Rơh tal 3 leo kon hăn ngih dak si chuh vắc xin 5 tâm 1, yơn yuh H’ Cuôn Ksor, xã Krông Jing, nkuăl Mdrak lŏ plŏ sĭt yor mô tŏng vắc xin. Yuh H’Cuôn mbơh, yuh djăt tâm Đài, báo gĭt bu lah êp aơ geh srê ji ntoh luh, yơn rnôk leo kon hăn ngih dak si ri lŏ mô geh vắc xin ri ma yuh rvê ngăn:

‘Kon gâp hŏ 4 khay jêh, ma ê geh chuh vắc xin 5 tâm 1. Rnôk aơ gâp leo kon gâp hăn chuh gay ma njrăng ji kuet ma kŏ mô geh vắc xin ơm. Gâp ŭch ơm geh vắc xin gay ma chuh ân kon gâp”.

Yuh H’Yên Niê, Kruanh ngih dak si xã Krông Jing, nkual Mdrak mbơh, rnôk aơ lam xã geh rlau 220 kon se rlau 2 khay hăn chuh vắc xin 5 tâm 1 ma ê geh. Tĭng yuh H’Yên, nau mô tŏng vắc xin jŏ jong mô knŭng khuch ân kon se, ma hôm ƀư nkol tâm nau bonh đă ƀon lan leo kon hăn chuh jêh aơ:

 ‘Rnôk aơ, vắc xin âk ngăn, ngăn lah vắc xin 5 tâm 1 hŏ rlau 6 khay mô geh vắc xin, êng nê lah nglai chuh rtoh luh nglai 1 jêh ri vắc xin DPT hŏ mô geh gay ma chuh ân kon se. Kơt nê lơn ma jêr tâm nau nkoch mbơh jă ăp me leo kon hăn chuh. Kơt lah bu tât du tơ mô geh, 2 tŏ mô geh, rơh tal 3 mô geh ri jêh aơ nơm bonh đă bu hăn chuh ri jêr ngăn”.

Tĭng wa Lê Thị Thuỷ, Giám đốc Ngih dak si nkuăl Mdrak, nkuăl Mdrak lah ngoai tâm ăp nkual geh âk xã tâm nkuăl rđŭng ŭch chuh. Tâm ăp năm ma aơ, ntŭk kan dak si nkual mro jêr tâm nau bonh đă me mbŏ kon se leo kon hăn chuh ân tâm di ndrel tŏng. Rnôk aơ lŏ mô tŏng vắc xin ri lơn ma ƀư jêr ngăn tâm nau dăng châl ma nau ji tâm ƀon lan lah âk ngăn:

 ‘Bah năp nơh, bol ma geh pă vắc xin tă bah N’gâng kan dak si sĭt ri Mdrak ndrel du đê̆ nkuăl ach o kŏ mâp âk nau jêr ngăn mpeh nau chuh n’gang, ngăn lah tâm ăp xã nkual jru, ngai, nkuăl rnoi mpôl đê̆, rnôk aơ vắc xin mô tŏng đŏng ri lơn ma jêr đŏng. Nau chuh vắc xin ân kon se ân geh ƀa ƀơ tĭng nau ntrŭnh ndrel tĭng nar đă, lah mbrơi ndrel mô năn ri păng khuch ngăn tât nau dăng châl nau ji tâm kon se”.

 Mô tŏng vắc xin njrăng ji ân kon se lah nau dôl geh tâm n’gor Dak Lak. Tĭng wa Võ Minh Hùng, Giám đốc Ngih dak si nkual ƀon têh Buôn Ma Thuột, n’gor Dak Lak, nơm bôk năm tât rnôk aơ, nkual ƀon têh hŏ lĕ jêh vắc xin DPT, hôm vắc xin 5 tâm 1 mhe geh pă du tŏ tâm khay 1 đah 368 dĭng, tâm nrôk nau ŭch bah nkuăl ƀon têh ŭch geh 15 tât 18 rbăn dĭng vắc xin 5 tâm 1:

 ‘Tât rnôk aơ, kon se tâm dâng du năm chuh 8 dĭng vắc xin tâm nkuăl ƀon têh phung hên mơ knŭng geh 30% kơt nê hôm dêh ngăn rđil đah nau nchrăp năm lah 98%. Ri lah tâm rơh tât kŏ đă lah ân geh nau pă ân năn vắc xin 5 tâm 1 lah êng ndrel vắc xin tâm bôk nau kan chuh n’gang pơk hvi bah neh dak lah nsum gay ma ntrŭt dăng nau ngăch chuh n’gang ân kon se, rgop nau mât n’hâm soan ân ăp kon se”.

Tĭng rnoh kơp bah Ntŭk kan nkân njrăng srê ji n’gor Dak Lak, tâm rnoh 12 ntil/rmôt vắc xin tâm bôk nau kan chuh n’gang pơk hvi ân kon se năm 2023 Dak Lak mhe knŭng tŏng 2 ntil vắc xin bại liệt ndrel uốn ván, 2 ntil vắc xin lah “5 tâm 1” ndrel DPT hŏ lĕ, hôm e knŭng chuh ân kon se lôch khay 8.

Tĭng wa Lê Phúc, Groi Giám đốc Ntŭk kan nkân njrăng srê ji n’gor Dak Lak, nkô̆ nau bah nau mô tŏng ntŭk pă vắc xin lah yor ntơm năm 2023 rnôk ntrơn rgâl bôk nau kan bah dak si, rnoh nŭih, ƀư jêh nau kan ƀa ƀơ ân ăp nkuăl. Yơn lah, tâm nau ngăn, nau ntrơn rgâl tơm prăk gay ma nkuăl rvăt vắc xin hôm geh ăp nau nkol tât rnoh tăch, đấu thầu. Ntĭk kan nkân njrăng srê ji bah n’gor hŏ rgum nau ŭch vắc xin ndrel nau nchrăp nau pă vắc xin bah năm 2023 ndrel 2024 gay ma kơl mbơh nchră ân N’gâng kan dak si mbơh ân UBND n’gor pă tơm prăk gay ma rvăt. Wa Lê Phúc, Groi Giám đốc ntŭk kan nkân njrăng srê ji n’gor Dak Lak, mbơh:

 ‘Gay dơi geh njêng nau dăng châl ma nau ji ueh ngăn tâm ƀon lan ri ân geh n’hao nau dơi bah rnoh chuh n’gang ndrel mhâm ƀư nau nê nơm ân geh chuh ân tâm di, tŏng ri mơ păng dơi geh dăng châl ma nau ji mra geh đăp mpăn ndrel mât an ueh ngăn. Yơn lah, tâm gleh nar, lah geh vắc xin ri mra dơi ƀư nau chuh ntop tay ri mra tŏng dơi dŏng ân kon se. Phung hên klach ngăn lah ăp kon se ê geh chuh du nglai, ma rnôk aơ mô tŏng vắc xin ri nau nê ngăn lah păng mra khuch ngăn tât n’hâm soan bah kon se”.

Tĭng ăp nŭih kan dak si, mô tŏng vắc xin mra khuch ngăn tât nau geh tam bah bôk nau kan chuh n’gang pơk hvi. Nau khuch bah nau mô dăng châl đah srê ji mra njêng luh rnôk ma ăp kon se mô geh chuh n’gang tŏng ăp, tâm di nau ntrŭnh đă, nau aơ mra ƀư hao lơn tay nau mra geh tât srê ji ntoh luh tay./.