Ta n’gor Dak Lak, nau ji luh mham gur dôl ma hao âk, mra geh ntoh tay dăng rnôk ma ntơm tât tâm yan mih. Kơp ntơm bôk năm tât rnôk aơ, lam n’gor geh kơp dơn 283 nŭih geh ntưp ma srê rtoh luh mham gur, tâm nê geh 280 nŭih ntưp ma srê rtoh luh mham gur Dengue, 3 nŭih ntưp ma srê rtoh luh mham gur Dengue jâk. Rđil đah ăp khay bah năp nê, hao rlau 40 nŭih ji ndrel kơp dơn geh 3 ntŭk geh srê tâm ăp nkuăl Buôn Đôn, Krông Năng ndrel Krông Ana.

Gay nchrăp ân nau kan njrăng rdâng srê luh mham gur, mô ân srê ntoh luh hô, Ntŭk kan nkân njrăng srê ji tâm n’gor Dak Lak hŏ rđau ăp rmôt kan tâm ntŭk ân n’hao lơn nau kan mêt uănh, njrăng rjăp véc-tơ, nkân njrăng srê ji, rklaih ăp ntŭk dôl geh srê gay ma njrăng rdâng nau ntưp rêng tâm ƀon lan, năl ăp nkuăl mra geh nau ji hô gay ma ƀư nau puh dak si nkhĭt măch, nchrăp njrăng đah srê rtoh luh mham gur. Nkre ntrŭt dăng nau kan nkoch trêng, bonh đă ƀon lan ƀư ăp nau kan răk kloh ntŭk ntu, nkhĭt bu bi tăp măt gay ma njrăng nau tât bah srê rtoh luh mham gur tâm rnăk vâl ndrel ƀon lan./.