp nuĭh rnôk ma geh ăp oh geh srê jâng ty mbung mbra nkhah êng dâl, nkoch trêng rgŏ jă rnăk wâl răk rao ngih wâl, răk rao jâng ty mbung lor rnôk ngêt sa n’hanh jêh hăn ăch chrach”.